កំពង់ស្ពឺ៖ក្នុងពិធីសំណេះសំណាល និងបំពាក់មេដាយការងារជូនលោកគ្រូ អ្នកគ្រូចំនួន១.៣១៤នាក់ ក្នុងក្របខ័ណ្ឌ​មន្ទីរអប់រំ យុវជននិងកីឡាខេត្តកំពង់ស្ពឺ នៅថ្ងៃទី២៣ ខែតុលា ឆ្នាំ២០២៥ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានជំរុញដល់​អាជ្ញាធរក្រុង ស្រុក ខេត្ត ពិសេសមន្ទីរអប់រំ យុវជននិងកីឡា ឱ្យបង្កើនការផ្សព្វផ្សាយឱ្យបានទូលំទូលាយ​ទៅដល់​មូលដ្ឋាន ​និងសហគមន៍ ដើម្បីកៀរគរ​កុមារដែលគ្រប់អាយុចូលរៀន ឱ្យចូលរៀនគ្រប់ៗគ្នា។

ឯកឧត្តមឧបនាយករដ្ឋមន្ត្រី ហ៊ុន ម៉ានី បានសង្កត់ធ្ងន់ថា កុមារដែលគ្រប់អាយុចូលរៀនត្រូវតែបញ្ជូនឱ្យចូលសាលា ដើម្បី​ទទួលបានការអប់រំ ។សំដៅទៅលើកុមារដែលជាកូនពលករដែលទើបវិលត្រឡប់មកវិញ​ហើយគ្រប់អាយុចូលរៀន ឯកឧត្តមបានបញ្ជាក់បន្ថែមថា អាជ្ញាធរ មន្ទីរអប់រំ​ត្រូវសម្របសម្រួលគ្រប់នីតិវីធីដើម្បីធ្វើយ៉ាងណាឱ្យ​កុមារទាំងនេះបានចូលរៀនគ្រប់ៗគ្នា។

ជាមួយនឹងមេដាយដែលនឹងបំពាក់ជូនលោកគ្រូ អ្នកគ្រូ ,ឯកឧត្តម ហ៊ុន ម៉ានី បានលើកសរសើរថា​គ្រូបង្រៀនគឺជាបេះ​ដូង​នៃ​ការអប់រំ ជាអ្នកធានាឱ្យបាននូវគុណភាពអប់រំ ។ជាអ្នកតម្រង់ទិសកុមារ និងយុវជន ឱ្យក្លាយជាពលរដ្ឋ​ មានសមត្ថភាពគ្រប់គ្រាន់ ដើម្បីចូលរួមយ៉ាងសកម្មក្នុងការអភិវឌ្ឍប្រទេស ស្របតាមយុទ្ធសាស្ត្រចតុកោណ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ។

ខណៈសិស្សប្រឡងសញ្ញាបត្រមធ្យមសិក្សាទុតិយភូមិជាប់និទ្ទេសAកាន់តែច្រើននោះ ឯកឧត្តម​ឧបនាយករដ្ឋមន្ត្រី​បាន​គូសរំលេចថា ជាការលះបង់ដ៏ធំធេងនិងមិនអាចកាត់ថ្លៃបានរបស់លោកគ្រូ អ្នកគ្រូ ៕
ដោយ៖ ម៉ុន សំអាត