ក្រសួងបរិស្ថាន រៀបចំសិក្ខាសាលាប្រកាសដាក់ឱ្យអនុវត្តគម្រោង ស្តីពី ទប់ស្កាត់ការបំពុលដោយផ្លាស្ទិកសម្រាប់សមាគមន៍ និងទន្លេមេគង្គនៅកម្ពុជា
(ភ្នំពេញ)៖ ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន បានអញ្ជើញចូលរួមក្នុងសិក្ខាសាលាប្រកាសដាក់ឱ្យអនុវត្តគម្រោង ស្តីពី “ទប់ស្កាត់ការបំពុលដោយផ្លាស្ទិកសម្រាប់សមាគមន៍ និងទន្លេមេគង្គនៅកម្ពុជា” ដោយមានការចូលរួមពីលោក Chen Cong អគ្គទីប្រឹក្សានៃស្ថានទូតចិន ប្រចាំកម្ពុជា តំណាងមកពីក្រសួងបរិស្ថាន សាកលវិទ្យាល័យ សាលារាជធានី ខេត្ត មន្ទីរបរិស្ថានរាជធានី-ខេត្ត ដៃគូអភិវឌ្ឍន៍ និងអ្នកពាកព័ន្ធ នាព្រឹកថ្ងៃទី៣០ ខែកក្កដា ឆ្នាំ២០២៥ នៅសណ្ឋាគារ កាំបូឌីយ៉ាណា រាជធានីភ្នំពេញ។
ឯកឧត្តម ជួប ប៉ារីស៍ បានថ្លែងថា បច្ចុប្បន្ន សំណល់ប្លាស្ទិកដែលបានបោះចោលភាគច្រើន ជាប្លាស្ទិកដែលប្រើតែមួយដងបោះចោល ដោយថង់ប្លាស្ទិកប្រមាណ ១០លានថង់ ត្រូវបានប្រើប្រាស់ជារៀងរាល់ថ្ងៃនៅក្នុងរាជធានីភ្នំពេញ ខណៈប្រជាពលរដ្ឋកម្ពុជាម្នាក់ៗដែលរស់នៅក្នុងក្រុងនានា ប្រើប្រាស់ថង់ប្លាស្ទិកជាង ២ពាន់ថង់/ឆ្នាំ ប្រមាណជា ១២ ថង់/ខ្នងផ្ទះ/ថ្ងៃ ។ សំណល់ប្លាស្ទិកទាំងនោះ មួយចំនួនបានប្រមូលទៅទីលានចាក់សំរាម ប៉ុន្តែមួយចំនួនទៀតដែលសល់ ត្រូវបានចោល និងហូរចូលក្នុងទន្លេ បឹងបួរ រួចបន្តហូរចូល សមុទ្រ និងបានបង្ករការគំរាមគំហែងយ៉ាងធ្ងន់ធ្ងរដល់បរិស្ថានធម្មជាតិ ជីវៈជម្រុះ វដ្តអាហារ សុខភាពមនុស្សសត្វ សោភ័ណភាព និងសេដ្ឋកិច្ចជាតិ ។
ឯកឧត្តមបន្តថា ដើម្បីដោះស្រាយ បញ្ហាដែលកំពុងកើនឡើងដោយការបំពុលដោយប្លាស្ទិកប្រកបដោយប្រសិទ្ធភាព ក្រសួងបរិស្ថាន បានដាក់ឱ្យអនុវត្តអនុក្រឹត្យលេខ ១៦៨ ផ្តោតចំពោះផ្សារទំនើប និងមជ្ឈមណ្ឌល ពាណិជ្ជកម្មធំៗ ដោយបានកំណត់ឱ្យមានការយកថ្លៃសេវាតិចតួចបន្ថែមលើថង់ប្លាស្ទិក ដើម្បីបន្តពង្រឹងវិធានការពាក់ព័ន្ធនឹងការគ្រប់គ្រងប្លាស្ទិកតាំងពីឆ្នាំ២០១៨។ ចាប់តាំងពីពេលនោះមក ការប្រើប្រាស់ថង់ប្លាស្ទិកនៅតាមផ្សារទំនើបធំៗបានថយចុះជាង ៥០%។ ក្រសួងបរិស្ថាន ក៏បានជំរុញលើកទឹកចិត្តឱ្យប្រជាពលរដ្ឋ និងអាជីវករបង្កើនការប្រើប្រាស់ផលិតផលដែលអាចយកមកប្រើឡើងវិញ ជំនួសឱ្យប្លាស្ទិកដូចជាវត្ថុធាតុដើមធម្មជាតិ ឬផលិតផលដែលអាចប្រើប្រាស់ឡើងវិញច្រើនលើក។ ការនាំចូលថង់ប្លាស្ទិកបានថយចុះរហូតដល់ ៨៨% ធៀបនឹងឆ្នាំ២០២៣ ។
ទន្ទឹមនេះ កាលពីថ្ងៃទី០៥ ខែមិថុនា ឆ្នាំ២០២៥ ទិវាបរិស្ថានជាតិ និងបរិស្ថានពិភពលោក ក្រោមប្រធានបទ ប្រយុទ្ធប្រឆាំងការបំពុលដោយប្លាស្ទិក បានប្រារព្ធធ្វើឡើងក្រោមព្រះរាជអធិបតីភាពដ៏ខ្ពង់ខ្ពស់ព្រះករុណាព្រះមហាក្សត្រ នៃព្រះរាជាណាចក្រកម្ពុជា ដែលជាការបង្ហាញឱ្យឃើញពីការយកព្រះទ័យទុកដាក់របស់ព្រះករុណាជាអម្ចាស់ជីវិតតម្កល់លើត្បូងលើបញ្ហាបរិស្ថាន។ ជាក់ស្តែង ក្រសួងបរិស្ថាន បាននិងកំពុងអនុវត្តយុទ្ធនាការ (ក) “ថ្ងៃនេះ ខ្ញុំមិនប្រើថង់ប្លាស្ទិកទេ” ដែលការចូលរួមពីសាធារណៈជនសរុបជាង ១០លាន អង្គ/នាក់ (ខ) “កម្ពុជាស្អាត ខ្មែរធ្វើបាន” ដែលការចូលរួមពី សាធារណៈជនសរុបជាង ៥,៧លាន អង្គ/នាក់ (គ) យុទ្ធនាការ “ផ្លូវជាតិស្អាត គ្មានសំរាម និងសំណល់ប្លាស្ទិក” ដែលការចូលរួមពីសាធារណៈជនជាច្រើនាក់ និង (ឃ) យុទ្ធនាការ “ពន្លកបៃតង” ដែលបានចែកកូនឈើ ដល់សាធារណៈជនយកទៅដាំដុះសរុបចំនួនជាង ១,៨លានដើម និងបន្តបណ្តុះកូនឈើសម្រាប់ចែកជូនសាធារណៈជនបានចំនួនប្រមាណជាង ៣លានដើម ។
ឯកឧត្តម ជួប ប៉ារីស៍ បានបញ្ជាក់ថា គម្រោងស្តីពី “ការទប់ស្កាត់ការបំពុលដោយប្លាស្ទិកសម្រាប់សហគមន៍ និងទន្លេមេគង្គនៅកម្ពុជា” មានការគាំទ្រថវិកាពីមូលនិធិពិសេសកិច្ចសហប្រតិបត្តិការមេគង្គ-ឡានឆាង ដែលនឹងចូលរួមចំណែកដល់ការ រៀបចំ និងជំរុញសកម្មភាពនៅមូលដ្ឋានសម្រាប់កាត់បន្ថយការបំពុល តាមរយៈយុទ្ធសាស្រ្តចក្រាវិស័យ បរិស្ថាន គោលការណ៍បីអ័រ (3Rs) ប្រកបដោយភាពច្នៃប្រឌិត ការអនុវត្តសាកល្បងចក្រាប្លាស្ទិក ការបង្កើន ការយល់ដឹងរបស់រដ្ឋបាលក្រោមជាតិ និងសហគមន៍មូលដ្ឋាននៅតាមបណ្តាខេត្តតាមទន្លេមេគង្គកម្ពុជា រួមមាន៖ ខេត្តកណ្តាល ព្រៃវែង ត្បូងឃ្មុំ កំពង់ចាម ក្រចេះ ស្ទឹងត្រែង និងរាជធានីភ្នំពេញ ព្រមទាំងជំរុញ ការកែច្នៃឡើងវិញ និងជម្រើសជំនួសប្លាស្ទិក ៕
ដោយ ៖ វណ្ណលុក
