ប្រវត្តិឈ្មោះតំបន់អេកូទេសចរណ៍ ចាហ៊ូ (Jahoo) ខេត្ត មណ្ឌលគិរី កើតចេញពីសត្វទោចថ្ពាល់លឿងញីមួយក្បាលរបស់ជនជាតិភាគតិច
(ភ្នំពេញ)៖តាមរយៈកូនសត្វទោចថ្ពាល់លឿងញីមួយក្បាល ជាសត្វគួរឱ្យស្រឡាញ់ ដែលអ្នកស្រុកបានឃើញស្ទើររៀងរាល់ថ្ងៃ ដែលវាមកលេងពេលពួកគាត់មកធ្វើចំការនោះ ពេលនេះតំបន់មួយកន្លែងនេះត្រូវបានគេដាក់ឈ្មោះឱ្យតាមកូនសត្វទោច ចាហ៊ូ(Jahoo)ដែលអ្នកស្រុកដាក់ឈ្មោះឱ្យវា ហើយមានភាពល្បីល្បាញរហូតមកដល់សព្វថ្ងៃ ។
គួរបញ្ជាក់ថា តំបន់អេកូទេសចរណ៍ ចាហ៊ូ(Jahoo)ស្ថិតនៅដែនជម្រកសត្វព្រៃកែវសីមា ខេត្ត មណ្ឌលគិរី គឺជាទីកន្លែងដ៏ល្បីល្បាញ ក្នុងចំណោម ក្រុម អ្នកទេសចរ កម្សាន្ត សត្វទោច ថ្ពាល់លឿង ដែលជាសត្វកម្របំផុតមួយលើពិភពលោក។
តំបន់អេកូទេសចរណ៍ សត្វទោច ថ្ពាល់លឿងមួយកន្លែងនេះត្រូវបានអង្គការ WCS បានផ្តួចផ្តើមសម្របសម្រួលរៀបចំបង្កើតសហគមន៍អេកូទេសចរណ៍អណ្តូងក្រឡឹង ហៅថា «ចាហ៊ូ» Jahoo នៅឆ្នាំ២០១៣ ហើយចាប់ផ្តើមអនុវត្តគម្រោងនៅឆ្នាំ២០១៤ ដើម្បីទាក់ទាញភ្ញៀវជាតិ និងអន្តរជាតិមកទស្សនាកម្សាន្ត តាមរយៈការដើរក្នុងព្រៃ និងលើកកម្ពស់ការយល់ដឹងនៃការអភិរក្សព្រៃឈើ និងសត្វព្រៃ។
លោក សុខ បញ្ញាវុធ អ្នកស្រាវជ្រាវ នៅ ជំរំ ចាហ៊ូ បានប្រាប់ឱ្យដឹងថា៖ចាហ៊ូតាមពិតជាឈ្មោះកូនទោចមួយក្បាលដែលអ្នកស្រុកដាក់ឱ្យវាកាលអំឡុងមុនពេលសហគមន៍អេកូទេសចរណ៍អណ្តូងក្រឡឹងបង្កើតឡើង។កាលនោះកូនសត្វទោចញីមួយក្បាលនេះ វាបានមកលេងជាមួយអ្នកស្រុកធ្វើចំការនៅតំបន់ក្បែរទីកន្លែងជំរំចាហ៊ូ ដែលជាទីកន្លែងសត្វទោចថ្ពាល់លឿងរស់នៅ។
លោក សុខ បញ្ញាវុធ បានប្រាប់ឱ្យដឹងដែរថា ”ជនជាតិភាគតិចបានចាត់ទុកសត្វទោចថ្ពាល់លឿង ជាសត្វសក្តិសិទ្ធរបស់ពួកគាត់។ពេលកូនសត្វទោចតែងមកលេងពួកគាត់ជាញឹកញាប់ពេលធ្វើចំការនោះទើបពួកគាត់ស្រឡាញ់សត្វទោចញីថ្ពាល់លឿងនេះខ្លាំងណាស់ ហេតុនេះនៅពេលគេបង្កើតជំរំសត្វទោចនេះឡើងទើបគេដាក់ឈ្មោះឱ្យចាហ៊ូ ពោលគឺគេយកឈ្មោះតាមកូនសត្វទោចញីជាទីស្រឡាញ់របស់បងប្អូនជនជាតិភាគតិចនេះតែម្តង។
អ្នកនាង នេត្រ បូរមី អ្នកគ្រប់គ្រង តំបន់អេកូទេសចរណ៍ជំរំ ចាហ៊ូ បញ្ជាក់ប្រាប់ថា៖ចាហ៊ូ ជាតំបន់ទេសចរណ៍សត្វទោចថ្ពាល់លឿង ដ៏សំខាន់មិនមានកន្លែងដទៃទៀតក្នុងប្រទេសកម្ពុជា។អ្នកទេសចរបរទេសភាគច្រើនដែលចូលមកកម្សាន្តទីកន្លែងនេះបំណងរបស់ពួកគេគឺទស្សនាសត្វទោចថ្ពាល់លឿង ។
ស្រ្តីរូបនេះបានឱ្យដឹងបន្ថែមថា ក្នុងជំរំចាហ៊ូមានកន្លែងកម្សាន្តសំខាន់ៗចំនួន៥ទីតាំង។ជាទូទៅភ្ញៀវទេសចរដែលមកកម្សាន្តទីកន្លែងនេះត្រូវមកដល់ជំរំចាហ៊ូមក៤កន្លះទៅ៥ព្រឹក ដើម្បីធ្វើដំណើរប្រមាណ ២ទៅ៣ គីឡូម៉ែត្រ ដោយថ្មើរជើងទៀត ទើបអាចទៅមើលសត្វទោចថ្ពាល់លឿងទាំងនេះបាន ។ ក្រៅអំពីទស្សនាសត្វទោចថ្ពាល់លឿង នៅពេលថ្ងៃអ្នកទេសចរ ក៏អាចទស្សនាពពួកសត្វស្វា សត្វស្លាប និងសត្វដទៃទៀត។ក្រៅពីនេះអ្នកទេសចរអាចទស្សនាទឺកធ្លាក់ មើលដើមឈើធំៗក្នុងព្រៃ មើលជីវភាពរស់នៅរបស់បងប្អូនជនជាតិភាគតិច និងមើលការដើរដងជ័រទឹករបស់បងប្អូនសហគមន៍។
អ្នកគ្រប់គ្រង តំបន់អេកូទេសចរណ៍ជំរំចាហ៊ូ រូបនេះបានប្រាប់ថា បើគិត រហូតមកដល់ត្រឹមពេលនេះជំរំចាហ៊ូ បានទទួលភ្ញៀវទេសចរជាតិ និងអន្តរជាតិសរុបចំនួន ២ ៧៥១ នាក់ និងបានបង្កើតប្រាក់ចំណូលសរុបប្រហែល ៤១២ ០៣៧ ដុល្លារអាមេរិក។
ឯកឧត្តម ខ្វៃ អាទិត្យា មន្រ្តីអ្នកនាំពាក្យក្រសួងបរិស្ថានបានថ្លែងថាក្រសួងបរិស្ថាននឹងរៀបចំរបៀងទេសចរណ៍ធម្មជាតិតាមសហគមន៍នៅខេត្តមណ្ឌលគិរីនេះ ជាផ្នែកមួយដែលធានា និងជួយលើកស្ទួយដល់ជីវភាព ប្រជាសហគមន៍ឱ្យទទួលបានប្រាក់ចំណូលបន្ថែម ពីសេវាអេកូទេសចរណ៍ធម្មជាតិ ។
មន្រ្តីអ្នកនាំពាក្យក្រសួងបរិស្ថានបញ្ជាក់ថាតំបន់អេកូទេសចរណ៍ជំរំចាហ៊ូ ជាកន្លែងទេសចរណ៍សត្វទោចថ្ពាល់លឿង ជាសត្វដ៏កម្រដែលអ្នកទេសចរតែងចូលកម្សាន្ត និងក៏ជាតំបន់ របៀងទេសចរណ៍ធម្មជាតិដែលក្រសួងនឹងរៀបចំឡើងសម្រាប់ធានា និងជួយលើកស្ទួយដល់ជីវភាព ប្រជាសហគមន៍ឱ្យទទួលបានប្រាក់ចំណូលបន្ថែម ពីសេវាអេកូទេសចរណ៍ធម្មជាតិ៕
ដោយ ៖ ម៉ាដេប៉ូ
