ក្រសួងបរិស្ថានជំរុញការងារសុក្រឹតកម្មបរិស្ថានកិច្ច និងការអភិវឌ្ឍប្រកបដោយចីរភាពនៅខេត្តកោះកុង
ភ្នំពេញ៖រដ្ឋមន្រ្តីក្រសួងបរិស្ថានបានជំរុញការងារសំខាន់ៗលើវិស័យបរិស្ថាន ក្នុងតំបន់ការពារធម្មជាតិដើម្បីឱ្យមាន សុក្រឹតកម្មបរិស្ថានកិច្ច និងការអភិវឌ្ឍប្រកបដោយចីរភាពនៅខេត្តកោះកុង។
ការជំរុញនេះនៅកិច្ចប្រជុំនេះនៅថ្ងៃទី១៩ ខែសីហា ឆ្នាំ២០២៥ ដឹកនាំដោយឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន។កិច្ចប្រជុំដដែលនេះធ្វើឡើងក្នុងគោលបំណងដើម្បីប្រមូលព័ត៌មានលម្អិតពីបណ្ដាស្រុក-ក្រុងទាំង ៧នៃខេត្តកោះកុងទាក់ទងនឹងសំណើរសុំធ្វើប្លង់រឹងរបស់ប្រជាពលរដ្ឋនៅក្នុងតំបន់ក្រោមវិសាលភាពអនុក្រឹត្យ ២៤៥។
ឯកឧត្តមរដ្ឋមន្រ្តីក្រសួងបរិស្ថានបានឱ្យដឹងថា រដ្ឋបាលខេត្តកោះកុងសម្រេចបានល្អប្រសើរក្នុងការងារប្រមូល និងទុកដាក់សំរាមសំណល់រឹង។ឯកឧត្តមបានលើកទឹកចិត្តឱ្យរដ្ឋបាលខេត្តកោះកុងបន្តសកម្មភាពស្អាតទាំងនេះទៅដល់សហគមន៍កោះស្រឡៅ និងតំបន់ជុំវិញទីនោះដើម្បីប្រែក្លាយទៅជាសហគមន៍អព្យាក្រឹតកាបូន នៅពេលខាងមុខ។លើសពីនេះការលើកកម្ពស់ភាពបៃតងក៏ជាភាពសំខាន់ដ៏ចម្បងមួយទៀតនៃយុទ្ធសាស្រ្តចក្រាវិស័យបរិស្ថាន។
កិច្ចប្រជុំក៏បានពិភាក្សាផងដែរ លើការងារបច្ចេកទេសទាក់ទងនឹងដីក្នុងវិសាលភាពអនុក្រឹត្យលេខ ២៤៥ អនក្រ.បក ដោយផ្តោតសំខាន់លើគោលបំណង ប្រមូលទិន្នន័យ និងឯកសារពាក់ព័ន្ធឱ្យបានច្បាស់លាស់ ដើម្បីរៀបចំរបាយការណ៍ស្នើសុំគោលការណ៍ណែនាំពីសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ ការងារនេះនឹងជួយឱ្យការគ្រប់គ្រងតំបន់ការពារធម្មជាតិមានប្រសិទ្ធភាព និងស្របតាមគោលការណ៍ច្បាប់ និងក្រមបរិស្ថាននិងធនធានធម្មជាតិ។
គួរបញ្ជាក់ថា រដ្ឋបាលខេត្តកោះកុងបានយកចិត្តទុកខ្ពស់ ក្នុងការជំរុញឱ្យយុទ្ធសាស្រ្តចក្រាវិស័យបរិស្ថានសម្រេចបានស្របតាមសសរស្ដម្ភទាំង៣ គឺភាពស្អាត ភាពបៃតង និងចីរភាព ដែលសមស្របតាមគោលដៅយុទ្ធសាស្រ្តរបស់រាជរដ្ឋាភិបាលកម្ពុជា។សកម្មភាពទាំងនេះ បានបង្ហាញពីការប្ដេជ្ញាចិត្តរបស់រដ្ឋបាលខេត្តកោះកុង និងក្រសួងបរិស្ថាន ក្នុងការបន្តការពារ និងអភិរក្សធនធានធម្មជាតិ និងបរិស្ថាន ដើម្បីធានាបាននូវការអភិវឌ្ឍប្រទេសប្រកបដោយចីរភាព និងសុខដុមរមនា៕
ដោយ៖ម៉ាដេប៉ូ
