ឯកឧត្តម ឌិត ទីណា អញ្ជើញសួរសុខទុក្ខ និងចូលរួមរៀបចំពិធីបុណ្យនិងបូជាសព លោក ឌី ណៃ ដែលបានស្លាប់ដោយការបាញ់ប្រហារពីកងទ័ពថៃ
(បន្ទាយមានជ័យ)៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ កាលពីថ្ងៃទី១៣ ខែវិច្ឆិកា ឆ្នាំ២០២៥ បានសួរសុខទុក្ខប្រជាជនខ្មែរជាជនស៊ីវិលស្លូតត្រង់ ដែលរងគ្រោះដោយសារការបាញ់ប្រហារដោយកងកម្លាំងថៃ នៅភូមិព្រៃចាន់ភូមិអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី១២ ខែវិច្ឆិកា ឆ្នាំ២០២៥។
យើងទាំងអស់គ្នាថ្កោលទោសយ៉ាងដាច់អហង្ការចំពោះការបាញ់ប្រហាររបស់កងកម្លាំងថៃមកលើប្រជាជនខ្មែរ ហើយបន្តគាំទ្រនូវរាល់វិធានការ និងការសម្រេចចិត្តប្រកបដោយភាពចាស់ទុំរបស់រាជរដ្ឋាភិបាលកម្ពុជា ដោះស្រាយជម្លោះព្រំដែនដោយសន្តិវិធី ក្នុងគោលបំណងស្វែងរកសុខសន្តិភាពជូនប្រជាជន។
តមក ឯកឧត្តម ឌិត ទីណា ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញអមដំណើរគណៈប្រតិភូរដ្ឋសភា ដឹកនាំដោយ ឯកឧត្តម កែប ជុតិមា ប្រធានគណៈកម្មាធិការទី៤ នៃរដ្ឋសភា ចុះសួរសុខទុក្ខ និងនាំយកជំនួយជូនពុកម៉ែបងប្អូនចំនួន ២៥៧ គ្រួសារ ដែលបានភៀសខ្លួនមកទីតាំងសុវត្ថិភាព បន្ទាប់ពីកងកម្លាំងថៃធ្វើការបាញ់ប្រហារលើប្រជាជនខ្មែរជាជនស៊ីវិលស្លូតត្រង់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ។
នារសៀលថ្ងៃដដែល ឯកឧត្តម ប្រធានក្រុមការងារ ក៏បានអញ្ជើញបន្តដំណើរជាមួយ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និង ឯកឧត្តម អ៊ុ រាត្រី គណៈអភិបាលខេត្ត ចូលរួមរៀបចំពិធីបុណ្យ និងបូជាសព លោក ឌី ណៃ ដែលបានស្លាប់បន្ទាប់ពីរងការបាញ់ប្រហារដោយកងកម្លាំងថៃនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ ការបាញ់ប្រហារប្រជាជនខ្មែរជាជនស៊ីវិលស្លូតត្រង់ឱ្យស្លាប់និងរងរបួស គឺជាឧក្រិដ្ឋកម្មដ៏ធ្ងន់ធ្ងរបំផុត ហើយផ្ទុយទៅនឹងស្មារតី នៃការឯកភាពគ្នាកន្លងមកក្នុងការដោះស្រាយបញ្ហាព្រំដែនដោយសន្តិវិធី។
កម្ពុជានៅរក្សាជំហរក្នុងការដោះស្រាយបញ្ហាដោយសន្តិវិធី ដើម្បីឈានទៅដល់ការបញ្ចប់ជម្លោះ និងកសាងសន្តិភាពនៅតំបន់ព្រំដែន ៕
ប្រភព ៖ ក្រសួងកសិកម្ម
