ភ្នំពេញ៖ នៅក្នុងជំនួបជាមួយមន្រ្តីនិងក្រុមការងារព័ត៌មាននិងសាធារណ​មតិនៃមន្ទីរព័ត៌មានខេត្តសៀមរាប ,​អនុរដ្ឋលេខា​ធិការ​និងអ្នកនាំពាក្យ​ក្រសួងព័ត៌មានឯកឧត្តម ទេព អស្នារិទ្ធ បានទាញអារម្មណ៍អ្នកចូលរួមថា​អ្នកសារព័ត៌មានទាំងអស់​ត្រូវ​ស្គាល់ពីសិទ្ធិ និងករណីយកិច្ចរបស់ខ្លួនឱ្យ​ច្បាស់ដើម្បីកុំឱ្យមានការភាន់ច្រឡំ និងចៀសផុតពីបញ្ហាប្រឈមផ្លូវច្បាប់ ។

នៅសាលប្រជុំមន្ទីរព័ត៌មានខេត្តសៀមរាបកាលពីថ្ងៃទី២២ ខែសីហា ឆ្នាំ២០២៥ឯកឧត្តម ទេព អស្នារិទ្ធ ថ្លែងបន្តថា អ្នកសារព័ត៌មានត្រូវរាយ​ការណ៍ព័ត៌មានរបស់ខ្លួនដោយផ្សារភ្ជាប់ជាមួយសិទ្ធិ កាតព្វកិច្ច និងការ​ទទួល​ខុសត្រូវសង្គម ផ្នែកវិជ្ជាជីវៈ និងផ្លូវច្បាប់។ អ្នកសារព័ត៌មានមាន​សិទ្ធិចុះយកព័ត៌មាន ស្វែងរកប្រភពព័ត៌មាននានាដោយសេរី។ប៉ុន្តែក៏ត្រូវ​មានកាតព្វកិច្ចគោរពសិទ្ធិបុគ្គល និងគោលការណ៍ច្បាប់ជាធរមានផងដែរ ។ក្រៅពីនេះ អ្នកសារព័ត៌មាន មិន​ត្រូវផ្សព្វផ្សាយព័ត៌មាន ដែលបង្កមហន្ត​រាយ​ដល់សណ្ដាប់ធ្នាប់សាធារណៈ ប៉ះពាល់ដល់ស្ថិរភាពក្នុងសង្គម និងសន្តិសុខ​ជាតិឡើយ។ 

អ្នកសារព័ត៌មានត្រូវបែងចែកឱ្យច្បាស់រវាងការផ្ដល់ព័ត៌មាន និងការ​បញ្ចេញមតិផ្ទាល់ខ្លួន ព្រមទាំងធានារាល់ការ បញ្ចេញ​មតិ ឬការរិះគន់ ត្រូវធ្វើឡើងដោយភាពថ្លៃថ្នូរ និងគោរពសិទ្ធិអ្នកដទៃ។នេះជាអ្វីដែល​អ្នកនាំពាក្យ​ដដែលបាន​ក្រើន​រំលឹក​។ ឯកឧត្តមបានបន្ថែមថា ជាងនេះ​ទៀតអ្នកសារព័ត៌មាន ត្រូវមានកាតព្វកិច្ចរាយការណ៍ព័ត៌មាន ដោយមាន​ប្រភព​ច្បាស់លាស់ ត្រូវផ្ទៀងផ្ទាត់ព័ត៌មាន និងចូលរួម ប្រឆាំងដំណឹង​ក្លែងក្លាយ ព័ត៌មានក្លែងបន្លំ ព័ត៌មានបំភ្លៃ និងព័ត៌មាន​ភាន់ច្រឡំ។

តើនឹងមានអ្វីកើតឡើងនៅពេលអ្នកសារព័ត៌មានបានផ្សាយប្រាសចាកការពិត ក្រមសីលធម៌វិជ្ជាជីវៈ បំពានសិទ្ធិ និង​ករណីយកិច្ចរបស់ខ្លួនជា​អ្នកសារព័ត៌មាន? ឯកឧត្តមអនុរដ្ឋលេខាធិការបញ្ជាក់ថា ក្រសួងតែងតែ​ធ្វើការណែនាំ និង​តម្រង់ទិស ដើម្បីឱ្យអនុវត្តដោយគោរពតាម​និយាម​វិជ្ជាជីវៈ និងក្រមសីលធម៌វិញ ហើយបើនៅតែបន្ត​សកម្មភាព​បំពាន​លើវិជ្ជាជីវៈ និងក្រមសីលធម៌ធ្ងន់ធ្ងរ ក្រសួងនឹងឈានទៅសម្រេ​ចលុប​អាជ្ញាបណ្ណ ដែលទាំងនេះជាការ​អនុវត្តនីតិវិធីក្នុង​ក្របខ័ណ្ឌច្បាប់ និងដោយអនុលោមតាមច្បាប់ស្តីពីរបបសារព័ត៌មាន។ 

ក្នុងឱកាសនេះ ក៏ដូចជាសារទៅកាន់អ្នកសារព័ត៌មាន ឯកឧត្តមអ្នកនាំ​ពាក្យក្រសួងព័ត៌មានក៏បាន អំពាវនាវដល់អ្នក​សារព័ត៌មានអាជីព និងមិនមែនអាជីពត្រូវមានទំនួលខុសត្រូវខ្ពស់ ពេលផ្សព្វផ្សាយព័ត៌មាន​របស់ខ្លួន ដើម្បីចូលរួម​ក្នុងការធានាសណ្តាប់ធ្នាប់ ស្ថិរភាព និងសន្តិសុខ​សង្គម ដោយចៀសវាងការបំផ្លើស បំភ្លៃ ឬការកាឡៃព័ត៌​មានប្រាស​ចាក​ពីការពិត។
ឯកឧត្តមគូសបញ្ជាក់ថា ជានិច្ចកាលត្រូវផ្ទៀងផ្ទាត់ព័ត៌មានជាមួយ​ប្រភពព័ត៌មានផ្លូវការ និងមានសំឡេងអ្នកពាក់ព័ន្ធក្នុង​សាច់រឿងដើម្បីធានាគុណភាព និងតុល្យភាពព័ត៌មាន៕

ដោយ៖ង៉ាន ទិត្យ
រូបថត៖ក្រសួងព័ត៌មាន