ជំនួយរបស់អភិបាលខេត្តកំពង់ធំ ត្រូវបានប្រគល់ជូនបញ្ជាការស្រាលទាំង៩គោលដៅ
កំពង់ធំ៖គ្រឿងឧបភោគ បរិភោគ ភេសជ្ជៈ និងប្រេងឥន្ធនៈ ដែលជាជំនួយឧបត្ថម្ភរបស់ឯកឧត្តម នួន ផារ័ត្ន អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ធំ ត្រូវបានឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំប្រគល់ជូនទីបញ្ជាការស្រាលការពារ ទប់ស្កាត់ និងបង្ក្រាបបទល្មើសធនធានធម្មជាតិចំនួន ៩គោលដៅក្នុងភូមិសាស្ត្រស្រុកសណ្ដាន់ និងស្រុកប្រាសាទបល្ល័ង្ក ។
ក្នុងពិធីប្រគល់ដែលប្រព្រឹត្តទៅកាលពីព្រឹកថ្ងៃទី៣០ ខែសីហា ឆ្នាំ២០២៥ នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ឧត្តមសេនីយ៍ទោ សោម ស៊ុន បានកោតសរសើរដល់កងកម្លាំងចម្រុះនៅទីបញ្ជាការស្រាលទាំង៩ ដែលបានធ្វើសកម្មភាពយ៉ាងសកម្មនៅតំបន់ដែនជម្រកសត្វព្រៃ ព្រៃឡង់ ក្នុងភូមិសាស្ត្រស្រុកសណ្ដាន់ និងតំបន់ដែនជម្រកសត្វព្រៃបឹងពែ ក្នុងភូមិសាស្ត្រស្រុកប្រាសាទបល្ល័ង្ក និងដែនគម្របព្រៃឈើក្នុងស្រុកសណ្ដាន់ និងស្រុកសន្ទុក។ ជាលទ្ធផលរយៈពេលជាងមួយឆ្នាំនៃយុទ្ធនាការការពារ ទប់ស្កាត់ និងបង្ក្រាបបទល្មើសធនធានធម្មជាតិកន្លងទៅនេះ កងកម្លាំងចម្រុះបានរកឃើញផ្ទៃដីដែលក្រុមជនល្មើសលួចកាប់ទន្ទ្រានយកធ្វើជាកម្មសិទ្ធិនាពេលកន្លងទៅមានចំនួន ជិត ៤ ០០០ហិកតា ព្រមទាំងបានគ្រប់គ្រង និងរួមគ្នាដាំស្ដារព្រៃឈើឡើងវិញនៅលើផ្ទៃដីដែលបានដករហូតជាសម្បត្តិរដ្ឋ បានជាង ៥ម៉ឺនដើមរួចមកហើយ ។ ជាមួយគ្នានោះ ក៏បានចាប់ឃាត់ខ្លួនជនប្រព្រឹត្តបទល្មើសមួយចំនួន រួមជាមួយមធ្យោបាយជាវត្ថុតាងបញ្ជូនទៅកាន់តុលាការដើម្បីផ្ដន្ទាទោសតាមច្បាប់។
ឧត្តមសេនីយ៍ទោ សោម ស៊ុន បានលើកទឹកចិត្តឱ្យបន្តរួមគ្នាធ្វើសកម្មភាពដ៏ល្អនេះបន្ថែមទៀត៕
ដោយ៖ ប៊ុន រដ្ឋា
