អនុប្រធានទី១ព្រឹទ្ធសភា ផ្ដល់អនុសាសន៍ដល់និស្សិត១០០នាក់ដែលត្រូវទៅសិក្សានៅប្រទេសចិន
ភ្នំពេញ៖អនុប្រធានទី១ព្រឹទ្ធសភា បានផ្ដល់អនុសាសន៍ដល់និស្សិតដែលត្រូវទៅសិក្សានៅប្រទេសចិន ឱ្យប្រកាន់យកនូវគោលជំហរអំណត់ តស៊ូ ព្យាយាម រៀនសូត្រ ។
ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភាកម្ពុជាកាលពីថ្ងៃទី១៨ ខែសីហា ឆ្នាំ២០២៥ បានអនុញ្ញាតឱ្យគណៈប្រតិភូសមាគមនិស្សិតកម្ពុជាប្រចាំប្រទេសចិនដឹកនាំនិស្សិតបានទទួលអាហារូបករណ៍ទៅសិក្សានៅប្រទេសចិន ឆ្នាំសិក្សា២០២៥ ចំនួន១០០នាក់ ចូលជួបសម្ដែងការគួរសមនិងទទួលយកអនុសាសន៍មុនពេលចេញដំណើរ។
ជាមួយនឹងការស្វាគមន៍យ៉ាងកក់ក្ដៅចំពោះនិស្សិតដែលបានទទួលអាហារូបករណ៍ឯកឧត្តមអនុប្រធានទី១ ព្រឹទ្ធសភា បានថ្លែងអំណរគុណដល់ឯកឧត្តម អ៊ុ វុទ្ធទី ប្រធានក្រុមប្រឹក្សាភិបាលសមាគមនិស្សិតកម្ពុជា ប្រចាំសាធារណរដ្ឋប្រជាមានិតចិន និងជាជំនួយការសម្តេចតេជោប្រធានព្រឹទ្ធសភា ដែលបានខិតខំប្រឹងប្រែងជួយរកអាហារូបករណ៍ផ្តល់ដល់ក្មួយៗនិស្សិតទៅបន្តការសិក្សាដែលជាការរួមចំណែកដ៏សំខាន់ក្នុងការអភិវឌ្ឍធនធានមនុស្ស។
ឆ្លៀតក្នុងឱកាសនោះឯកឧត្តមអនុប្រធានទី១ ព្រឹទ្ធសភា បានផ្ដល់អនុសាសន៍ណែនាំ ដល់និស្សិតទាំងអស់ឱ្យប្រកាន់យកនូវគោលជំហរ” អំណត់ តស៊ូ ព្យាយាម” រៀនសូត្រដែលជាអាវុធដ៏មុតស្រួច ដើម្បីអនាគតដ៏ភ្លឺស្វាងរបស់ខ្លួនម្នាក់ៗ និងដើម្បីប្រែក្លាយខ្លួនជា “ទំពាំងស្នងឫស្សី” ដ៏រឹងមាំសម្រាប់ប្រទេសជាតិ ។និស្សិតទាំងអស់ ត្រូវចេះសាមគ្គី ស្រលាញ់រាប់អាន និងចេះយកអាសារគ្នាទៅវិញទៅមក ជ្រោងខ្ពស់ប្រពៃណីវប្បធម៌ និងកិត្តិយសជាតិ និងពង្រឹងពង្រីកចំណងមិត្តភាពជាមួយបណ្តានិស្សិតម្ចាស់ផ្ទះ និងបរទេស ដែលទៅសិក្សាជាមួយគ្នា។
ឯកឧត្តម ក៏បានធ្វើការកោតសរសើរ និងវាយតម្លៃខ្ពស់ ចំពោះស្មារតីសាមគ្គី ឯកភាព និងស្នេហាជាតិ របស់សមាគមនិស្សិតកម្ពុជា ប្រចាំប្រទេសចិន តាមរយៈសកម្មភាពរៃអង្គាសថវិកា ដើម្បីជួយឧបត្ថម្ភគាំទ្រ ដល់វីរយុទ្ធជននៅសមរភូមិមុខ និងជនភៀសសឹកដែលរងគ្រោះដោយសារ ការឈ្លានពានរបស់កងទ័ពថៃ៕
អត្ថបទ៖ វណ្ណលុក
រូប៖ សួង ពិសិដ្ឋ
