ថៃប្រើវិធានការផ្លូវច្បាប់ប្រឆាំងកម្ពុជាគឺពុំមានមូលដ្ឋានច្បាប់ទាល់តែសោះ និងធ្វើឡើងដើម្បីបង្វែងពីការទិតៀនរឿងរំលោភអធិបតេយ្យកម្ពុជា
(ភ្នំពេញ)៖ កម្ពុជាបានកត់សម្គាល់ដោយការរំខានចិត្តនូវរបាយការណ៍ដែលបានលើកឡើងដោយប្រព័ន្ធឃោសនាថៃមួយចំនួនកាលពីថ្ងៃទី០៥ ខែសីហា ឆ្នាំ ២០២៥ អំពីសកម្មភាពផ្លូវច្បាប់ប្រឆាំងនឹងកម្ពុជាដែលបានប្រកាសឡើងដោយរដ្ឋាភិបាលរបស់ថៃ ។ វិធានការផ្លូវច្បាប់នេះគឺពុំមានមូលដ្ឋានសោះឡើយ ហើយវាក៏បង្ហាញឱ្យឃើញនូវការប៉ុនប៉ង ដោយចេតនាដើម្បីបង្វែរការចាប់អារម្មណ៍របស់សាធារណៈមតិទាំងក្នុងប្រទេសថៃ និងអន្តរជាតិ ពីនយោបាយអមិត្តរបស់ថៃប្រឆាំងនឹងកម្ពុជា ជាពិសេសការវាយប្រហារឥតមូលហេតុ ប្រឆាំងនឹងទឹកដីរបស់កម្ពុជា ។
ថ្លែងក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅថ្ងៃទី០៦ ខែសីហា ឆ្នាំ២០២៥នេះ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យ ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា ៖ ចំពោះវិធានការផ្លូវច្បាប់របស់ថៃនាពេលនេះគឺវាបានបង្ហាញឱ្យឃើញយ៉ាងច្បាស់ថា មានគោលដៅ បង្វែងការទិតៀនដែលកំពុងកើនឡើងស្តីអំពីការខូចខាតប្រជាជនស៊ីវិល ការរំលោភបំពានរបស់ថៃទៅលើច្បាប់មនុស្សធម៌អន្តរជាតិ ហើយនិងការមិនគោរពជាបន្តបន្ទាប់ របស់ថៃចំពោះកិច្ចព្រមព្រៀងឈប់បាញ់។
អ្នកនាំពាក្យក្រសួងការបរទេសថ្លែងដែរថា ក្នុងចំណោមការចោទប្រកាន់ធ្វើជាមូលដ្ឋានសម្រាប់សកម្មភាពផ្លូវច្បាប់របស់ថៃនេះដែរ គឺពុំមានមូលដ្ឋានរឹងមាំឡើយ ហើយវាមានហេតុផលនយោបាយ និងវាក៏មិនមានមូលដ្ឋានសម្រាប់ជឿជាក់បានផងដែរ។ កម្ពុជាសូមបដិសេធជាដាច់ខាតនូវការចោទប្រកាន់ទាំងនោះ ហើយសូមធ្វើការអះអាងជាថ្មីម្តងទៀតអំពីចំណុចគន្លឹះមួយចំនួនដូចជា៖ ទី១៖កម្ពុជាមិនមែនជាអ្នកចាប់ផ្តើមនូវភាពប្រទូសសារាយនោះទេ។ ជម្លោះដែលកើតឡើងថ្មីៗនេះ គឺ បានចាប់ផ្តើមឡើងដោយការទន្រ្ទានចូលរបស់យោធាថៃ ហើយនិងការបាញ់ផ្លោងចូលមកក្នុងទឹកដីកម្ពុជា ដែលជាការរំលោភបំពាន ដោយផ្ទាល់មកលើអធិបតេយ្យភាពរបស់កម្ពុជា ។
ទី២៖កម្ពុជាធ្វើសកម្មភាពក្នុងសិទ្ធស្វ័យការពារស្របច្បាប់របស់ខ្លួន ។ កងកម្លាំងប្រដាប់អាវុធរបស់កម្ពុជា បានធ្វើការឆ្លើយតប សមស្របទៅតាមសកម្មភាព យោធារបស់ថៃ ហើយមានភាពសមស្របទៅតាមមាត្រា៥១ នៃធម្មនុញ្ញ នៃអង្គការសហប្រជាជាតិ សំដៅការពារអធិបតេយ្យភាព និងប្រជាជនស៊ីវិលរបស់ខ្លួនតែប៉ុណ្ណោះ។
ទី៣៖ កម្ពុជាពុំដែលយកប្រជាពលរដ្ឋស៊ីវិលធ្វើជាគោលដៅរបស់ខ្លួនសោះឡើយ។ការខូចខាតរបស់ប្រជាជនស៊ីវិលដ៏គួរឱ្យសោកស្តាយ ប៉ុន្តែការចោទប្រកាន់របស់ថៃបានមើលរំលងនូវការពិតដែលថាកងកម្លាំងប្រដាប់អាវុធរបស់ខ្លួនបានវាយប្រហារតាមក្នុងតំបន់ប្រជាជនស៊ីវិលដែលជាការរំលោភបំពានទៅលើអនុសញ្ញាទីក្រុងហ្សឺណែវក្នុងទឹកដីកម្ពុជា។ សម្រាប់កងកម្លាំងប្រដាប់អាវុធរស់កម្ពុជាវិញ បានគោរពដោយពេញលេញចំពោះច្បាប់មនុស្សធម៌អន្តរជាតិ ហើយមិនដែលយកប្រជាពលរដ្ឋស៊ីវិលយកជាគោលដៅ របស់ខ្លួនសោះឡើយ។
ទី៤៖កម្ពុជានៅមានការតាំងចិត្តចំពោះសន្តិភាព ថ្វីត្បិតនៅតែបន្តការបង្ករឿង ពីភាគីថៃ តែកម្ពុជានៅតែបន្តការតាំងចិត្តដ៏ពេញលេញចំពោះកិច្ចព្រមព្រៀងឈប់បាញ់ ។កម្ពុជាទាមទារឱ្យប្រទេសថៃបញ្ឈប់នូវរាល់ការផ្សាយព័ត៌មានមិនពិត ហើយនិងបញ្ឈប់នូវសកម្មភាពអមិត្តប្រឆាំងនឹងកម្ពុជា ហើយវិលត្រឡប់រកកិច្ចសន្ទនាប្រកបដោយស្ថាបនាក្នុងស្មារតីសន្និតសហវិជ្ជមាន និងសាមគ្គីភាព ៕
ដោយ ៖ ម៉ាដេប៉ូ
