សិស្ស និស្សិតកម្ពុជា មានឱកាសសិក្សាបន្តនៅសហរដ្ឋអាមេរិក តាមរយៈការរៀបចំពិព័រណ៍ការសិក្សានៅសហរដ្ឋអាមេរិកឆ្នាំ ២០២៥
សៀមរាប៖ស្ថានទូតអាមេរិកប្រចាំកម្ពុជាបានប្រារព្ធពិព័រណ៍ការសិក្សានៅសហរដ្ឋអាមេរិកឆ្នាំ២០២៥កាលពីព្រឹកថ្ងៃទី៨ ខែកញ្ញា ឆ្នាំ២០២៥ នៅក្រុងសៀមរាប ខេត្តសៀមរាប។ពិព័រណ៍សិក្សានេះរៀបចំជាពីរវគ្គ។វគ្គទី១នៅខេត្តសៀមរាបនៅសណ្ឋាគារសោម៉ាទេវី អង្គរសៀមរាបនិងវគ្គទី២ នៅថ្ងៃទី១០ ខែកញ្ញាសណ្ឋាគារ Hyatt Regency រាជធានីភ្នំពេញ។
អ្នករៀបចំកម្មវិធីបញ្ជាក់ថា ពិព័រណ៍ការសិក្សានៅសហរដ្ឋអាមេរិកឆ្នាំ ២០២៥ (EducationUSA Fair 2025) រៀបចំឡើងដើម្បីផ្សព្វផ្សាយឱកាសសិក្សាសម្រាប់សិស្ស និស្សិត និងអាណាព្យាបាល ដែលមានការចំណាប់អារម្មណ៍ចង់ទៅសិក្សានៅសហរដ្ឋអាមេរិកអាចទាក់ទងដោយផ្ទាល់ ជាមួយតំណាងនៃស្ថាប័នឧត្តមសិក្សាជាង១០ មកពីសហរដ្ឋអាមេរិក។ពិព័រណ៍នេះក៏ដើម្បីផ្តល់ឱកាសស្វែងយល់អំពីអត្ថប្រយោជន៍នៃការសិក្សានៅថ្នាក់ឧត្តមសិក្សានៅអាមេរិក។
លោកស្រីប្រធានស្តីទីផ្នែកកិច្ចការសាធារណៈបានបញ្ជាក់ថា នេះជាឱកាសសម្រាប់សិស្ស និស្សិត និងអាណាព្យាបាល និងអ្នកផ្តល់ប្រឹក្សាអប់រំ មកជួបជុំដើម្បីបានជជែកផ្ទាល់ជាមួយសាកលវិទ្យាល័យ មហាវិទ្យាល័យ ដើម្បបានស្វែងយល់បន្ថែមពីឱកាសក្នុងការសិក្សានៅសហរដ្ឋអាមេរិក។លោកស្រីបន្តថាយើងក៏មានមន្ត្រីផ្នែកកុងស៊ុលនៃស្ថានទូតអាមេរិក នឹងជួបជជែកជាមួយសិស្សនិស្សិត ពីរបៀបដាក់ពាក្យយកទិដ្ឋាការអាមេរិក ដើម្បីឱ្យប្រាកដថាសិស្សនិស្សិតអាចចេះរបៀបដាក់ពាក្យ ឱ្យចេះអនុវត្តនូវច្បាប់អន្តោប្រវេសន៍អាមេរិក ពេលគេទៅដល់អាមេរិក។
លោកស្រីបន្តថា យើងមានការិយាល័យប្រឹក្សានៅទីនេះ ដែលសិស្ស និស្សិតអាចមកទទួលការផ្តល់ប្រឹក្សាដោយមិនមានការរើសអើស និងស្វែងយល់ពីការដាក់ពាក្យទៅអាមេរិក។ យើងក៏មានពិព័រណ៍នេះ នៅថ្ងៃពុធ នៅទីក្រុងភ្នំពេញដែលនឹងមានការនិយាយពីអាហារូបករណ៍ និយាយពីការផ្លាស់ប្តូរទស្សនកិច្ចសិក្សានៅអាមេរិក។
លោកស្រីបញ្ជាក់ថា សហរដ្ឋអាមេរិក ជាកន្លែងគោលដៅមួយដែលឈានមុខគេលើវិស័យអប់រំគ្រប់ជំនាញ។ មុខជំនាញដែលគេចូលចិត្តជាងគេមួយគឺ វិស័យ STEM ដែលនិស្សិតអាចសិក្សាពីវិស័យបច្ចេកវិទ្យា ហើយត្រឡប់មកកម្ពុជាវិញធ្វើការអភិវឌ្ឍប្រទេសរបស់ខ្លួន ជួយសង្គមជាតិ។
លោកស្រីបានបង្ហាញនូវការកត់សម្គាល់ថា ចំនួននិស្សិកម្ពុជា ទៅសិក្សានៅអាមេរិក មានការកើនឡើងពីមួយឆ្នាំទៅមួយឆ្នាំ ចាប់តាំងពីឆ្នាំ២០១២ ។ចំនួននេះកើនឡើង៣ ដង។លោកស្រីសង្ឃឹមថា នៅឆ្នាំនេះដែលជាខួបលើកទី ៧៥ នៃការប្រារព្ធខួបទំនាក់ទំនងការទូតអាមេរិកកម្ពុជា នឹងទទួលបានចំនួននិស្សិតសិក្សានៅអាមេរិក កើនឡើងថែមទៀត ខណៈបច្ចុប្បន្នមានប្រហែលនិស្សិតមួយពាន់នាក់កំពុងសិក្សានៅសហរដ្ឋអាមេរិក។ចំនួននេះ មានការកើនឡើង ៥៥ភាគរយ ក្នុងរយៈពេល ១០ ឆ្នាំចុងក្រោយនេះ។
លោក លី ប៊ុនណា ប្រធានមន្ទីរអប់រំ យុវជននិងកីឡា ខេត្តសៀមរាប មានប្រសាសន៍ថា កម្មវិធីពិព័រណ៍ការសិក្សានៅសហរដ្ឋអាមេរិកឆ្នាំ២០២៥ នេះពិតជាល្អសម្រាប់សិស្ស និស្សិត ។លោកសង្ឃឹមថាពួកគាត់មានសមត្ថភាពគ្រប់គ្រាន់ ក្នុងការទៅបន្តការសិក្សានៅក្រៅប្រទេសបាន ។លោកបន្តថា តាមរយៈពិព័រណ៍នេះនឹងធ្វើឱ្យសិស្ស និងអាណាព្យាបាល បានស្វែងយល់ពីលក្ខខណ្ឌផ្សេងៗសម្រាប់ការជ្រើសរើសឱកាសទៅសិក្សានៅក្រៅប្រទេស៕
ដោយ៖ ប៊ុន រដ្ឋា
