កំពង់ធំ​៖ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួល​បន្ទុកទីស្តីការគណៈរដ្ឋមន្ត្រី និងជាប្រធាន​ក្រុម​ការងាររាជរដ្ឋាភិបាលចុះ​មូលដ្ឋានខេត្តកំពង់ធំបានអញ្ជើញទៅពិនិត្យវិស័យវារីវប្បកម្ម នៅស្រុកស្ទោង ខេត្ត​កំពង់ធំ។

ស្រុកស្ទោង គឺជាតំបន់វារីវប្បកម្មដ៏សំបូរបែបមួយរបស់ខេត្តកំពង់ធំ ជាពិសេសក្នុងការកែច្នៃត្រីងៀត ដែលផ្គត់ផ្គង់​ទាំងទីផ្សារក្នុងស្រុក និងការនាំចេញ។បច្ចុប្បន្នស្រុកមានគ្រួសារចិញ្ចឹមត្រីចំនួន ១១៥គ្រួសារ និងសិប្បកម្មកែច្នៃ​ត្រីចំនួន ៦៥ កន្លែង។

នៅចុងសប្ដាហ៍នេះឯកឧត្តមឧបនាយករដ្ឋមន្ត្រី វង្សី វិស្សុត និងប្រតិភូ​អមដំណើរ បានអញ្ជើញ​ពិនិត្យក្រុមអ្នកចិញ្ចឹម​ត្រីខ្នាត​មធ្យម និងតាមគ្រួសារ​ដែលចិញ្ចឹមត្រីឆ្ដោ ត្រីរ៉ស់ ត្រីប្រា និងត្រីពោ ព្រមទាំងក៏បានពិនិត្យសិប្បកម្ម​កែច្នៃ​ត្រីងៀត កន្លែងទិញបង្កក ចែកចាយ និងនាំចេញផលនេសាទធម្មជាតិ ព្រមទាំងសិប្បកម្មធ្វើប្រហុក ផ្អក និងពង​ទាប្រៃ នៅឃុំចំណារក្រោម ឃុំសំព្រោជ ឃុំកំពង់ចិនត្បូង និងកំពង់ចិនជើង ស្រុកស្ទោង។

តាមរយៈនៃការជជែកផ្ទាល់ជាមួយអ្នកផលិតនៅតំបន់នេះ បានបង្ហាញថា អ្នកផលិតបានជួបនឹងបញ្ហាជាច្រើន ដូចជា កង្វះពូជត្រី និងចំណីត្រី, បញ្ហាកង្វះដើមទុន, បច្ចេកទេសចិញ្ចឹមមិនទាន់ទំនើប,ប្រព័ន្ធហេដ្ឋារចនា​សម្ព័ន្ធ​​មិនគ្រប់​គ្រាន់ និងការប្រកួតប្រជែងជាមួយត្រីនាំចូលពីប្រទេស​ជិតខាង។

ឯកឧត្តម វង្សី វិស្សុត បានមានប្រសាសន៍ថា តាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ក្រោមការដឹកនាំរបស់​សម្ដេចធិបតី ហ៊ុន ម៉ាណែត រាជរដ្ឋាភិបាលបានផ្ដោតអាទិភាពលើការ​លើកកម្ពស់វិស័យ​កសិកម្ម និងកសិឧស្សាហកម្ម ដើម្បីបង្កើនតម្លៃបន្ថែម និងធ្វើពិពិធកម្មសេដ្ឋកិច្ចមូលដ្ឋាន។

ក្នុងន័យនេះ ក្រុមការងាររដ្ឋបានផ្ដោតលើការសិក្សាបញ្ហាប្រឈម និងដំណោះស្រាយ ដោយរៀបចំផែនការ​អេកូឡូ​ស៊ី​វារីវប្បកម្ម ដែលរួមបញ្ចូលពីការផលិតពូជ ត្រីចិញ្ចឹម ការកែច្នៃ ទីផ្សារ និងការប្រកួតប្រជែង។ គោលបំណង គឺដើម្បី លើកកម្ពស់សមត្ថភាព​ផលិតកម្មក្នុងស្រុក បង្កើតតម្លៃបន្ថែមសេដ្ឋកិច្ច បង្កើតការងារ និងធ្វើឱ្យជីវភាពប្រជាពលរដ្ឋ កាន់តែប្រសើរ។

ឯកឧត្តមក៏បានលើកទឹកចិត្តដល់អ្នកចិញ្ចឹមត្រី អ្នកប្រមូលទិញ និងសិប្បកម្មកែច្នៃ ឱ្យពង្រឹងសមត្ថភាពផលិតភាព និងគុណភាព ដើម្បីឆ្លើយតបទៅតាមស្ដង់ដាទីផ្សារ និងមានសមត្ថភាពប្រកួត​ប្រជែងជាមួយ​ត្រីនាំចូល។ក្រៅពីនេះ ឯកឧត្តមក៏បានណែនាំឱ្យក្រុមការងារ​ចុះមូលដ្ឋាន សហការជាមួយអាជ្ញាធរ និងធនាគារដៃគូ ដើម្បីរៀបចំសហគមន៍ ឬសមាគម​អ្នកផលិត ផ្ដល់បណ្តុះបណ្តាលបច្ចេកទេស និងអាជីវកម្ម, ការផ្ដល់​ហិរញ្ញប្បទាន​សមស្រប និងជួយអភិវឌ្ឍ ប្រព័ន្ធហេដ្ឋារចនាសម្ព័ន្ធ​គាំទ្រ ដើម្បីកាត់បន្ថយថ្លៃដើមផលិតកម្ម និងបង្កើនចំណេញ។

សូមជម្រាបថា ក្នុងការចុះពិនិត្យនោះមានការអមដំណើរពីឯកឧត្តមទេស​រដ្ឋមន្ត្រី ថោង ខុន, ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និង​ឧតុនិយម, ឯកឧត្តម ទេព ភិយ្យោរិន្រ្ទ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាសមាជិកក្រុមប្រឹក្សាភិបាលធនាគារសហគ្រាសធុនតូច និងមធ្យមកម្ពុជា, ឯកឧត្តមបណ្ឌិត កៅ ថាច អគ្គ​នាយក​ធនាគារអភិវឌ្ឍន៍​ជនបទ និងកសិកម្ម (ARDB), ឯកឧត្តមបណ្ឌិត ឈៀង វណ្ណមុនិណ្ឌ នាយកប្រតិបត្តិនៃសហគ្រិន​ខ្មែរ, ឯកឧត្តម នួន ផារ័ត្ន អភិបាលខេត្តកំពង់ធំ ព្រមទាំងតំណាងក្រសួង ស្ថាប័នពាក់ព័ន្ធ និងអាជ្ញាធរមូលដ្ឋានជា​ច្រើនរូប៕

ដោយ៖​ប៊ុន​រដ្ឋា