(ព្រះសីហនុ)៖ រដ្ឋបាលខេត្តព្រះសីហនុ បានចេញសម្រេចបង្កើតអនុគណៈកម្មការខេត្ត ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្នុងភូមិសាស្ត្រខេត្តព្រះសីហនុ។ យោងតាមរយៈសេចក្តីសម្រេចចុះថ្ងៃទី២៤ ខែវិច្ឆិកា ឆ្នាំ២០២៥ ​ អនុគណៈកម្មការនេះ ដឹកនាំដោយឯកឧត្តម ម៉ាង ស៊ីណេត អភិបាលនៃគណៈអភិបាលខេត្ត ជាប្រធាន អមដោយអនុប្រធាន៤រូប និងសមាជិក សមាជិក ជាច្រើនរូបទៀត។

អនុគណៈកម្មការខេត្ត ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្នុងភូមិសាស្ត្រ ខេត្តព្រះសីហនុ មានតួនាទី និងភារកិច្ចដូចខាងក្រោម៖

• សហការសម្របសម្រួលជាមួយគណៈកម្មការជាតិ រដើម្បីទប់ស្កាត់ និងបង្ក្រាបបទល្មើសធនធាន ធម្មជាតិ
• ចុះទប់ស្កាត់ និងបង្ក្រាបបទល្មើសធនធានធម្មជាតិ ដូចជា ការកាប់ព្រៃឈើ ការដឹកឈើ និងការ នាំចេញឈើខុសច្បាប់ ការចាប់សត្វព្រៃ និងការនាំចេញសត្វព្រៃខុសច្បាប់ការទន្ទ្រានយកដីរដ្ឋ ព្រមទាំងការរុករករ៉ែដោយខុសច្បាប់នៅក្នុងភូមិសាស្ត្រខេត្តព្រះសីហនុ
• អង្កេត និងស្រាវជ្រាវរកអ្នកប្រព្រឹត្ត និងអ្នកពាក់ព័ន្ធ និងសកម្មភាពបទល្មើសធនធានធម្មជាតិ
• ចាប់ជនល្មើស និងវត្ថុតាង នៃបទល្មើសធនធានធម្មជាតិ ហើយរៀបចំកសាងសំណុំរឿងបញ្ជូនទៅ តុលាការតាមនីតិវិធី
• អនុប្រធាន និងសមាជិក-សមាជិកា នៃអនុគណៈកម្មការនេះ ត្រូវចូលរួមបំពេញការងារ និងចូលរួម កិច្ចប្រជុំតាម ការកោះអញ្ជើញរបស់ប្រធានអនុគណៈកម្មការ ក្នុងករណីប្រធានអវត្តមាន ប្រធានត្រូវ ចាត់តាំងអនុប្រធានមួយរូប ដើម្បីដឹកនាំកិច្ចប្រជុំជំនួស
• អនុគណៈកម្មការមានសិទ្ធិប្រើប្រាស់មន្ត្រីក្រោមឱវាទ ដើម្បីជួយការងារតាម តម្រូវការចាំបាច់ ជាក់ស្តែង
• រាល់ការចុះអនុវត្តការងារត្រូវមានកំណត់ហេតុ និងរបាយការណ៍អំពីលទ្ធផល នៃការអនុវត្តការងារ ជូនគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ៕

ដោយ៖ង៉ាន់ ទិត្យ