ស្ថានទូតបារាំង រៀបចំពិធី អបអរទិវាអន្តរជាតិ នៃគ្រូបង្រៀនភាសាបារាំង
(ភ្នំពេញ)៖ បើយោងតាមសេចក្តីប្រកាសព័ត៌មានរបស់ស្ថានទូតបារាំង កាលពីល្ងាចថ្ងៃទី២៦ ខែវិច្ឆិកា ឆ្នាំ២០២៥ ស្ថានទូតបារាំងប្រចាំកម្ពុជា បានរៀបចំពិធីជួបជុំមួយ ដោយមានការចូលរួមពី សំណាក់លោកគ្រូ អ្នកគ្រូបង្រៀនភាសាបារាំងចំនួន ២០០នាក់ មកពីគ្រប់ទិសទី នៃប្រទេសកម្ពុជា ក្នុងឱកាសទិវាពិភពលោកនៃ គ្រូបង្រៀនភាសាបារាំង ដែលត្រូវបានប្រារព្ធឡើងនៅជុំវិញពិភពលោកអស់រយៈពេល ៧ឆ្នាំជាប់គ្នាមកហើយ។
ទិវានេះ បង្កើតឡើង ក្រោមគំនិតផ្តួចផ្តើមរបស់លោកប្រធានាធិបតី នៃសាធារណរដ្ឋបារាំង អេម៉ានុយអ៊ែល ម៉ាក្រុង ទិវានេះមានគោលដៅអបអរគ្រូ បង្រៀនភាសាបារាំង ក្នុងនាមជាតួអង្គសំខាន់នៃការលើកស្ទួយ និងលើកតម្កើងកិត្យានុភាពភាសាបារាំងនៅលើពិភពលោក។
នៅកម្ពុជា គ្រឹះស្ថានសាកលវិទ្យាល័យឈានមុខជាច្រើនផ្តល់ការបណ្តុះបណ្តាលជាភាសាបារាំងលើមុខជំនាញផ្សេងៗដូចជា សុខាភិបាល នីតិសាស្ត្រ វិស្វកម្ម ឌីជីថល និងមុខជំនាញយោធា។ ជាងនេះទៅទៀត ភាសាបារាំងត្រូវបានបង្រៀនដល់សិស្សានុសិស្សប្រមាណ ៣០០០នាក់នៃថ្នាក់ពីរភាសា និងត្រូវបានបង្រៀនភាសាទៅដល់សិស្សានុសិស្សប្រមាណ ២២ ៥០០នាក់ ដែលសិក្សានៅតាមបណ្តាគ្រឹះស្ថានសាធារណៈកម្ពុជាជាច្រើន។ ភាសានេះក៏ត្រូវបានបង្ហាត់បង្រៀននៅតាមបណ្តាគ្រឹះស្ថាន មធ្យមសិក្សាឯកជនជាច្រើនផងដែរ ។ ជាងនេះទៅទៀត ប្រទេសកម្ពុជាមានគ្រឹះស្ថានសិក្សាចំនួន ១៥ ដែលជាដៃគូទីភ្នាក់ងារ ឧត្តមសិក្សាប្រើប្រាស់ភាសាបារាំង (AUF)។
ពិធីជួបជុំខាងលើបានប្រព្រឹត្តទៅដោយមានវត្តមានរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវ ជន និងកីឡា និងលោកឯកអគ្គរដ្ឋទូតបារាំង អូលីវៀ រីឆា។ លោកគ្រូ អ្នកគ្រូបានចែករំលែកបទពិសោធន៍របស់ខ្លួនបន្ទាប់ពីបាន ចូលរួមសមាជពិភពលោកនៃគ្រូបង្រៀនភាសាបារាំង និងកម្មសិក្សារយៈពេល ៣សប្តាហ៍នៅទីក្រុងបីហ្សង់សុង ប្រទេសបារាំង ក្នុងក្របខ័ណ្ឌនៃគម្រោងមួយរបស់ស្ថានទូត។
នៅក្នុងពិធីខាងលើក៏មានការចែកសញ្ញាប័ត្រ DELF ជូនដល់លោកគ្រូ អ្នកគ្រូ ជ័យលាភីដែលបានសិក្សាវត្តត្រៀមប្រលងសញ្ញាប័ត្រនេះដែលទទួលបានជំនួយហិរញ្ញវត្ថុពីស្ថានទូតបារាំង និងដែលបានចូល រួមល្បែងសំណួរចម្លើយពាក់ព័ន្ធនឹងបទចម្រៀងជាភាសាបារាំង ដោយមានទំនាក់ទំនងជាមួយប្រធានបទដែលត្រូវបានជ្រើសរើសនៅឆ្នាំនេះសម្រាប់ទិវាគ្រូបង្រៀនភាសាបារាំង ៖ «ច្រៀង លេង បង្រៀន៖ ហ្វ្រង់កូហ្វូនីតាមរយៈចម្រៀង និង តន្ត្រី»។
អស់រយៈពេលបីឆ្នាំមកហើយ ស្ថានទូតបារាំងប្រចាំកម្ពុជាបាន និងកំពុងដឹកនាំគម្រោងផ្តល់ការគាំទ្រដល់ការបង្ហាត់បង្រៀន ភាសាបារាំងនៅតាមបណ្តាអនុវិទ្យាល័យ និងវិទ្យាល័យរដ្ឋរបស់កម្ពុជាដែលបានផ្តល់ឱកាសដល់លោកគ្រូ អ្នកគ្រូប្រមាណ៥០០ នាក់ទទួលបានការបណ្តុះបណ្តាលនៅប្រទេសបារាំង ក៏ដូចជានៅក្នុងតំបន់អាស៊ីប៉ាស៊ីហ្វិក និងនៅប្រទេសកម្ពុជា។ ប្រទេស បារាំងក៏បន្តការគាំទ្រដល់ការបង្រៀនថ្នាក់បរិញ្ញប័ត្រជាន់ខ្ពស់ផ្នែកបង្រៀនភាសាបារាំងនៅវិទ្យាស្ថានជាតិអប់រំផងដែរ ដែលជា ការបណ្តុះបណ្តាលតែមួយគត់ក្នុងកម្រិតនេះសម្រាប់គ្រូបង្រៀនភាសាបារាំង។ ជាងនេះទៅទៀត ដោយមានការសហការពីហ្វ្រង់ វ៉ូឡុងទែរ ការគាំទ្រខាងលើប្រព្រឹត្តទៅដោយមានការបញ្ជូន «អ្នកស្ម័គ្រចិត្តហ្វ្រង់កូហ្វូនី» ជាច្រើននាក់ឱ្យទៅបំពេញការងារស្ម័គ្រ ចិត្តនៅប្រទេសបារាំង ក៏ដូចជាការលើកតម្កើងភាសាបារាំងជាភាសាមួយដើម្បីទទួលបានការងារ និងប្រកបដោយគុណតម្លៃខ្ពស់ សម្រាប់យុវជន យុវនារីកម្ពុជា ក្នុងភាពជាដៃគូជាមួយទីភ្នាក់ងារ AUF។ ប្រទេសបារាំងនឹងបន្តការគាំទ្ររបស់ខ្លួនដល់ហ្វ្រង់កូហ្វូនីក្នុងចក្ខុវិស័យនៃកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជានឹង ធ្វើជាម្ចាស់ផ្ទះក្នុងឆ្នាំ២០២៦៕
អត្ថបទ ៖ ហេង វណ្ណា
ថត ៖ វ៉េង លឹមហួត
