សម្តេច ហ៊ុន សែន ប្រកាសធ្វើជាថៅកែ ផលិតអាវក្រោះ ផ្គត់ផ្គង់កងទ័ពកម្ពុជា និងនាំចេញទៅក្រៅប្រទេស
(ភ្នំពេញ)៖ ថ្លែងក្នុងនាមជាអគ្គភស្តុភាជាន់ខ្ពស់សម្រាប់ កងកម្លាំងប្រដាប់អាវុធ សម្តេចតេជោ ហ៊ុន សែន បាន ប្រកាសថា សម្តេចនឹងផលិតអាវការពារគ្រាប់ បំពាក់ជូន ដល់កងទ័ពទាំងអស់ ហើយថែមទាំងនាំចេញទៅលក់នៅ ក្រៅប្រទេសផងដែរ ។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា លើកឡើងដូច្នេះ ក្នុងឱកាស អញ្ជើញជាព្រះរាជតំណាងដ៏ខ្ពង់ខ្ពស់របស់ព្រះករុណា ព្រះមហាក្សត្រ ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣ នាព្រឹកថ្ងៃទី១៧ ខែវិច្ឆិកា ឆ្នាំ២០២៥ នៅវិទ្យាស្ថានជាតិអប់រំ ។
សម្តេចតេជោ ហ៊ុន សែន បានបញ្ជាក់ថា យើងមានការ ភ្លាត់ភ្លាំង ដោយមិនបានបំពាក់អាវក្រោះ ឬអាវសុវត្ថិភាពឲ្យបងប្អូនកងទ័ព ។ ប៉ុន្តែពេលនេះ សម្តេច បានប្រកាសថា អាវក្រោះនេះ វាបានលើសពីការគ្រប់គ្រាន់រួចទៅហើយ ដោយសម្តេច អះអាងថា សម្តេចផលិតម៉ាកអាវការពារសុវត្ថិភាពមួយ ដែលមានឈ្មោះថា DSS ហើយមិនត្រឹមតែបំពាក់សម្រាប់កងទ័ពកម្ពុជាយើងប៉ុណ្ណោះទេ ថែមទាំងអាចនាំចេញទៅក្រៅប្រទេសផងដែរ ។
សម្តេច បានបន្ថែមថា ការផលិតអាវក្រោះការពារដល់កងទ័ពកម្ពុជានេះ សម្តេច នឹងធ្វើថៅកែដោយខ្លួនឯង ខណៈសម្តេចជាអគ្គភស្តុភាជាន់ខ្ពស់កងកម្លាំងប្រដាប់អាវុធកម្ពុជា។ សម្តេចតេជោ បានបញ្ជាក់ទៀតថា កម្ពុជា ត្រូវតែពង្រឹង និងរកវិធីយ៉ាងម៉េច ដើម្បីការពារសុវត្ថិភាពដល់កងទ័ព ដោយយើងមិនយកអាវហ្នឹងទៅជល់ ឬឱ្យគេបាញ់ទេ ប៉ុន្តែជាសុវត្ថិភាពរបស់កងទ័ព គឺយើងរកវិធីផ្គត់ផ្គង់កងទ័ពឱ្យខាងតែបាន ។
សម្តេចប្រធានព្រឹទ្ធសភា បានសម្តែងការហួសចិត្តចំពោះការប្រមាថរបស់ប្រទេសថៃ ដែលចង់វាយចូលទឹកដីខ្មែរយកខេត្តមួយចំនួន ដើម្បីដោះដូរប្រាសាទនេះ ប្រាសាទនោះផងដែរ ដោយសម្តេចចោទសួរថា អ្នកដែលប្រមាថបែបនេះ ពួកគេពាក់ក្បាលដែកមែនទេ?។ យ៉ាងណាក៏ដោយ សម្តេចតេជោ បានលើកឡើងថា អ្នកឯងប្រមាថអីប្រមាថចុះ កម្ពុជា មិនតបមិនអ្វីទាំងអស់ តែកម្ពុជា មានសិទ្ធការពារខ្លួនគ្រប់ពេលវេលាទំាងអស់ ៕
អត្ថបទ៖ វណ្ណលុក
រូប៖ វ៉េង លីមហួត និង សួង ពិសិដ្ឋ
