កំពង់ឆ្នាំង៖សមត្ថកិច្ចជំនាញខណ្ឌរដ្ឋបាលបាលជលផលកំពង់ឆ្នាំង សហការជាមួយអធិការដ្ឋានរដ្ឋបាល​ជលផល​ខាងត្បូងបឹងទន្លេសាប និងសហគមន៍នេសាទភូមិថ្មី ភូមិកៀនតាម៉ា ដឹកនាំដោយឯកឧត្តម ប៉ែន ផល្លិកា អនុរដ្ឋ​លេខា​ធិការក្រសួងកសិកម្ម រុក្ខាប្រមាញ់ និងនេសាទនៅថ្ងៃទី១៥ ខែសីហា ឆ្នាំ២០២៥ បានប្រតិបត្តិការ​បង្ក្រាប​ការ​ធ្វើ​នេសាទដោយខុសច្បាប់នៅចំណុចបឹងវាលសំណាប ក្រោយភូមិឃុំពាមឆ្កោក ស្រុកជលគិរី ។

ក្នុងសកម្មភាពនេះក្រុមការងារបានប្រទះឃើញការធ្វើនេសាទដោយប្រើឧបករណ៍លូរួមផ្សំរបាំងស្បៃមុង ដែលខុស​ទៅនឹងច្បាប់ស្តីពីជលផល។សមត្ថកិច្ច បាន​រុះរើនិងបំផ្លាញចោលវត្ថុតាងនៅនឹងកន្លែង។

លោក លី ឡា នាយខណ្ឌរដ្ឋបាលជលកំពង់ឆ្នាំងបានឱ្យដឹងថា ជាលទ្ធផល រុះរើនិងបំផ្លាញចោលរបាំងស្បៃមុង​ចំនួនមួយករណីស្មើនឹង១៦កន្លែង ប្រវែង៨៤០ម៉ែត្រ ,លូស្បៃមុងចំនួន១៦គ្រឿង ,បង្គោលចំនួន៤៨០ដើម និងចាក់លែងត្រីល្អិតចម្រុះចូលដែននេសាទវិញចំនួន ២០០គីឡូក្រាម៕

ដោយ៖សុខ គឹមសៀន