(កំពង់ឆ្នាំង)៖ រយៈពេល នៃពិធីបុណ្យកាន់បិណ្ឌ និងភ្ជុំបិណ្ឌ ឆ្នាំនេះ ខេត្តកំពង់ឆ្នាំង មានភ្ញៀវទេសចរណ៍ជាតិ និងអន្តរជាតិ ចំនួនសរុប ១៣៧.៦៤១នាក់ បានមកលេង​នៅតាមតំបន់ទេសចរណ៍ និងរមណីយដ្ឋាននានា ក្នុងខេត្តកំពង់ឆ្នាំង ។ នេះបើតាម​ការ​បញ្ជាក់ឲ្យដឹង ពីលោក សេង សាលី ប្រធានមន្ទីរទេសចរណ៍ ខេត្តកំពង់ឆ្នាំង នៅថ្ងៃទី២៤ ខែកញ្ញា ឆ្នាំ២០២៥នេះ ។ ចំពោះភ្ញៀវទេសចរណ៍ជាតិមាន​ចំនួន ១៣៧.៦៤១នាក់ និង ភ្ញៀវទេសចរណ៍បរទេសមានចំនួន១៩២នាក់ ។

លោក សេង សាលី ប​ញ្ជាក់បន្ថែមថា នៅក្នុងខេត្តកំពង់ឆ្នាំង មានតំបន់ទេសចរណ៍​បែប​ធម្មជាតិ និង តំបន់ទេសចរណ៍ប្រវត្តិសាស្ត្រជាច្រើន ដូចជា ៖ នៅក្នុងក្រុង​កំពង់ឆ្នាំង មាន សួនសម្តេចចៅហ្វាវាំង(សួនស៊ីម៉ាក់) សួនច្បារវិមានឯករាជ្យ និងសួនទឹកមុខសាលាខេត្ត និងទំនប់ទួលអំពិល។

នៅស្រុកសាមគ្គីមានជ័យ មានវត្តភ្នំព្រះធាតុ / ស្រុកកំពង់ត្រឡាចមានការជិះរទេះ​គោ​នៅភូមិអ្នកតាហាង ទៅវត្តបុរាណពោធិ៍រុក្ខារាម(ហៅវត្តកំពង់ត្រឡាចលើ), វត្តត្រឡែង​កែង ,និងទំនប់កប់សេះ ។ នៅស្រុករលាប្អៀរមាន ភូមិព្រែកសាលា , ទស្សនាចម្លាក់ស្មូនដីនៅភូមិអណ្តូងឬស្សី, សួនឈ្វាំង, និងទំនប់សាងស្នេហ៍ ។ ស្រុកទឹកផុសមាន សហគមន៍ទេសចរណ៍ធម្មជាតិទឹកធ្លាក់ស្រែអំពិល , សហគមន៍​ទេសចរណ៍ធម្មជាតិទឹកធ្លាក់ថ្មក្រាល , សហគមន៍ទេសចរណ៍ធម្មជាតិទឹកធ្លាក់​អន្លង់​ស្វាយ, និងទំនប់ទឹកគង្គា ។ ស្រុកបរិបូរណ៍មាន ខ្សាច់ស , ទនប់២ឧសភា , ទំនប់អា​ចាំង។ ស្រុកកំពង់លែង មាន ច្រកទំនប់បាក់ដាវ , ទឹកជ្រោះអូរដារសិលាទូកមាស , ចំណុចលំហាច. ស្រុកជលគិរីមាន ទំនប់តាកុយ , វត្តសុវណ្ណគីរី ។

ក្រៅពីតំបន់រមណីដ្ឋានទេសចណ៍ ដែលបានរៀបរាប់ខាងលើ នៅមានទីកន្លែង​សម្រាប់​ភ្ញៀវទេសចរណ៍ជាតិ និងអន្តជាតិមកលេងកំសាន្តជាច្រើនទៀត ។ ក្រោម​ការណែនាំ ពីឯឧត្ត ស៊ុន សុវណ្ណារិទ្ធិ អភិបាលខេត្តកំពង់ឆ្នាំង អាជ្ញាធរ មន្ទីរពាក់​ព័ន្ធបានរៀបចំ សណ្តាប់ធ្នាប់ សន្តិសុខ សុវត្ថិភាពបានយ៉ាងល្អប្រសើរ ជាពិសេស​មិនអោយមានការដំឡើងថ្លៃផ្ទះសំណាក់ សណ្ឋាគារ ឬ ម្ហូបអាហារអ្វីឡើយ បានន័យ​ថាថ្ងៃបុណ្យ និង ថ្ងៃធម្មតានៅរក្សាតម្លៃដដែលមិនអោយមានការប្រែប្រួល នាំអោយ​មានការថ្នាំងថ្នាក់ពីភ្ញៀវដែលបានមកលេងនៅខេត្តកំពង់ឆ្នាំង ៕

សុខ គឹមសៀន