សម្ដេចតេជោ ហ៊ុន សែន៖ វិស័យអាណាចក្រ និងពុទ្ធចក្រ មិនអាចកាត់ផ្ដាច់ពីគ្នាបានទេ
(ភ្នំពេញ)៖ វិស័យអាណាចក្រ និងពុទ្ធចក្រ មិនអាចកាត់ផ្ដាច់ពីគ្នាបានទេ។ វិស័យអាណាចក្រ និងពុទ្ធចក្រ ជាចំណងទាក់ទងគ្នា និងជាការបំពេញគ្នាទៅវិញទៅមក ។ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា លើកឡើងដូច្នេះ ក្នុងឱកាសអញ្ជើញជាព្រះរាជតំណាងដ៏ខ្ពង់ខ្ពស់របស់ព្រះករុណា ព្រះមហាក្សត្រ ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣ នាព្រឹកថ្ងៃទី១៧ ខែវិច្ឆិកា ឆ្នាំ២០២៥ នៅវិទ្យាស្ថានជាតិអប់រំ ។
សម្តេចតេជោ ហ៊ុន សែន មានប្រសាសន៍ថា រដ្ឋធម្មនុញ្ញនៃព្រះរាជាណាចក្រកម្ពុជា បានកំណត់ច្បាស់ថា ព្រះពុទ្ធសាសនាជាសាសនារបស់រដ្ឋ ប៉ុន្តែពុំមានការរឹតត្បិតលើសិទ្ធិសេរីភាពខាងសាសនានោះទេ ។
សម្តេចតេជោ ហ៊ុន សែន ថ្លែងថា គ្មានសាសនាណាមួយនៅលើលោកនេះ ដែលប្រដៅឲ្យសាសនិករបស់ខ្លួន ប្រព្រឹត្តអំពើអាក្រក់នោះទេ គឺគេតែងតែអប់រំ ប្រដៅឱ្យប្រព្រឹត្តអំពើល្អ មានសីលធម៌ល្អ និងគុណធម៌ល្អទាំងអស់ ។ សម្តេចតេជោ បន្តថា ព្រះសង្ឃ ឬសាសនិកដទៃទៀត អាចចូលរួមអប់រំមនុស្ស និងចូលរួមគ្នាដើម្បីអភិរក្ស អភិវឌ្ឍន៍វិស័យព្រះពុទ្ធសាសនានៅកម្ពុជា និងលើកកម្ពស់ការផ្សព្វផ្សាយ និងការយល់ដឹងពីពុទ្ធឱវាទ និងការប្រតិបត្តិធម៌វិន័យរបស់ព្រះពុទ្ធសាសនា ។
សម្តេចតេជោ ក៏បានយកឱកាសនេះ អំពាវនាវឲ្យភាគីទាំងអស់ រួបរួមគ្នាលើកម្ពស់ស្មារតីសាមគ្គីធម៌ ដើម្បីលើកកម្ពស់ព្រះពុទ្ធសាសនាឲ្យកាន់តែល្អប្រសើរបន្ថែមទៀត និងធ្វើការផ្សព្វផ្សាយនូវទ្រឹស្តីព្រះពុទ្ធសាសនា ឲ្យបានទូលំទូលាយបន្ថែមទៀត ដោយស្របតាមអនុលោមសច្ចធម៌ និងយុត្តិធម៌សង្គម ។
តាមរបាយកការណ៍របស់ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា បានឱ្យដឹងថា បច្ចុប្បន្ន នៅទូទាំប្រទេសកម្ពុជា មានវត្តចំនួន ៥ ១៤៨ វត្ត ក្នុងមហានិកាយចំនួន ៤ ៨៧៦ វត្ត, ធម្មយុត្តិកនិកាយចំនួន ២៧២ វត្ត មានព្រះសង្ឃចំនួន ៧៥ ៥៥៦ព្រះអង្គ ក្នុងនោះ មហានិកាយចំនួន ៧២ ៩០០ ព្រះអង្គ, ធម្មយុត្តិកនិកាយ ចំនួន ២ ៦៥៦ ព្រះអង្គ ។
ជាមួយគ្នានោះ អាចារ្យ និងអាចារិនី ដែលឆ្លងកាត់វគ្គបណ្តុះបណ្តាលទាំងអស់ មានចំនួន ១៣ ៨៣៣ អង្គ/នាក់ ក្នុងនោះ ព្រះសង្ឃ ១ ០៤០ ព្រះអង្គ និងអាចារិនី ២២៧ នាក់ ៕
អត្ថបទ៖ វណ្ណលុក
រូប៖ វ៉េង លីមហួត និង សួង ពិសិដ្ឋ
