(ចន្ទបុរី ថៃ)៖ ឯកឧត្តម ឡាំ ជា រដ្ឋមន្ត្រី ទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈប្រតិភូមកពីភាគីកម្ពុជា និងឯកឧត្តម ប្រាសាស ប្រាសាសវិនិច្ឆ័យ (Prasas Prasasvinitchai) ទីប្រឹក្សាក្រសួងការបរទេស ទទួលបន្ទុកកិច្ចការព្រំដែន និងជាប្រធានគណៈប្រតិភូមកពីភាគីថៃ អញ្ជើញដឹកនាំ ប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) នាវេលាថ្ងៃត្រង់ ថ្ងៃទី២១ ខែតុលា ឆ្នាំ២០២៥នេះ នៅក្នុងខេត្តចន្ទបុរី ព្រះរាជាណាចក្រថៃ ដើម្បីពិនិត្យ និងពិភាក្សាលើរបៀបវារៈសំខាន់ៗមួយចំនួន ដោយមានសមាសភាពប្រតិភូ នៃបណ្តាខេត្តជាប់ព្រំដែនកម្ពុជា-ថៃ ចូលរួមផងដែរ។

របៀបវារៈសំខាន់ៗ នៅក្នុងកិច្ចប្រជុំ JBC នៅថ្ងៃនេះរួមមាន៖

ទី១ ពិនិត្យ និងតាមដានវឌ្ឍនភាព កិច្ចប្រជុំJBC លើកទី៦ នៅរាជធានីភ្នំពេញ កាលពីថ្ងៃទី១៤ និងថ្ងៃទី១៥ ខែមិថុនា ឆ្នាំ២០២៥។

ទី២ របៀបវារៈជាអាទិភាពដែលប្រគល់ជូនដោយ គណៈកម្មាធិការព្រំដែនទូទៅ (GBC) កម្ពុជាថៃ ក្នុងកិច្ចប្រជុំពិសេសលើកទី១ នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ជាពិសេសករណីភូមិជោគជ័យ។

សូមជម្រាបថា ក្នុងនោះក៏មានរបៀបវារៈផ្សេងៗទៀត ពាក់ព័ន្ធនឹងកិច្ចការព្រំដែនផងដែរ ៕

រូបថត៖ ហុង ម៉េងឡុង & ខឹម សុវណ្ណារ៉ា / AKP