សម្ដេច ម៉ែន សំអន ត្រូវបានបោះឆ្នោតជ្រើសតាំងជាប្រធានក្រុមប្រឹក្សាជាតិប្រឆាំងអំពើពុករលួយអាណត្តិទី៤
ភ្នំពេញ៖ សម្ដេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ ត្រូវបានសមាជិកក្រុមប្រឹក្សាជាតិ ប្រឆាំងអំពើពុករលួយ បោះឆ្នោតជ្រើសតាំងជា ប្រធានក្រុមប្រឹក្សាជាតិប្រឆាំងអំពើពុករលួយ ខណៈឯកឧត្តម តុប សំ ជាអនុប្រធានក្រុមប្រឹក្សាជាតិប្រឆាំងអំពើពុករលួយអាណត្តិទី៤ (២០២៥-២០៣០)។ ការបោះឆ្នោត បានធ្វើឡើង នារសៀលថ្ងៃទី១៩ ខែសីហា ឆ្នាំ២០២៥ នៅទីស្ដីការអង្គភាពប្រឆាំងអំពើពុករលួយ តាមការអញ្ជើញរបស់ឯកឧត្តម ហេង វង្សប៊ុនឆាត ព្រឹទ្ធសមាជិកនៃក្រុមប្រឹក្សាជាតិប្រឆាំងអំពើពុករលួយអាណត្តិទី៤ ។
សមាជិកក្រុមប្រឹក្សាជាតិប្រឆាំងអំពើពុករលួយ អាណត្តិថ្មី ចំនួន ១១រូប មានវត្តមានក្នុងកិច្ចប្រជុំ លើកទី១ នេះ រួមមាន៖ ១-សម្តេចមហាមន្ត្រី គុយ សុផល, ២-ឯកឧត្តម តុប សំ សមាជិក, ៣-ឯកឧត្តម កើត រិទ្ធសមាជិក , ៤-លោកជំទាវ សោម គីមសួគ៌, ៥-សម្តេចកិត្តិសង្គហបណ្ឌិត ម៉ែន សំអន, ៦-ឯកឧត្តម ហេង វង្សប៊ុនឆាត, ៧-ឯកឧត្តម តាំង ស៊ុនឡាយ, ៨-ឯកឧត្តម កែវ រ៉េមី, ៩-ឯកឧត្តមកិត្តិនីតិកោសលបណ្ឌិត ឱម យិនទៀង, ១០-ឯកឧត្តម ឡាយ សំកុល និង ១១-ឯកឧត្តម ជីវ កេង ។
តាមរយៈដំណើរការការងារបោះឆ្នោតលទ្ធផលទទួលបានដូចតទៅ៖ ១-សម្តេចកិត្តិសង្គហបណ្ឌិត ម៉ែន សំអន ត្រូវបានជ្រើសតាំងជាប្រធាន ក.ជ.ប.ព. អាណត្តិទី៤ ដោយមានសំឡេងគាំទ្រជាឯកច្ឆ័ន្ទចំនួន ១១ លើ ១១ សំឡេង ។ ២-ឯកឧត្តម តុប សំ ត្រូវបានជ្រើសតាំងជា អនុប្រធាន ក.ជ.ប.ព. អាណត្តិទី៤ ដោយមានសំឡេងគាំទ្រជាឯកច្ឆ័ន្ទ។
គួរបញ្ជាក់ថា មុននឹងជាប់ឆ្នោតជាប្រធានក្រុមប្រឹក្សាជាតិប្រឆាំងអំពើពុករលួយអាណត្តិទី៤ សម្តេចកិត្តិសង្គហបណ្ឌិត ម៉ែន សំអន មានតួនាទីជាអនុប្រធានក្រុមប្រឹក្សាជាតិប្រឆាំងអំពើពុករលួយ ។
ក្នុងនាមបេក្ខជនជាប់ឆ្នោតជាប្រធាន និងអនុប្រធានក្រុមប្រឹក្សាជាតិប្រឆាំងអំពើពុករលួយ សម្តេច កិត្តិសង្គហបណ្ឌិត ម៉ែន សំអន បានថ្លែងនូវអំណរគុណហើយសន្យាបំពេញភារកិច្ចដឹកនាំក្រុមប្រឹក្សាជាតិ ប្រឆាំងអំពើពុករលួយឱ្យបានល្អដូចអាណត្តិទី១ ទី២ និងទី៣ កន្លងមក ។
ឯកឧត្តម យិនទៀង ពុទ្ធិរិទ្ធ អនុប្រធានទី១ នៃអង្គភាពប្រឆាំងអំពើពុករលួយ ក្នុងនាមថ្នាក់ដឹកនាំ និងមន្ត្រីរាជការទាំងអស់របស់អង្គភាពប្រឆាំងអំពើពុករលួយ បានអបអរសាទរជូន ក្រុមប្រឹក្សាជាតិប្រឆាំងអំពើពុករលួយ អាណត្តិថ្មី និងជូនជាពិសេស សម្តេចកិត្តិសង្គហបណ្ឌិត ម៉ែន សំអន និងឯកឧត្តម តុប សំ ដែលត្រូវបានជ្រើសតាំងជាប្រធាន និងអនុប្រធានក្រុមប្រឹក្សាជាតិប្រឆាំងអំពើពុករលួយ។
ក្នុងអាណត្តិទី៤ នេះ មានសមាជិកថ្មីចំនួន ២រូប នៃក្រុមប្រឹក្សាជាតិប្រឆាំងអំពើពុករលួយ គឺ ឯកឧត្តម ឡាយ សំកុល ជ្រើសតាំងដោយព្រឹទ្ធសភា និង ឯកឧត្តម ជីវ កេង ជ្រើសតាំងចេញពីគណៈ កម្មាធិការដឹកនាំការកែទម្រង់ប្រព័ន្ធយុត្តិធម៌។
ក្រុមប្រឹក្សាជាតិប្រឆាំងអំពើពុករលួយ អាណត្តិទី៤ និងអង្គប្រជុំដែលមានការចូលរួមពីសំណាក់ អនុប្រធានទី១ អនុប្រធាន ឧបការី នៃអង្គភាពប្រឆាំងអំពើពុករលួយ និងថ្នាក់ដឹកនាំគ្រប់ថ្នាក់គ្រប់ផ្នែក ទាំងអស់ក្នុងអង្គភាព បានសម្តែងនូវការគោរពចំពោះវីរភាពដ៏ខ្ពង់ខ្ពស់របស់វីរកងទ័ពដែលបានការពារ បូរណភាពទឹកដីដ៏អង់អាចក្លាហាន៕
អត្ថបទ៖ វណ្ណលុក
រូប៖ គ្រី សម្បត្តិ
