អ្នកវិនិយោគរបស់អូទ្រីស នឹងមកទស្សនកិច្ចស្វែងរកឱកាសវិនិយោគនៅកម្ពុជា នាខែក្រោយ
(ភ្នំពេញ)៖ ឯកអគ្គរដ្ឋទូតអូទ្រីស បានគូសបញ្ជាក់ថា ទំនាក់ទំនងពាណិជ្ជកម្មរវាងអូទ្រីស និងកម្ពុជា នឹងមានការកើនឡើង ខណៈអ្នកវិនិយោគរបស់អូទ្រីស នឹងមកទស្សនកិច្ចដើម្បីស្វែងរកឱកាសវិនិយោគនៅកម្ពុជា នាខែក្រោយនេះ ។ នេះបើតាមឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានប្រាប់អ្នកយកព័ត៌មាននៅក្រោយ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា អនុញ្ញាតឱ្យឯកឧត្តម Wehelm Maximilian Donko ឯកអគ្គរដ្ឋទូត នៃសាធារណរដ្ឋអូទ្រីសប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងជម្រាបលា នៅវិមានព្រឹទ្ធសភា នាព្រឹកថ្ងៃទី១៨ ខែវិច្ឆិកា ឆ្នាំ២០២៥ ។
អ្នកនាំពាក្យព្រឹទ្ធសភា បានឱ្យដឹងថា នៅក្នុងជំនួបនោះ សម្ដេចតេជោ ហ៊ុន សែន បានវាយតម្លៃខ្ពស់ចំពោះតួនាទីរបស់ឯកឧត្តមឯកអគ្គរដ្ឋទូត ក្នុងពេលបំពេញបេសកកម្មការងារ ថ្វីត្បិតតែពេលនេះ ឯកឧត្តមបានផុតអាណត្តិក៏ពិតមែន ប៉ុន្តែ បេសកកម្មរបស់ឯកឧត្តមឯកអគ្គរដ្ឋទូត បានចូលរួមចំណាយយ៉ាងសំខាន់នៅក្នុងការអភិវឌ្ឍទំនាក់ទំនងរវាងកម្ពុជា និងអូទ្រីស ។
ឯកឧត្តមឯកអគ្គរដ្ឋទូតអូទ្រីស បានបញ្ជាក់អំពីទំនាក់ទំនងដ៏ល្អរវាងកម្ពុជា និងអូទ្រីស នាពេលកន្លងមក ហើយបច្ចុប្បន្នកំពុងតែពង្រីកបន្ថែមទៀត ក្នុងនោះ ឯកឧត្តម ក៏បានរំលេចអំពីការអភិវឌ្ឍនៅក្នុងប្រទេស កម្ពុជា ពីមួយឆ្នាំទៅមួយឆ្នាំ មានការរីកចម្រើនគួរឲ្យកត់សម្គាល់ ក្នុងនោះ មានអគារខ្ពស់ៗជាច្រើននាពេលបច្ចុប្បន្ន ។
ឯកឧត្តមក៏បានរំលេចពីក្របខ័ណ្ឌទំនាក់ទំនងទ្វេភាគី ដោយបញ្ជាក់ថា កន្លងមក អូទ្រីស បានចូលរួមចំណែកនៅក្នុងកិច្ចសហប្រតិបត្តិការជាមួយកម្ពុជា លើវិស័យដោះមីន ការជួយជ្រោមជ្រែងដល់អង្គជំនុំជម្រះវិសាមញ្ញក្នុងតុលាការកម្ពុជា ហើយឯកឧត្តមរំពឹងថា ទំនាក់ទំនងពាណិជ្ជកម្មរវាងប្រទេសទាំងពីរ នឹងកើនឡើងនាពេលខាងមុខ ដោយនៅខែក្រោយនេះ អ្នកវិនិយោគរបស់អូទ្រីស នឹងមកទស្សនកិច្ច ដើម្បីស្វែងរកឱកាសវិនិយោគនៅកម្ពុជា ។
ជាការឆ្លើយតប សម្ដេចតេជោ ហ៊ុន សែន បានអរគុណចំពោះអូទ្រីស ដែលបានចូលរួមចំណែកលើវិស័យដោះមីន ការជួយជ្រោមជ្រែងដល់អង្គជំនុំជម្រះវិសាមញ្ញ ក្នុងតុលាការកម្ពុជា រួមទាំងកិច្ចសហប្រតិបត្តិការមួយចំនួនទៀត ដែលកម្ពុជានិងអូទ្រីស បានធ្វើជាមួយគ្នា នាពេលកន្លងទៅ ។ សម្ដេច ក៏បានឯកភាពចំពោះការលើកឡើងរបស់ឯកឧត្តមឯកអគ្គរដ្ឋទូត ដែលធ្វើយ៉ាងណា ជំរុញវិស័យពាណិជ្ជកម្ម រវាងកម្ពុជា និងអូទ្រីស ឱ្យមានការកើនឡើង ។
សម្ដេចតេជោ បញ្ជាក់ថា បច្ចុប្បន្ន ស្ថានភាពទំនាក់ទំនងនយោបាយការបរទេសរវាងប្រទេសទាំងពីរ មានភាពរីកចម្រើនហើយ ដូច្នេះទាមទារបន្ថែមទៀតនូវការពង្រីកទំហំពាណិជ្ជកម្ម សេដ្ឋកិច្ច ការវិនិយោគជាមួយគ្នា ។
សម្ដេច ក៏ចង់ឃើញនូវកិច្ចសហប្រតិបត្តិការនយោបាយបន្ថែមទៀតរវាងប្រទេសទាំងពីរ នៅក្នុងក្របខ័ណ្ឌនយោបាយ ជាពិសេស ទំនាក់ទំនងក្រសួងការបរទេស នៃប្រទេសទាំងពីរ ដើម្បីស្វែងរកយន្តការធ្វើកិច្ចសហប្រតិបត្តិការជាមួយគ្នាបន្តទៀត ៕
អត្ថបទ៖ វណ្ណលុក
រូប៖ វ៉េង លីមហួត និង សួង ពិសិដ្ឋ
