ពលរដ្ឋភៀសសឹក១២២ គ្រួសារបានទទួលអំណោយរបស់សម្តេចធិបតី
បន្ទាយមានជ័យ៖ ឯកឧត្តម អ៊ុ រាត្រី អភិបាលអភិបាលខេត្តបន្ទាយមានជ័យ តំណាងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ និងថ្នាក់ដឹកនាំ ព្រមទាំងក្រុមការងារចុះមូលដ្ឋានស្រុកថ្មពួក បានបន្តនាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ដើម្បីផ្តល់ជូនបងប្អូនជនភៀសសឹក ចំនួន១២២គ្រួសារ ដែលមកស្នាក់បណ្តោះអាសន្ននៅមណ្ឌលសុវត្ថិភាព ក្នុងស្រុកថ្មពួក ។
ក្នុងពិធីសំណេះសំណាលនិងជូនអំណោយកាលពីថ្ងៃទី៧ ខែសីហា ឆ្នាំ២០២៥ ឯកឧត្តមអភិបាលខេត្តបន្ទាយមានជ័យបាននាំការផ្តាំផ្ញើសួរសុខទុក្ខពីសម្តេចធិបតីនិងលោកជំទាវបណ្ឌិតដែលជានិច្ចជាកាលលោកតែងគិតគូរយកចិត្តទុកដាក់ខ្ពស់និងណែនាំអាជ្ញាធរគ្រប់លំដាប់ថ្នាក់ពិនិត្យមើលគ្រប់ពេលវេលាលើការហូបចុកនិងរស់នៅរបស់បងប្អូនប្រជាពលរដ្ឋជាជនភៀសសឹក។
សូមបញ្ជាក់ថាអំណោយមាន អង្ករ មី ទឹកសុទ្ធ ទឹកត្រី ទឹកស៊ីអ៊ីវ ត្រីខ និងតង់៕
ដោយ៖ឃិន គន្ធា
