សម្ដេច ហ៊ុន សែន ថា ថៃ ចាប់កងទ័ពខ្មែរ ១៨នាក់ ធ្វើជាគោលដៅដាក់លក្ខខណ្ឌជាមួយកម្ពុជា
(ភ្នំពេញ)៖ សម្ដេចតេជោ ហ៊ុន សែន បានថ្លែងដោយ ចាត់ទុកបញ្ហាកងទ័ពកម្ពុជា ១៨រូប ដែលត្រូវបានថៃ លេងល្បិចចាប់ខ្លួន ក្រោយបទឈប់បាញ់ប៉ុន្មានម៉ោង គឺពួកគាត់ពលីកម្ម ដើម្បីជាតិស្រាប់ទៅហើយ ។ សម្ដេច ក៏បានបង្ហើបដែរថា តាំងពីម៉ោងដំបូងដែលគេចាប់ខ្លួនកងទ័ពកម្ពុជា ១៨រូប គឺច្បាស់ណាស់ដើម្បីដោះដូរអ្វីមួយជាមួយកម្ពុជា ។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា លើកឡើងដូច្នេះ ក្នុងឱកាសអញ្ជើញជាព្រះរាជតំណាងដ៏ខ្ពង់ខ្ពស់របស់ព្រះករុណា ព្រះមហាក្សត្រ ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣ នាព្រឹកថ្ងៃទី១៧ ខែវិច្ឆិកា ឆ្នាំ២០២៥ នៅវិទ្យាស្ថានជាតិអប់រំ ។
សម្ដេច ហ៊ុន សែន បានលើកឡើងពីមូលហេតុដែលថៃ មិនព្រមដោះលែងកងទ័ពខ្មែរ១៨នាក់នេះ ដោយសារពួកគេមានបំណងទុកធ្វើជាថ្នូរដោះដូរជាមួយកម្ពុជា ។ សម្ដេច ថ្លែងទាំងហួសចិត្តថា នៅលើពិភពលោក គេតែងតែដោះដូរឈ្លើយសឹក ក្រោយពេលបញ្ចប់សង្គ្រាម។ ប៉ុន្តែភាគីថៃ បែរជាចាប់កងទ័ពខ្មែរទាំង១៨នាក់ ទុកធ្វើជាចំណាប់ខ្មាំង ក្នុងការដោះដូរជាមួយកម្ពុជាទៅវិញ ។ សម្ដេច បានចាត់ទុកកងទ័ពខ្មែរទាំង ១៨នាក់នេះ បានពលីយ៉ាងធំធេងដើម្បីជាតិ ។
សម្ដេចប្រធានព្រឹទ្ធសភា បានសង្កត់ធ្ងន់ថា ភាគីថៃ បានសន្យាបញ្ជូនកងទ័ពខ្មែរមកវិញ នៅថ្ងៃទី១២ វិច្ឆិកា កន្លងទៅ ប៉ុន្តែដោយសារវាមានព្រឹត្តិការណ៍ផ្សេងៗកើតឡើងនៅតាមព្រំដែន ភាគីថៃ ក៏យកលេសដើម្បីបន្ទច់បង្អាក់នូវដំណើរនេះ។ ដូច្នេះវាច្បាស់ណាស់ថា ថៃ បានចងភ្ជាប់រវាងកងទ័ព ១៨នាក់ ជាមួយនឹងបញ្ហាដទៃទៀត រាប់ទាំងថ្ងៃមុខផងដែរ។ ចាំមើលទៅ ។ គេដាក់លក្ខខណ្ឌឱ្យយើងធ្វើនេះ ធ្វើនោះហើយបានគេដោះលែង ។ សម្ដេចបន្ថែមថា ថៃ កំពុងដើរហួសពីច្បាប់ទម្លាប់អន្តរជាតិ ។
ទន្ទឹមនឹងនេះ សម្ដេចតេជោ ក៏បានចោទជាសំណួរថា តើនៅលើពិភពលោក មានទង្វើរអសីលធម៌បែបនេះទេ? ហេតុអ្វីថៃ ដែលចាត់ទុកខ្លួនឯងជាប្រទេសស៊ីវិល័យ បែរជាចាប់ទាហានជាចំណាប់ខ្មាំង ដើម្បីដោះដូរ? ហើយចុះលោក Muntarbhorn អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា នៅទីណា ទើបបានជាមិននិយាយពីការចាប់ខ្លួនកងទ័ពខ្មែរទាំង១៨នាក់នេះ?
សម្ដេច ហ៊ុន សែន បានសង្កត់ធ្ងន់ថា កងទ័ពខ្មែរទាំង ១៨នាក់នេះ មិនមែនជាឈ្លើយសឹក សម្រាប់យកមកដាក់លក្ខខណ្ឌ និងដោះដូរលើករណីអ្វីមួយទៀតឡើយ។ នេះជាលើកទីមួយហើយ ដែលសម្ដេច បង្ហើបរឿងនេះ ប្រាប់សាធារណជននៅតាមវេទិការសាធារណបែបនេះ។ ជាមួយគ្នានេះ សម្ដេច ក៏ស្នើសុំការយោគយល់ និងអធ្យាស្រ័យចំពោះសាច់ញាតិកងទ័ពទាំង១៨នាក់ ដែលកំពុងស្ថិតនៅក្រោមការឃុំខ្លួនរបស់ថៃ។ រដ្ឋាភិបាល កំពុងព្យាយាមដោះស្រាយបញ្ហានេះ ។
សូមរំលឹកថា ក្រោយបទឈប់បាញ់ ចូលជាធរមាននៅម៉ោង ១២យប់ ឈានចូលថ្ងៃទី២៩ កក្កដានោះ យោធាថៃ បានមកចាប់ដៃជាមួយកងទ័ពខ្មែរ ហើយបែរជាលួចឆ្មក់ចាប់ខ្លួនកងទ័ពចំនួន២០នាក់ ទៅជំរំពួកគេ។ ក្រោយមកពួកគេ បានសម្រេចដោះលែងកងទ័ពខ្មែរ ចំនួន២រូបមកវិញ កាលពីថ្ងៃទី១ សីហា ។ កងទ័ពខ្មែរទាំងពីររូប ដែលត្រូវបានដោះលែងវិញនេះ មានបញ្ហាសុខភាពធ្ងន់ធ្ងរ ហើយត្រូវបានបញ្ជូនទៅសង្គ្រោះ និងព្យាបាលភ្លាមៗ។ ចំណែកកងទ័ពនៅសល់ទាំង១៨នាក់ ត្រូវបានភាគីថៃ បន្តឃុំខ្លួនអស់រយៈពេល ១១១ថ្ងៃហើយ គិតត្រឹមថ្ងៃទី១៧ វិច្ឆិកានេះ ។ ភាគីថៃ បានសន្យាដោះលែងពួកគេជាច្រើនលើកហើយ តែមិនទាន់គោរពតាមពាក្យសម្តី ៕
អត្ថបទ ៖ វណ្ណលុក
រូប ៖ វ៉េង លីមហួត និង សួង ពិសិដ្ឋ
