ក្រសួងការពារជាតិកម្ពុជា ធ្វើម្ចាស់ផ្ទះកិច្ចប្រជុំ ស្តីពីសន្តិសុខសាយប័រ លើកទី១៣
(សៀមរាប)៖ ក្រសួងការពារជាតិកម្ពុជា បានធ្វើម្ចាស់ផ្ទះកិច្ចប្រជុំក្រុមការងារជំនាញស្តីពី សន្តិសុខសាយប័រ លើកទី១៣ ក្នុងក្របខ័ណ្ឌកិច្ចប្រជុំរដ្ឋមន្ត្រីការពារជាតិអាស៊ាន-បូក នៅខេត្តសៀមរាប ចាប់ពីថ្ងៃទី២៤ ដល់ថ្ងៃទី២៧ ខែវិច្ឆិកា ឆ្នាំ២០២៥ ក្រោមសហប្រធានដោយឧត្តមសេនីយ៍ទោ កុសល សុវណ្ណវិសាល នាយក នាយកដ្ឋានបញ្ជូនសារ ក្រសួងការពារជាតិ តំណាងរដ្ឋមន្ត្រីក្រសួងការពារជាតិកម្ពុជា និងឧត្តមសេនីយ៍ត្រី ម៉ៃខែល វ៉ៃឌី (Michael REIDY) អគ្គនាយកកងកម្លាំងអភិវឌ្ឍន៍សាយប័រ នៃបញ្ជាការដ្ឋានសាយប័រក្រសួងការពារជាតិអូស្ត្រាលី ព្រមទាំងមានការចូលរួមពីប្រតិភូមកពីបណ្តាប្រទេសជាសមាជិកអាស៊ាន-បូក មជ្ឈមណ្ឌលឧត្តមភាពទិន្នន័យនិងសន្តិសុខសាយប័រ និងតំណាងលេខាធិការដ្ឋានអាស៊ាន សរុបចំនួន ១៨ប្រទេស ។
ឧត្តមសេនីយ៍ទោ កុសល សុវណ្ណវិសាល បានស្វាគមន៍ប្រតិភូដែលបានអញ្ជើញចូលរួម ,ស្វាគមន៍ទីម័រខាងកើតបានក្លាយជាសមាជិកទី១១ របស់អាស៊ាន និងអរគុណដល់សហប្រធានអូស្ត្រាលី ចំពោះការចូលរួមចំណែកដ៏មានតម្លៃ និងកិច្ចខិតខំប្រឹងប្រែង ដើម្បីធានាដល់ដំណើរ ការកិច្ចប្រជុំដោយរលូន និងផ្លែផ្កា ។
លោកឧត្តមសេនីយ៍ទោ បានវាយតម្លៃខ្ពស់ចំពោះវត្តមានប្រតិភូដែលបានចូលរួម ដែលជាការគូសបញ្ជាក់ពីការប្តេ ជ្ញាចិត្ត របស់ប្រទេសសមាជិក និងដៃគូពាក់ព័ន្ធទាំងអស់ ក្នុងការពង្រឹងកិច្ចសហប្រតិបត្តិការ និងបង្កើនសមត្ថភាព អន្តរប្រតិបត្តិការក្នុងតំបន់ ដើម្បីទប់ស្កាត់នឹងការគំរាមកំហែងសន្តិសុខសាយប័រ ដែលជាបញ្ហាប្រឈមសកល ដែល កំពុងបន្តកើតមាន។
ជាមួយគ្នានោះដែរ ឧត្តមសេនីយ៍ត្រី ម៉ៃខែល វ៉ៃឌី (Michael REIDY) ដែលជាសហប្រធានដឹកនាំកិច្ចប្រជុំ បានផ្តួចផ្តើមពិភាក្សាអង្គប្រជុំអំពីផែនការ នៃការធ្វើលំហាត់រួមគ្នា រវាងក្រុមការងារជំនាញចំនួនបី ដូចជា សន្តិសុខសាយប័រ វេជ្ជសាស្ត្រយោធា ជំនួយមនុស្សធម៌ និងគ្រោះមហន្តរាយ នៅចុងឆ្នាំ២០២៦ខាងមុខ នៅប្រទេសឥណ្ឌូណេស៊ី ។
នៅក្នុងកម្មវិធីបើកកិច្ចប្រជុំ ក៏មានការអញ្ជើញចូលរួមពីសំណាក់ ឯកឧត្តម នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស និងជា ADSOM Leader កម្ពុជា បានអញ្ជើញចូលរួម ថ្លែងសុន្ទរកថាក្នុងកម្មវិធី ដោយបានគូសបញ្ជាក់អំពីនយោបាយឈ្នះ-ឈ្នះ ដែលបានដាក់ចេញដោយ សម្តេចតេជោ ហ៊ុន សែន ដើម្បីបិទបញ្ចប់សង្គ្រាមស៊ីវិលនៅកម្ពុជា និងត្រូវបានការពារយ៉ាងរឹងមាំ និងធ្វើទំនើបកម្ម ក្រោមការ ដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។ ឯកឧត្តម បានសង្កត់ធ្ងន់អំពីកាតព្វកិច្ចក្នុងការរួមបញ្ចូលគំនិតនៃ “សន្តិភាព” ជាមួយបរិបទនៃការរីកចម្រើនវិស័យសន្តិសុខសាយប័រ នៅក្នុងសត វត្សទី២១ផងដែរ។
ក្នុងកិច្ចប្រជុំនេះ សហប្រធានទាំងពីរ បានដឹកនាំកិច្ចប្រជុំពិភាក្សា និងការចូលរួមធ្វើបទបង្ហាញចែក រំលែកបទពិសោធន៍ និងឧត្តម្មានុវត្តន៍ របស់សមាជិកចូលរួម ពាក់ព័ន្ធនឹងសន្តិសុខសាយប័រ តាមរបៀបវារៈដែលបាន គ្រោងទុក រួមមាន៖ ធ្វើបច្ចុប្បភាពនិងការប្រើប្រាស់សាកល្បងថ្នាល (Web Portal) ការរៀបចំឯកសារ TOR ដើម្បីនិរន្តរ៍ភាព ដំណើរការផ្ទាល បទបង្ហាញចែករំលែកបទពិសោធន៍ និងឧត្តម្មានុវត្តន៍ពាក់ព័ន្ធនឹងការការពារនិង ការគំរាមកំហែង សន្តិសុខសាយប័រ រួមនឹងការពិភាក្សាជាក្រុមដើម្បីប្រមូលមតិយោបល និងការបញ្ចូលធាតុក្នុងការរៀបចំផែនការ លម្អិតដើម្បីកំណត់គោលដៅ និងកម្មវត្ថុសម្រាប់ធ្វើលំហាត់រួមគ្នារវាងក្រុមការងារជំនាញស្តីពីសន្តិសុខសាយប័រ វេជ្ជ សាស្ត្រយោធា ជំនួយមនុស្សធម៌និងគ្រោះមហន្តរាយ ចុងឆ្នាំ២០២៦ នៅប្រទេសឥណ្ឌូណេស៊ី។
ក្រោយពីបញ្ចប់កិច្ចប្រជុំ សមាជិកប្រតិភូទាំងអស់ ក៏បានអញ្ជើញធ្វើទស្សនកិច្ចទៅកាន់មជ្ឈមណ្ឌល APOPO និងប្រាសាទអង្គវត្ត ដើម្បីឈ្វេងយល់ពី វប្បធ៌ម ប្រពៃណី និងស្ថាបត្យកម្មដ៏រុងរឿងនៃសម័យអង្គរ ផងដែរ។
គួរបញ្ជាក់ថា កិច្ចប្រជុំលើកទី១៣នេះ គឺជាលើកទី២ហើយ ដែលប្រទេសកម្ពុជា ធ្វើម្ចាស់ផ្ទះ ខណៈលើកទី១ ក្នុងឆ្នាំ២០២៤ នៅខេត្តសៀមរាប ជាមួយនឹងគោលដៅជំរុញកិច្ចសហប្រតិបត្តិការជាក់ស្តែង ការលើកកម្ពស់សមត្ថភាព និងភាពធន់ ក្នុងចំណោមប្រទេសជាសមាជិក ពាក់ព័ន្ធនឹងបញ្ហា សន្តិសុខសាយប័រក្នុងតំបន់ ៕
ដោយ ៖ វណ្ណលុក
