(ភ្នំពេញ)៖ សភាពាណិជ្ជកម្ម Dubai នៃប្រទេស អេមីរ៉ាត​អារ៉ាប់រួម បានរៀបចំវេទិការ ធុរកិច្ចជាមួយ​គណៈប្រតិភូឌូបៃ ស្តីពី «ការធ្វើធុរកិច្ចនៅកម្ពុជា» New Horizons: Doing Business with Cambodia ក្នុងគោលបំណងលើកកម្ពស់ការយល់ដឹងអំពីសក្តានុពល និងកាលានុវត្តភាពវិនិយោគនៅកម្ពុជា ។ ក្រសួង ស្ថាប័នពាក់ព័ន្ធកម្ពុជា ដែលសហការចូលរួមឲ្យមាន​វេទិកានេះឡើង នៅថ្ងៃទី២៨ ខែវិច្ឆិកា ឆ្នាំ២០២៥ នៅ​សណ្ឋាគារ Hyatt Regency Phnom Penh រួមមាន ក្រសួងពាណិជ្ជកម្មកម្ពុជា, ក្រុមប្រឹក្សាអភិវឌ្ឍន៍កម្ពុជា និងសភាពាណិជ្ជកម្មកម្ពុជា ។

កម្មវិធីនេះបានអញ្ជើញចូលរួមជាគណៈអធិបតីនៃថ្នាក់ដឹកនាំនៃភាគីទាំងពីររួមមាន ៖ លោកជំ ទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម, អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា, លោក Salem AL Shamsi អនុប្រធានប្រតិបត្តិ នៃសភាពាណិជ្ជកម្មឌូបៃ និងឯកឧត្តម សួន សុផល អគ្គលេខាធិការរងគណៈកម្មា​ធិ​ការ​វិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ។

លោក Salem AlShamsi អនុប្រធានប្រតិបត្តិ ទទួល​បន្ទុកផ្នែកទំនាក់ទំនងអន្តរជាតិនៃសភាឌូបៃ បានមាន​ប្រសាសន៍ថា ៖ “សភាពាណិជ្ជកម្ម Dubai ប្តេជ្ញាចិត្ត​ជំរុញក្រុមហ៊ុនដែលមានមូលដ្ឋាននៅទីក្រុងឌូបៃ ដើម្បី​កសាងភាពជាដៃគូដ៏រឹងមាំនៅទីផ្សារអាទិភាព និងបើក​ផ្លូវថ្មីសម្រាប់ការពង្រីកអន្តរជាតិ ។ សកម្មភាពទាំងនេះ គាំទ្រដល់កំណើនប្រកបដោយនិរន្តរភាព នៃសហគមន៍​ធុរកិច្ចរបស់ទីក្រុងឌូបៃ និង ពង្រឹងកេរ្តិ៍ឈ្មោះរបស់​អេមីរ៉ាត​នេះជាមជ្ឈមណ្ឌលអាជីវកម្មឈានមុខគេ​លើ​ពិភពលោក។”

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នៅក្នុងឱកាសនោះដែរ ក៏បានសង្កត់ធ្ងន់ពីសារៈសំខាន់​នៃភាពជាដៃគូនៃប្រទេសទាំងពីរ ដោយបញ្ជាក់ថា «ការ​វិនិយោគនៅកម្ពុជានេះ មិនមែនសំដៅលើតែទីផ្សារក្នុង​ស្រុកដែលមានប្រជាជន ១៧លាននាក់ប៉ុណ្ណោះទេ តែ​កម្ពុជាជាច្រកទ្វារដ៏សំ ខាន់ទៅកាន់ទីផ្សារអ្នកប្រើប្រាស់ ៦៨០លាននាក់ នៅក្នុងតំបន់អាស៊ានទាំងមូល ហើយ​កម្ពុជា​ជាមជ្ឈមណ្ឌលផលិតកម្ម និងភស្តុភារយុទ្ធសាស្ត្រ​»​។

សូមបញ្ជាក់ថា ដើម្បីជំរុញទំនាក់ទំនងសេដ្ឋកិច្ច​រវាង​កម្ពុជា និងអេមីរ៉ាត់អារ៉ាប់រួម និងដើម្បីជាការផ្សព្វផ្សាយ​ឲ្យបានទូលំទូលាយ និងយល់ច្បាស់ពីគោលបំណង​នៃ​វេទិការនេះ អ្នករៀបចំក៏បានអញ្ជើញក្រុមហ៊ុន​ឯកជន​កម្ពុជា និងអេមីរ៉ាតអារ៉ាប់រួម ប្រមាណ ២៥០ក្រុមហ៊ុន ឲ្យចូលរួមផងដែរ ដែលពាក់ព័ន្ធនឹងវិស័យ កសិកម្ម ម្ហូប​អាហារ បដិសណ្ឋារកិច្ចទេសចរណ៍ សុខាភិបាល គ្រឿង​សំអាង យានយន្ត សំណង់ គ្រឿងអេឡិចត្រូនិក ប្រេង​រំអិល និងផ្នែកប្រឹក្សាយោបល់ ជាដើម ។

លោកជំទាវ តឹករ៉េត កំរង នៅក្នុងឱកាសនោះ បានលើក​ឡើងពីកាលានុវត្តភាពពាណិជ្ជកម្ម និងវិនិយោគសំ​ខា​ន់ៗ ដែលត្រូវបានបង្កើតឡើងក្រោមក្របខណ្ឌកិច្ច​ព្រម​ព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមី​រ៉ាតអារ៉ាប់រួម ជាពិសេសក្នុងវិស័យកសិកម្មកសិ-កែច្នៃ ភស្តុភារ និងទេសចរណ៍ ។

លោកជំទាវ បានលើកទឹកចិត្តវិនិយោគិន អេមីរ៉ាតអារ៉ាប់​រួម ឱ្យសិក្សាស្វែងយល់ពីវិស័យសក្ដានុពលរបស់កម្ពុជា និងបានជម្រាបជូនអំពីត្រៀមខ្លួនជាស្រេចរបស់ ក្រសួង​ពាណិជ្ជកម្ម ក្នុងការសម្របសម្រួល និងគាំទ្រដល់ធុរជន និងវិនិយោគិនទាំងអស់ក្នុងការធ្វើធុរកិច្ចនៅកម្ពុជា ។

ឯកឧត្តម សួន សុផល អគ្គលេខាធិការរងគណៈ​កម្មាធិ​ការ​​វិនិយោគកម្ពុជា បានថ្លែងប្រាប់ទៅកាន់វេទិការ​ទាំង​មូលអំពី ស្ថានភាពបច្ចុប្បន្ន និងទស្សនវិស័យ នៃកិច្ច​សហប្រតិបត្តិការវិនិយោគទ្វេភាគី សំដៅលើក​ទឹកចិត្ត​ឱ្យធុរជន អេមីរ៉ាតអារ៉ាប់រួម បង្កើនការវិនិយោគរបស់ខ្លួន​នៅកម្ពុជា ។

ឯកឧត្តមក៏បានគូសរំលេចអំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការធានាឱ្យបាននូវស្ថិរភាពនយោបាយ និងលំនឹងម៉ាក្រូសេដ្ឋកិច្ច, ពិពិធកម្មទីផ្សារនាំចេញ, គោលនយោបាយដែលចាត់ទុកវិស័យឯកជនជាក្បាលម៉ាស៊ីនជំរុញកំណើនសេដ្ឋកិច្ចជាតិ, និងវឌ្ឍនភាពថ្មី​នៃ​ការអភិវឌ្ឍសង្គម-សេដ្ឋកិច្ចផងដែរ ៕

អត្ថបទ ៖ គង់ សុផុល
រូបភាព ៖ សួង ពិសិដ្ឋ