គ្រប់គ្រងការបំពុលតំបន់ទឹកសាធារណៈ ចាំបាច់មានការចូលរួមពីគ្រប់អ្នកពាក់ព័ន្ធ
(ខេត្តកណ្តាល)៖ ការចូលរួមគ្រប់គ្រង និងការពារបរិស្ថាន ត្រូវការចាំពីការចូលរួមពីគ្រប់ភាគីពាក់ព័ន្ធទាំងអស់។ ក្រុមហ៊ុន រោងចក្រ សហគ្រាស ដែលមានសក្តានុពលប្រភពបំពុល ដូចជាប្រភេទបោកគក់ ជ្រលក់ពណ៌ ជាដើមត្រូវបំពាក់ឧបករណ៍ចម្រោះទឹកកខ្វក់ និងឧបករណ៍តាមដានគុណភាពទឹក តាមច្បាប់បរិស្ថាន ដើម្បីធានាបានការបញ្ចេញសំណល់រាវចេញពីទីតាំងផលិតកម្ម មិនបង្កឱ្យមានការបំពុលតំបន់សាធារណៈ និងធ្វើឱ្យប៉ះពាល់សុខភាពមនុស្ស និងបរិស្ថាន។
អ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា បានឱ្យដឹងថា ក្រសួងបរិស្ថានបានអនុវត្តច្បាប់តម្រូវឱ្យក្រុមហ៊ុនបំពាក់ឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ នៅតាមរោងចក្រ-សហគ្រាស នៅរាជធានី-ខេត្ត គិតត្រឹមខែតុលា ឆ្នាំ២០២៥ មានរោងចក្រចំនួន៦១ បានចុះកិច្ចសន្យាបំពាក់ឧបករណ៍រួច ក្នុងនោះមាន ក្រុមហ៊ុន រោងចក្រ និងសហគ្រាស ចំនួន ៤៩ទីតាំង បានបំពាក់ឧបករណ៍ស្វ័យត្រួតពិនិត្យរួចរាល់ ។ ប្រជាពលរដ្ឋរស់នៅតំបន់ក្បែររោងចក្រសហគ្រាស ដែលធ្លាប់រងការបំពុល ដោយសារការបញ្ចេញសំណល់រាវ បានលើឡើងពីការគាំទ្រឱ្យមានការទប់ស្កាត់ជាប្រចាំការបញ្ចេញសំណល់រាវ ដែលអាចបំពុលតំបន់ទឹកប្រើប្រាស់ និងការរស់នៅរបស់ប្រជាពលរដ្ឋនៅតាមមូលដ្ឋាន ។
ការគ្រប់គ្រងសំណល់រាវចេញពីរោងចក្រសហគ្រាស អ្នកនាំពាក្យក្រសួងបរិស្ថាន បានឱ្យដឹងថា ក្រសួងបរិស្ថានបានដំណើរការស្ថានីយស្វ័យប្រវត្តិចំនួន១ស្ថានីយ សម្រាប់តាមដានគុណភាពទឹក ២៤ម៉ោង នៅទន្លេចតុមុខរាជធានីភ្នំពេញ និងមានក្រុមការងារតាមដានគុណភាពទឹកសាធារណៈ (ទន្លេ ស្ទឹង បឹង ព្រែក និងសមុទ្រ) ចំនួន ៦៣ទីតាំង នៅទូទាំងប្រទេស ព្រមទាំងបានយកសំណាកទឹករៀងរាល់ខែមកវិភាគនៅមន្ទីរពិសោធន៍។ តាមលទ្ធផល និងការវាយតម្លៃសន្ទស្សន៍គុណភាពទឹក បង្ហាញថា គុណភាពទឹកសាធារណៈស្ថិតក្នុងចំណាត់ថ្នាក់ល្អណាស់ ល្អ និងមធ្យម ពុំមានអ្វីប្រែប្រួល ឬ បង្កការបំពុលគួរឱ្យកត់សម្គាល់នោះទេ។
សូមបញ្ជាក់ថា ការងារបរិស្ថានជាការងារពហុវិស័យ និងមានតម្លៃជាសកល។ ស្របតាមយុទ្ធសាស្ត្រចក្រាវិស័យបរិស្ថាន បង្កើតឡើងអនុឡោមតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ក្រសួងបរិស្ថានបាន និងកំពុងយកចិត្តទុកដាក់ធ្វើការទប់ស្កាត់ការបំពុលបរិស្ថាន និងធ្វើឱ្យប្រជាពលរដ្ឋរស់នៅមានសុខភាពល្អ តាមរយៈការដាក់ចេញយុទ្ធនាការនានា ដើម្បីភាពស្អាតលើដី ភាពស្អាតក្នុងទឹក និងភាពស្អាតលើមេឃ ឆ្ពោះទៅកម្ពុជា មានភាពស្អាតតរហូតទៅ ៕
អត្ថបទ៖ង៉ាន់ ទិត្យ
រូបភាព៖រិន រចនា
