កំពត៖ក្នុងវេទិកាពិគ្រោះយោបល់ជាមួយសមាគម អង្គការមិនមែន​រដ្ឋាភិបាល សហគមន៍ និងសហជីពនានា ក្នុង ខេត្តកំពតកាលពីព្រឹក​ថ្ងៃទី២៤ ខែវិច្ឆិកា ឆ្នាំ២០២៥ លោក អ៊ឹង ឆាយ អភិបាលរងខេត្ត​កំពតបានលើកឡើងថា​ដើម្បីចូលរួមសម្រេចចក្ខុវិស័យរបស់​រាជរដ្ឋា​ភិបាលនៅឆ្នាំ២០៥០ កម្ពុជាជាប្រទេសមានប្រាក់ចំណូលខ្ពស់ ឬជា​ប្រទេសអភិវឌ្ឍន៍ ទាមទារឱ្យមានការចូលរួមពីគ្រប់ភាគី ពិសេស​សមាគម អង្គការសង្គមស៊ីវិល សហគមន៍ សហជីពនានាដែលជាដៃ​គូរ​ដោយមិនអាចខ្វះបាន។

ក្នុងវេទិកាដែលប្រារព្ធនៅសាលាខេត្តកំពត លោក អ៊ឹង ឆាយ អភិបាលរងខេត្តក៏បានស្នើដល់គ្រប់ភាគី និងអ្នកពាក់ព័ន្ធ​បន្តចូលរួមសហការគ្នា ខិតខំស្វែងរកលទ្ធភាពនិងគ្រប់មធ្យោបាយ ដើម្បីបន្តរួមចំណែកអភិវឌ្ឍន៍មូលដ្ឋានខេត្តកំពតឱ្យ​កាន់តែប្រសើរ ពិសេសសូមជួយលើកកម្ពស់ជីវភាពពលរដ្ឋងាយរងគ្រោះ និងមានជីវភាពខ្វះខាតជាអាទិភាព។

សូមបញ្ជាក់ថាខេត្តកំពតមាន សមាគម អង្គការមិនមែនរដ្ឋាភិបាល សហគមន៍ និងសហជីពកំពុងប្រតិបត្តិការនៅ​តាមបណ្តា​ក្រុង​ស្រុកទាំង៩ សរុបចំនួន ១៧៨ ក្នុងនោះមានច្បាប់អនុញ្ញាត​ចំនួន១៧៧ និងមិនទាន់មានច្បាប់ចំនួនមួយ៕
ដោយ ៖សិលា សារិន