គណបក្សប្រជាជនកម្ពុជា ដឹកនាំប្រទេសឆ្លងកាត់ឧបសគ្គ ជាច្រើន មិនរត់ចោលប្រជាជនឡើយ
(កំពង់ធំ)៖ រយៈពេល ៧៥ឆ្នាំមកនេះ គណបក្សប្រជា ជនកម្ពុជា បានដឹកនាំប្រទេសជាតិ ឆ្លងកាត់ឧបសគ្គ និងការលំបាកជាច្រើនរាប់មិនអស់ ព្រមទាំងថ្មីៗនេះ ការខិតខំប្រឹងប្រែង ក្នុងការដោះស្រាយបញ្ហាព្រំដែនកម្ពុជា-ថៃ ថែមទៀតផង ដោយគណបក្សប្រជាជនកម្ពុជា មិនរត់ចោលប្រជាជនឡើយ យើងនឹងនៅរួមសុខរួមទុក្ខ និងយកប្រជាជនជាធំ ។
ក្នុងឱកាសម្ពោធស្នាក់ការគណបក្សឃុំតាំងក្រសៅ ដែលចំណាយទឹកប្រាក់ជិត ៩ម៉ឺនដុល្លារ និងដាក់ឱ្យប្រើប្រាស់ផ្លូវបេតុង ១ខ្សែ ប្រវែង ១៦០ម៉ែត្រ ទទឹង ៤,៦ម៉ែត្រ នៅអនុវិទ្យាល័យ ហ៊ុន សែន ព្រៃក្តី ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ នាថ្ងៃទី២៣ ខែវិច្ឆិកា ឆ្នាំ២០២៥ លោកជំទាវបណ្ឌិត ជា សិរី សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានស្រុកប្រាសាទសំបូរ បានថ្លែងថា គណបក្សប្រជាជនកម្ពុជា មានភាពរឹងមាំមកដល់សព្វថ្ងៃ គឺមានកត្តាចូលរួមជាច្រើន ខណៈពិធីសម្ពោធអគារទីស្នាក់ការបក្សថ្មីពេលនេះ បានបង្ហាញពីភាពរឹងមាំនៃគណបក្ស ឆ្លុះបញ្ចាំងពីស្មារតីសាមគ្គីភាព និងឯកភាពផ្ទៃក្នុងបក្ស ។
ជាមួយគ្នានេះ លោកជំទាវ ជា សិរី បានលើកឡើងថា រាជរដ្ឋាភិបាល ក្នុងអាណត្តិទី៧ បានចាត់ទុកការសិក្សាអប់រំ ជាអាទិភាពមួយដ៏សំខាន់ក្នុងការអភិវឌ្ឍសង្គម-សេដ្ឋកិច្ចជាតិ ។ ជាក់ស្ដែង តាមរយៈសមិទ្ធផល នៃផ្លូវបេតុងក្នុងអនុវិទ្យាល័យ ហ៊ុន សែន ព្រៃក្តី បានបង្ហាញពីការចូលរួមចំណែករបស់ថ្នាក់ដឹកនាំ និងមន្ត្រីធនាគារជាតិនៃកម្ពុជា លើការអភិវឌ្ឍវិស័យអប់រំកម្ពុជា ក៏ដូចជាសេដ្ឋកិច្ចជាតិ ដើម្បីឈានទៅសម្រេចបាននូវគោលដៅសេដ្ឋកិច្ច ក្នុងការក្លាយជាប្រទេស ដែលមានចំណូលមធ្យមកម្រិតខ្ពស់នៅឆ្នាំ២០៣០ ខាងមុខ ។
លោកជំទាវ បានលើកទឹកចិត្តមាតាបិតា អាណាព្យាបាល បញ្ជូនកូនមករៀន ជួយលើកទឹកចិត្តកូន និងបង្កលក្ខណៈឱ្យកូនៗបានបន្តការសិក្សា ព្រោះថា ការបញ្ជូនកូនមករៀន មិនត្រឹមតែជាកាតព្វកិច្ចរបស់មាតាបិតាគ្រប់រូបនោះទេ តែ ក៏ដូចជាការសន្សំប្រាក់ឱ្យកូន និងជួយស្រោចស្រង់ជីវភាពឱ្យរួចផុតពីភាពក្រីក្រ ដោយប្រសិទ្ធភាព ដូចពាក្យស្លោកមួយថា «ការសិក្សាគឺជាស្ពានឆ្ពោះទៅអនាគត ចង់មានថ្ងៃស្អែក ទាល់តែរៀបចំពីថ្ងៃនេះ» ។
លោកជំទាវ បានណែនាំក្រុមការងារ យកចិត្តទុកដាក់កសាងមត្តេយ្យតាមឃុំ និង ការផ្ដល់អាហារូបត្ថម្ភដល់ពួកគេផងដែរ ដើម្បីឱ្យធនធានមនុស្សជំនាន់ក្រោយ មានសមត្ថភាព និងចំណេះដឹងខ្ពស់ក្នុងការអភិវឌ្ឍប្រទេស ៕
អត្ថបទ ៖ វណ្ណលុក
រូប ៖ វ៉េង លីមហួត
