សៀមរាប​៖រដ្ឋបាលខេត្តសៀមរាបបានឱ្យដឹងថា គិតត្រឹមដើមខែកញ្ញានេះ ខេត្តសៀមរាបនៅតែមាន​ជនភៀសសឹក​ចំនួន ១.៨៩០ គ្រួសារកំពុងបន្ត​ស្នាក់នៅតាមមណ្ឌល​សុវត្ថិភាព​នៅឡើយ ជាមួយការថែទាំ និងការយកចិត្ត​ទុក​ដាក់​ត្រូវបានអនុវត្តដោយអាជ្ញាធរខេត្ត និងមន្ត្រីពាក់ព័ន្ធយ៉ាងជិតស្និទ្ធ។

យោងតាមរបាយការណ៍រដ្ឋបាលខេត្តបង្ហាញថា ក្នុងចំណោម ១.៨៩០ គ្រួសារមានចំនួន ៩៩០ គ្រួសារ ស្មើនឹង ៣.១៦៥ នាក់ កំពុងស្នាក់នៅ​តាមទីតាំងសុវត្ថិភាព ដែលរៀបចំដោយរដ្ឋបាលខេត្ត និងរដ្ឋបាលក្រុង-ស្រុក ខណៈមាន​ចំនួន ៩០០ គ្រួសារ ស្មើនឹង ២.៩៤២ នាក់ កំពុងស្នាក់នៅតាម​ផ្ទះប្រជាពលរដ្ឋ។ទន្ទឹមនេះ​កាលពីថ្ងៃទី១ ខែកញ្ញា​មានជនភៀសសឹកចំនួន ២៣៤ គ្រួសារ ស្មើនឹង ៧៨១ នាក់ បានវិលត្រឡប់ទៅលំនៅឋានដើមវិញ។

សូមបញ្ជាក់ថា គ្រួសារជនភៀសសឹកទាំង ១.៨៩០គ្រួសារនេះ ស្ថិតនៅតំបន់ងាយរងគ្រោះ និងរួមមាន​គ្រួសារ​កងទ័ព​ផងដែរ៕
ដោយ​៖ប៊ុន​រដ្ឋា