កម្ពុជា មិនអង្វរថៃ ឱ្យមានការបើកច្រកព្រំដែនឡើងវិញទេ ព្រោះថៃ ជាអ្នកបិទមុន
(ភ្នំពេញ)៖ សម្តេចតេជោ ហ៊ុន សែន បានផ្តាំទៅភាគីថៃ ថា កម្ពុជា មិនអង្វរថៃ ឱ្យមានការបើកច្រកព្រំដែន ឡើងវិញទេ ព្រោះថៃ ជាអ្នកបិទមុន ដូច្នេះថៃ ត្រូវទទួលខុសត្រូវចំពោះការបើកព្រំដែនឡើងវិញ ។ ការបញ្ជាក់ជាថ្មីរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នេះ ធ្វើឡើងបន្ទាប់ពីមានសេចក្តីថ្លែងការណ៍ថ្មីៗពីមន្ត្រីថៃ រួមទាំងនាយករដ្ឋមន្ត្រី និងរដ្ឋមន្ត្រីក្រសួងការពារជាតិ ដែលតែងតែលើកឡើងនៃការបើកច្រកព្រំដែនឡើងវិញ។ មន្ត្រីថៃមួយចំនួនថែមទាំងបានបំផ្លើសថា កម្ពុជាបានស្នើសុំបើកព្រំដែន។ ជាពិសេស រដ្ឋមន្ត្រីក្រសួងការពារជាតិថៃ បានប្រកាសថា ក្នុងមួយជីវិតនេះមិនចរចាដាច់ខាតលើរឿងបើកព្រំដែន ។
ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣ នាព្រឹកថ្ងៃទី១៧ ខែវិច្ឆិកា ឆ្នាំ២០២៥ នៅវិទ្យាស្ថានជាតិអប់រំ សម្ដេចតេជោ បានបញ្ជាក់ថា បញ្ហាច្រកព្រំដែនរវាងកម្ពុជា និងថៃ គឺថៃ ជាអ្នកផ្តើមបិទមុន ដូច្នេះថៃ ត្រូវតែបើកមុន ។ សម្តេច ថា រឿងព្រំដែននេះ យើងបានដឹងទាំងអស់គ្នាហើយ យើងមិនមែនអ្នកបិទទេ គេអ្នកបិទ កូនសោរនៅលើគេ ហេតុអ្វីយើងទៅអង្វរសុំគេ? សូមជូនសារទៅថ្នាក់ដឹកនាំថៃ មិនថាស៊ីវិល មិនថាកងទ័ពទេ កម្ពុជា មិនធ្វើថោកទៅសុំឱ្យថៃបើកច្រកព្រំដែនទេ ។
សម្ដេច ហ៊ុន សែន បានអះអាងថា តាំងពីថៃ បិទព្រំដែនមក កម្ពុជា មិនដែលទៅសុំថៃ បើកឡើងវិញម្តងណានោះទេ ហើយទោះថៃ បិទ១០០ឆ្នាំទៀត ក៏កម្ពុជា មិនទៅស្នើសុំបើកវិញដែរ ។
សម្តេចតេជោ បន្ថែមថា នាយករដ្ឋមន្ត្រីថៃបច្ចុប្បន្ន ព្រមទាំងកងទ័ពថៃ បានចេញមកនិយាយជាច្រើនដង ហើយព្រមទាំងអះអាងថា ក្នុងមួយជីវិតនេះ ពួកគេមិនចរចាដាច់ខាត លើរឿងបើកព្រំដែនជាមួយកម្ពុជា ។ ក្រោយការលើកឡើងរបស់ភាគីថៃនេះ សម្តេចតេជោ ឆ្លើយតបវិញថា សូមឱ្យថៃបិទ ១០០ឆ្នាំ ឬ ៥០០ឆ្នាំទៀតទៅ កម្ពុជា មិនទៅអង្វរនោះទេ ។
ជាមួយគ្នានោះ សម្តេចតេជោ ហ៊ុន សែន បានគូសបញ្ជាក់ដែរថា ចាប់ពីពេលនេះតទៅ កម្ពុជា ត្រូវពង្រឹងសមត្ថភាពនៃការផលិតទំនិញ សម្រាប់ផ្គត់ផ្គង់ដោយខ្លួនឯង ហើយត្រូវរកទីផ្សារផ្សេងផ្គត់ផ្គង់ជំនួសឱ្យទំនិញថៃផងដែរ ដូច្នេះថៃចង់បិទ១០០ឆ្នាំ ឬ៥០០ឆ្នាំទៀតក៏កម្ពុជាពុំមានបញ្ហាអ្វីនោះដែរ ។
ទន្ទឹមនេះ កម្ពុជា ត្រូវពង្រឹងសមត្ថភាពនៃការផលិតទំនិញ សម្រាប់ផ្តត់ផ្គង់ហើយត្រូវរកទីផ្សារផ្សេងផ្គត់ផ្គង់ជំនួសឱ្យទំនិញថៃ។ យ៉ាងណាមិញ សម្តេច បានក្រើនរំលឹកដល់ប្រជាពលរដ្ឋកម្ពុជា កុំធ្វើពហិកាជ្រុលហួស ។ ជ្រុលក្នុងន័យនេះ បើសិនជាអ្នកវិនិយោគថៃ មកផលិតនៅកម្ពុជា ចាត់ទុកជាទំនិញរបស់កម្ពុជា។
គួរបញ្ជាក់ថា ថៃបានប្រកាសបិទព្រំដែនគោកជាឯកតោភាគី ជាមួយកម្ពុជា ចាប់ពីថ្ងៃទី ៧ ខែមិថុនា ឆ្នាំ ២០២៥ ក្រោយមករាជរដ្ឋាភិបាលកម្ពុជា បានប្រកាសបិទច្រកព្រំដែនវិញជាការឆ្លើយតប ។
យោងរបាយការណ៍អគ្គនាយកដ្ឋានគយ និងរដ្ឋាករកម្ពុជា បង្ហាញថា ពាណិជ្ជកម្មរវាងកម្ពុជា និងថៃ ធ្លាក់ចុះ ១០ភាគរយក្នុងរយៈពេល ១០ខែ ឆ្នាំ២០២៥នេះ ពោល គឺការផ្លាស់ប្តូរទំនិញនៃប្រទេសជិតខាងទាំងពីរ សម្រេចបានត្រឹមតែ ជាង ៣,២ពាន់លានដុល្លារអាម៉េរិក បើធៀបនឹងរយៈពេលដូចគ្នាកាលពីឆ្នាំមុន មានទំហំទឹកប្រាក់ជាង ៣,៥ពាន់លានដុល្លារអាម៉េរិក ។ ចំណែក ការនាំចូលទំនិញពីថៃ មកកម្ពុជា នៅរយៈពេល ១០ខែមកនេះ ក៏មានការធ្លាក់ចុះដូចគ្នា គឺមានទំហំទឹកប្រាក់ជាង ២,៥ពាន់លានដុល្លារ ធ្លាក់ចុះជិត ៩ភាគរយ។ ការនាំចេញទំនិញកម្ពុជា ទៅប្រទេសថៃវិញ មានទំហំទឹកប្រាក់ជាង ៦៣៥លានដុល្លារ ធ្លាក់ចុះជាង ១១ភាគរយ ។
ប្រទេសកម្ពុជា និងថៃ ធ្លាប់បានដាក់គោលដៅពង្រីកការផ្លាស់ប្តូរពាណិជ្ជកម្មឲ្យឈានដល់ទំហំ ១៧ពាន់លាននៅឆ្នាំ២០២៧-២០២៨។ ប៉ុន្តែ អ្នកជំនាញផ្នែកសេដ្ឋកិច្ចនៅកម្ពុជា អះអាងថា គោលដៅនេះ នឹងមិនបានសម្រេចបាននោះទេ ៕
អត្ថបទ៖ វណ្ណលុក
រូប៖ វ៉េង លីមហួត និង សួង ពិសិដ្ឋ
