មន្ត្រី ៖ អាជ្ញាធរខិតខំបន្តស្ថាបនាផ្លូវ ដើម្បីប្រែក្លាយពីផ្លូវដី ឱ្យទៅជាផ្លូវកៅស៊ូ និងបេតុង ព្រមទាំងការដាក់ប្រព័ន្ធលូធំៗ បញ្ចៀសការលិចលង់ពេលភ្លៀងខ្លាំង
(ភ្នំពេញ)៖ ថ្លែងក្នុងឱកាសបើកការដ្ឋានស្ថាបនាផ្លូវ និងដាក់ប្រព័ន្ឋលូ ក្នុងសង្កាត់ទួលទំពូងទី១ និងទួលទំពូងទី២ នាថ្ងៃទី១៤ ខែវិច្ឆិកា ឆ្នាំ២០២៥ ក្រោមគំរោងអភិវឌ្ឍន៍ខណ្ឌ ឆ្នាំ២០២៥ លោក ហ៊ត វ៉ាន់ធី អភិបាលរងខណ្ឌ តំណាងលោក កៀង ល័ក្ស អភិបាលខណ្ឌចំការមន បានគូសបញ្ជាក់ថា សព្វថ្ងៃនេះ អាជ្ញាធរ ខិតខំបន្តស្ថាបនាផ្លូវ ដែលនៅសល់ជាបន្តទៀត ដោយខិតខំស្វែងរកមូលនិធិពីគ្រប់មជ្ឈដ្ឋាននានា ក៏ដូចជាប្រជាពលរដ្ឋក្នុងមូលដ្ឋាន ដើម្បីសំរេចឱ្យបាននូវគោលដៅរបស់យើង គឺប្រែក្លាយពីផ្លូវដី ឱ្យទៅជាផ្លូវកៅស៊ូ និងផ្លូវបេតុងទាំងអស់ ព្រមទាំងការដាក់ប្រព័ន្ឋលូធំៗ ដើម្បីបញ្ចៀសការលិចលង់ដោយទឹកភ្លៀងខ្លាំងៗ ។
លោកអភិបាលរងខណ្ឌ បានលើកឡើងថា ក្នុងរយៈពេលរបស់ក្រុមប្រឹក្សាសង្កាត់ ឆ្នាំ២០២៥នេះ គឺមានការប្រែប្រួលយ៉ាងខ្លាំង ជាពិសេសលើផ្នែកហេដ្ឋារចនា សម្ព័ន្ធ ដោយបានប្រែក្លាយពីផ្លួវដី ទៅជាផ្លូវ បេតុង និងកៅស៊ូ ស្ទើរតែគ្រប់ផ្លូវទៅហើយ។ នេះបានបង្ហាញអោយឃើញ ពីការចូលរួមគាំទ្រ របស់ប្រជាពលរដ្ឋ មកលើអាជ្ញាធរខណ្ឌ ។
លោក ហ៊ត វ៉ាន់ធី បានណែនាំដល់បងប្អូនប្រជាពលរដ្ឋទាំងអស់ ដែលមានលំនៅដ្ឋានរស់នៅអមសងខាងផ្លូវ ចូលរួមសហការ និងមានការយោគយល់ នូវផលប៉ះពាល់នានា ពេលការដ្ឋានកំពុងដំណើរការ ហើយសូមជួយសំរួលយ៉ាងណា ឱ្យការដ្ឋានដំណើរការបានរលូន និងបានរួចរាល់តាមការគ្រោងទុក ។ ចំណែកក្រុមហ៊ុនទទួលម៉ៅការ ត្រូវគោរពឱ្យបាន នូវបទដ្ឋានបច្ចេកទេស ដំណើរការស្ថាបនាផ្លូវឱ្យស្របតាមផែនការការងារ ដែលមានចុះក្នុងកិច្ចសន្យាទទួលម៉ៅការ ។
លោកអភិបាលរងខណ្ឌ បានសំណូមពរដល់ប្រជាពលរដ្ឋ នៅពេលទទួលផ្លូវបេតុថ្មីនេះ មេត្តាចេះថែរក្សា ឲ្យបានល្អ ដើម្បីអាចប្រើប្រាស់បានយូរ និងបានជំរុញឱ្យក្រុមហ៊ុន ដែលដេញថ្លៃបាន ក្នុងការស្ថាបនាផ្លូវនេះ ធ្វើយ៉ាងណា ឱ្យមានគុណភាព សោភ័ណ្ឌភាព ៕
ដោយ ៖ វណ្ណលុក
