កំពង់ចាម៖ឯកឧត្តម អ៊ុន ចាន់ដា អភិបាលខេត្តនិងជាប្រធានគណៈកម្មាធិការសាខាកាកបាទក្រហមខេត្តកំពង់ចាម​អមដំណើរដោយលោក គីមសួរ ភីរុណ ប្រធានមន្ទីរសុខាភិបាលនៃរដ្ឋបាលខេត្ត លោក អូត ឈាងលី ប្រធានកិត្តិយស​អនុសាខាស្រុកកាលពីថ្ងៃទី១០ ខែកញ្ញា បានអញ្ជើញចុះសួរសុខទុក្ខវីរកងទ័ពពីររូបដែលកំពុងសម្រាកព្យាបាលជំងឺ
នៅនៅមន្ទីរពេទ្យបង្អែកស្រុកបាធាយ  ។

វីរកងទ័ពដែលមានជំងឺគឺ នាយចំណង់ យឹង យីង  អាយុ៦០ឆ្នាំរស់នៅឃុំបាធាយនិង លោកព្រឹន្ទបាលឯក ដួង ចិន្ត្រា អាយុ ៤៧ ឆ្នាំ រស់នៅឃុំជាលា ស្រុកបាធាយ ខេត្តកំពង់ចាម ជាវីរកងទ័ពជួរមុខទិសប្រាសាទតាក្របី ។
ដោយមានបញ្ហាសុខភាពវីរយុទ្ធជនជួរមុខទាំងពីររូប ត្រូវបានបញ្ជាការអង្គភាពអនុញ្ញាតច្បាប់វិលមកមូលដ្ឋាន ហើយ​បានចូលសម្រាកព្យាបាលជំងឺកាលពីថ្ងៃទី៨  ខែកញ្ញា ដោយសេវាពិនិត្យ ព្យាបាល ជាបន្ទុកទាំងស្រុងរបស់​មន្ទីរពេទ្យ​បង្អែកស្រុក ។

ក្នុងឱកាសនេះឯកឧត្តម អ៊ុន ចាន់ដា បានកោតសរសើរចំពោះវីរភាពដ៏អង់អាចក្លាហានរបស់វីរកងទ័ពទាំងពីររូប ដែលបានលះបង់គ្រួសារប្រពន្ធ កូន ទៅបំពេញបេសកកម្មការពារជាតិ​ការពារបូរណភាពទឹកដី  ប្រឆាំងសត្រូវ​ឈ្លានពាន។ឯកឧត្តមជូនពរឱ្យឆាប់ជាសះស្បើយ។

ឯកឧត្តមក៏បានជូននូវអំណោយមាន អង្ករ   គ្រឿងឧបភោគ បរិភោគ ត្រីខ ផ្លែឈើស្រស់ និង ថវិកាចំនួនមួយលានរៀលដល់វីរកងទ័ពម្នាក់៕
ដោយ៖លី ពៅ