(ភ្នំពេញ)៖ មន្រ្តីជាន់ខ្ពស់ ក្រសួងប្រៃសណីយ៍ ឯកឧត្តម ខាយ ឃុនហេង បានមានប្រសាសន៍ថា ក្រោមការ​យក​ចិត្តទុកដាក់របស់ឯកឧត្តមរដ្ឋមន្ត្រី ជា វ៉ាន់ដេត ក្រសួង​បានចូលរួមសកម្មភាពប្រយុទ្ធប្រឆាំងគ្រឿងញៀន។ ឯកឧត្តម បានផ្តាំផ្ញើឱ្យបណ្តាប្រតិបត្តិករទូរសព្ទចល័ត​បន្តសកម្មភាពផ្សព្វផ្សាយអប់រំសារពាក់ព័ន្ធនឹងបញ្ហាអេដស៍និងគ្រឿងញៀនបន្តទៀត ។

ចំពោះប្រតិបត្តិករប្រៃសណីយ៍ សូមបន្តចូលរួមយ៉ាង​សកម្ម​​បំផុត​ក្នុងការទប់ស្កាត់ការចរាចរគ្រឿងញៀន ព្រមទាំងគោរពតាមការអនុវត្តតាមបទបញ្ជា របស់​រាជរដ្ឋាភិបាល លេខ ០២ បប ចុះថ្ងៃទី២១ ខែតុលា ឆ្នាំ២០២៥ ស្តីពីការដាក់ចេញវិធានការហាមឃាត់ការ​នាំចូល ការចែកចាយ ការលក់ ការផ្សាយពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុក​ឧបករណ៍អេឡិចត្រូនិកនិងសារធាតុគីមីសម្រាប់ជក់ និងស៊ីស្សា។ ចំពោះប្រតិបត្តិករផ្តល់សេវាប្រៃសណីយ៍ ត្រូវពង្រឹងការត្រួតពិនិត្យទប់ស្កាត់ការចរាចរបញ្ញើហាមឃាត់ ជាពិសេសបញ្ញើដែលសង្ស័យបង្កប់សារធាតុគីមី ឬថ្នាំញៀន និង ឧបករណ៍ សម្រាប់ជក់ ប្រើប្រាស់ សារធាតុខុសច្បាប់ទាំងនេះ ។

ប្រសាសន៍ ឯកឧត្តម ខាយ ឃុនហេង រដ្ឋលេខាធិការ និងជាប្រធានគណៈកម្មាធិការប្រយុទ្ធនឹងជំងឺអេដស៍ និងប្រយុទ្ធប្រឆាំងគ្រឿងញៀនខុសច្បាប់ក្រសួងប្រៃសណីយ៍និងទូរគមនាគមន៍ កាលពីថ្ងៃទី១០ ខែវិច្ឆិកា ឆ្នាំ២០២៥ ក្នុងឱកាសអញ្ជើញផ្សព្វផ្សាយបទបញ្ជា របស់រាជរដ្ឋាភិបាល លេខ ០២ បប ចុះថ្ងៃទី២១ ខែ​តុលា ឆ្នាំ២០២៥ ស្តីពីការដាក់ចេញវិធានការ​ហាម​ឃាត់ការនាំចូល ការចែកចាយ ការលក់ ការផ្សាយ​ពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុកឧបករណ៍អេឡិចត្រូនិក និងសារធាតុគីមី​សម្រាប់ជក់ និង ស៊ីស្សា ជូនមន្ត្រីរាជការ អង្គភាព និង​ក្រុម​ហ៊ុនប្រតិបត្តិករប្រៃសណីយ៍និងទូរគមនាគមន៍ នៅទី​ស្តីការក្រសួងប្រៃសណីយ៍និងទូរគមនាគមន៍។

ឯកឧត្តម ខាយ ឃុនហេង ក៏បានផ្តល់កិត្តិយសប្រគល់​បណ្ណសរសើរ និងលិខិតសរសើរ ជូនមន្ត្រីរាជការ អង្គភាព និងក្រុមហ៊ុនប្រតិបត្តិករប្រៃសណីយ៍​និង​ទូរគមនាគមន៍ ដែលបានចូលរួមក្នុងសកម្មភាពប្រយុទ្ធ​ប្រឆាំងគ្រឿងញៀនឆ្នាំ២០២៤ កន្លងមក និងសង្ឃឹមថា បានទទួលការកោតសរសើរពីអាជ្ញាធរគ្រឿងញៀនក្នុងសកម្មភាពប្រយុទ្ធប្រឆាំងគ្រឿងញៀនឆ្នាំ២០២៥ ខាងមុខ ៕

ដោយ ៖ ង៉ាន់ ទិត្យ