ភ្នំពេញ៖សហជីពតំណាងកម្មកររាប់ម៉ឺននាក់នៅកម្ពុជាបាននិយាយថា ការដំឡើងប្រាក់ឈ្នួល ២១០ដុល្លារអាម៉េរិក សម្រាប់ឆ្នាំ២០២៦ ដល់កម្មករនិយោជិតផ្នែកវាយនភណ្ឌ កាត់ដេរ ស្បែកជើង និងផលិតផលិតផលធ្វើដំណើរនិងការបូប គឺអាចរក្សាវិនិយោគិនចាស់ និងទាក់ទាញវិនិយោគិនថ្មី ហើយមានការប្រកួតប្រជែងក្នុងតំបន់ទៀតផង។

ការបញ្ជាក់នេះបន្ទាប់ពីរាជរដ្ឋាភិបាលបានសម្រេចដំឡើងប្រាក់ឈ្នួលអប្បបរមាឆ្នាំ២០២៦ ជូនកម្មករនិយោជិត​ផ្នែក​វាយនភណ្ឌ កាត់ដេរ ស្បែកជើង និងផលិតផលិតផលធ្វើដំណើរនិងកាបូបចំនួន ២១០ដុល្លារអាម៉េរិក កាលពីថ្ងៃទី១៧ ខែកញ្ញា។

លោក គឹម ចាន់សំណាង ប្រធានសហភាពសិទ្ធិកម្មករកម្ពុជា បាននិយាយថា ការដំឡើងប្រាក់ខែបន្ថែមនេះ អ្នកវិនិយោគ​អាចទទួលយកបាន ដែលធ្វើឱ្យមានលំនឹង នៃការវិនិយោគនៅកម្ពុជា ហើយអាចនឹងទទួលបានអ្នកវិនិយោគថ្មីៗ ដែល​នឹងបង្កើតការងារបន្ថែមជាច្រើនកន្លែងជូនដល់ប្រជាពលរដ្ឋ និងពលករខ្មែរទើបត្រឡប់មកពីប្រទេសថៃ។
លោកបញ្ជាក់ថា «អ្នកវិនិយោគបានស្វែងយល់ពីផលប៉ះពាល់ផ្សេងៗ ពាក់ព័ន្ធស្ថានភាពសេដ្ឋកិច្ច និងវិស័យដឹកជញ្ជូន ប៉ុន្តែយ៉ាងណាក៏ដោយរាជរដ្ឋាភិបាលក៏បានបង្កលក្ខណៈងាយស្រួល ដើម្បីអ្នកវិនិយោគអាចទទួលបានផល​ចំណេញក្នុង​កម្រិតមួយទទួលយកបាន»។

ចំណែកលោក សំ សឿន ប្រធានសហភាពពលកម្មជាតិកម្ពុជា បានបញ្ជាក់ថា ចំពោះការដំឡើងប្រាក់ឈ្នួលរបស់កម្ពុជា ធ្វើឡើងក្នុងកម្រិតមួយសមរម្យ ទទួលយកបាន និងគ្មានការគាបសង្កត់ណាមួយឡើយ ដែលនេះជាផលល្អសម្រាប់ទាក់​ទាញអ្នកវិនិយោគ ថ្មីបន្ថែមសម្រាប់ឆ្នាំបន្តបន្ទាប់ទៀត។
លោកបញ្ជាក់បន្ថែម​ថា៖«ខ្ញុំនៅតែមើលឃើញថា កម្ពុជាជាប្រទេសមានការប្រកួតប្រជែងមួយ ដ៏ល្អសម្រាប់បណ្តាល​ប្រទេសក្នុងតំបន់អាស៊ាន ហើយការកំណត់ប្រាក់ឈ្នួលរបស់កម្ពុជាមានការរៀបចំធ្វើឡើង ជារៀងរាល់ឆ្នាំដោយ​ទៀងទាត់ហើយ។ ការដំឡើងប្រាក់ឈ្នួលគឺភាគីនិយោជិត និងភាគីនិយោជក អាចទទួលយកបាន ធ្វើការជាមួយគ្នា​បានរលូន ហើយមានស្ថេរភាពទៀតផង»។

ដូចគ្នានេះដែរ ឲលោក ហ្វា សាលី ប្រធានសម្ព័ន្ធសហជីពជាតិលើកឡើងថា កម្ពុជាមានភាពចាស់ទុំក្នុងការ​ប្រជុំពិភាក្សា​កំណត់ប្រាក់ឈ្នួលអប្បបរមា ហើយពោរពេញទៅដោយភាពរួសរាយរាក់ទាក់ ក្នុងការទំនាក់ទំនងទាក់ទាញអ្នក​វិនិយោគ​គិនថ្មីៗ។ ការដំឡើង ២ដុល្លារ ក្នុងស្ថានភាពបច្ចុប្បន្ន ពិតជាសមរម្យអាចទទួលយកបានទាំងអស់គ្នា ក៏ដូចជាបង្កើតភាព​ទាក់ទាញវិនិយោគផងដែរ។

លោកថ្លែងថា៖«ការបង្កើតការងារ បង្កើនការវិនិយោគឱ្យបានកាន់តែច្រើន សម្រាប់ប្រទេសកម្ពុជាយើង គឺបានផ្តល់ឱកាស​ទៅដល់បងប្អូនពលករ ពលការិនី ដែលគាត់កំពុងតែត្រូវការការងារជាង៦០ម៉ឺនកន្លែងឯណោះ។ អញ្ចឹងហើយប្រាក់​ឈ្នួលប៉ុណ្ណេះ គឺយើងអាចទាក់ទាញការវិនិយោគមកកាន់តែច្រើន»៕

ដោយ៖ង៉ាន់ ទិត្យ