(កំពង់ចាម)៖ នៅព្រឹកថ្ងៃទី២៨ ខែសីហា ឆ្នាំ២០២៥នេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំក្រុមការងារ អញ្ជើញចុះ​ពិនិត្យ​ទីតាំងមណ្ឌលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នាសម័យ​ប្រឡង ២៨ សីហា ២០២៥ ស្ថិតនៅមណ្ឌល វិទ្យាល័យព្រះសីហនុ ក្រុងកំពង់ចាម ។ តាមរបាយការណ៍របស់មន្ទីរអប់រំយុវជននិងកីឡាខេត្តកំពង់ចាមសម័យប្រលងបាក់ឌុបឆ្នាំ២០២៥មានមណ្ឌលប្រលងសរុបចំនួន១៥មណ្ឌលស្មើនិង៣៨៧បន្ទប់ចំនួនសិស្សដែលត្រូវប្រលងសរុប៩៦៤១នាក់(ស្រី៥៦០៤នាក់)។

ក្នុងឱកាសនោះ ឯកឧត្តមអភិបាលខេត្ត ក៏បានណែនាំបន្ថែមដល់ក្រុមការងារ និង​អ្នកពាក់ព័ន្ធ បន្តអនុវត្តការងារឲ្យបានម៉ឺងម៉ាត់ទៅតាមផែនការដែល​បានដាក់​ចេញ នាពេលកន្លងមក សំដៅធ្វើយ៉ាងណាឲ្យការប្រឡងមធ្យមសិក្សាទុតិយភូមិឆ្នាំនេះ ទទួលបានជោគជ័យ។

ឯកឧត្តម អភិបាលខេត្ត ក៏សូមផ្ញើសារជូនពរដល់បេក្ខជនដែលមានឈ្មោះ​ប្រឡង​ទាំង​អស់ដែលនឹងប្រព្រឹត្តទៅក្នុងរយៈពេល២ថ្ងៃ គឺ ថ្ងៃទី២៨-២៩ ខែសីហា ឆ្នាំ២០២៥ សូមទទួលបានលទ្ធផលល្អទាំងអស់គ្នា ដោយគោរពតាមគោល​ការទាំង៤ នៃការប្រឡង គឺគោលការណ៍ច្បាប់ យុត្តិធម៌ តម្លាភាព និង​លទ្ធផលទទួលយកបាន ពោលគឺ “អ្នកចេះគឺជាប់” ៕

ដោយ ៖ លី ពៅ