ភ្នំពេញ៖ ក្រសួងពាណិជ្ជកម្មនិងរៀបចំ «វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ លើកទី២ (Cambodia 2nd Digital Trade Forum and Online Expo)» ដែលនឹងប្រព្រឹត្តទៅពីថ្ងៃទី១២-១៣ ខែកញ្ញា ឆ្នាំ២០២៥ នៅសាល​ស៊ីធីហលកោះពេជ្រ (Koh Pich City Hall) រាជធានីភ្នំពេញ។នេះបើយោងតាមសេចក្តីជូន​ដំណឹងរបស់​ក្រសួងពាណិជ្ជកម្មនៅរសៀលថ្ងៃទី៧ ខែសីហា ឆ្នាំ២០២៥នេះ។

សេចក្តីជូនដំណឹងដដែលបានឱ្យដឹងថា វេទិកានេះធ្វើឡើងក្នុងគោល​បំណងជំរុញកិច្ចពិភាក្សា​អំពីទិដ្ឋភាព​ពាណិជ្ជកម្ម ឌីជីថល ក្របខ័ណ្ឌ​គោលនយោបាយ ការផ្សព្វផ្សាយ និងជំរុញការនាំចេញផលិតផល​កម្ពុជាទៅកាន់ទីផ្សារអន្តរជាតិ តាមរយៈការជំរុញការប្រើប្រាស់ថ្នាល​ពាណិជ្ជកម្មតាមប្រព័ន្ធអេឡិចត្រូនិកក្នុងស្រុក និងអន្តរជាតិ ជាពិសេសផ្ទាល Cambodia Trade.com របស់ក្រសួងពាណិជ្ជកម្ម។ ជាមួយគ្នានេះ លោកជំទាវ ចម និម្មល រដ្ឋមន្ត្រីក្រសួង ពាណិជ្ជកម្ម នឹងផ្តល់កិត្តិយសអញ្ជើញចូលរួមជាអធិបតីដ៏ខ្ពង់ខ្ពស់ក្នុងពិធីសម្ពោធវេទិកាខាងលើជាផ្លូវការនាព្រឹកថ្ងៃទី១២ ខែកញ្ញា ។

ព្រឹត្តិការណ៍ខាងលើនឹងមាន៖ ១-ការចូលរួមពីក្រុមហ៊ុនផ្តល់សេវាកម្ម និងអ្នកជំនាញផ្នែកបញ្ញាសិប្បនិម្មិត និង ពាណិជ្ជ​កម្ម​ឌីជីថលចូល​រួមថ្លែងសុន្ទរកថាគន្លឹះនិងកិច្ចពិភាក្សា ២-វគ្គបណ្តុះបណ្តាលជំនាញ​ពិសេស ៣-កម្មវិធីជជែក ដេញដោល​យុវជន និង៤-ការរៀបចំស្តង់តាំង​បង្ហាញផលិតផល និងសេវាកម្មឌីជីថលជាច្រើនប្រភេទ រួមមាន៖ ផលិតផល សក្តា​នុពល​កម្ពុជា ផលិតផលសម្គាល់ភូមិសាស្ត្រទំនិញ អាហារនិងភេសជ្ជៈ សេវាកម្មអ៊ីនធឺណិត ពាណិជ្ជកម្មតាម ប្រព័ន្ធអេឡិច​ត្រូនិក ធនាគារ ភ្នាក់ងារដឹកជញ្ជូន និងសេវាកម្មក្លោដនិងបញ្ញាសិប្បនិម្មិត ជាដើម៕
ដោយ៖ង៉ាន់ ទិត្យ