កាកបាទក្រហមកម្ពុជាផ្តល់អំណោយមនុស្សធម៌ជាលើកទី១៩ ជូនជនមានពិការភាព នៃមជ្ឈមណ្ឌលបណ្តុះបណ្តាលវិជ្ជាជីវៈជនពិការភ្នែក
ភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់លោកជំទាវ ម៉ែន នារីសោភ័គ អគ្គលេខាធិការរងទី១កាកបាទក្រហមកម្ពុជា និងសហការី ចុះសួរសុខទុក្ខ និងនាំយកអំណោយ មនុស្សធម៌ជាគ្រឿងឧបភោគ-បរិភោគ សម្ភារៈប្រើប្រាស់ និងថវិកា ១០លានរៀល ជាលើកទី១៩ ជូនដល់ជនមានពិការភាព ចំនួន ១៥០នាក់ នៃមជ្ឈមណ្ឌលបណ្តុះបណ្តាលវិជ្ជាជីវៈជនពិការភ្នែក (សមាគមតន្ត្រីសំនៀងជនពិការ) ដែលមានទីតាំងស្ថិត នៅភូមិជំរៅ សង្កាត់គោករកា ខណ្ឌព្រែកព្នៅ រាជធានីភ្នំពេញ ។
ក្នុងកម្មវិធីកាលពីថ្ងៃទី៨ ខែធ្នូ ឆ្នាំ២០២៥ ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានសមាគមតន្ត្រីសំនៀងជនពិការបានសម្ដែងនូវការអរគុណយ៉ាងក្រៃលែងចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាមាតាមនុស្សធម៌ តែងគិតគូរ យកចិត្ត ទុកដាក់ និងជួយឧបត្ថម្ភដល់ក្រុមជនពិការជាបន្តបន្ទាប់ដោយមិនមានការរើសអើងអ្វីឡើយ ។
ឆ្លៀតក្នុងឱកាសនោះលោកជំទាវ ញ៉ែម មរកត ក៏បានលើកឡើងថាសមិទ្ធផលនានាដែលសម្តេចព្រះមហាក្សត្រី ព្រះវររាជ មាតាជាតិខ្មែរ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែបានជួយដល់សមាគមនាពេលកន្លងមក។
ក្នុងឱកាសនេះដែរលោកជំទាវ ម៉ែន នារីសោភ័គ បានថ្លែងនូវការកោតសរសើរចំពោះ ក្មួយៗពិការកាយសម្បទា ដែលខិតខំ ជម្នះការលំបាក តស៊ូជម្នះគ្រប់ឧបសគ្គរហូតមកដល់ពេលនេះ ជាពិសេសបានអភិវឌ្ឍន៍សមត្ថភាពរបស់ខ្លួន ទាំងការបណ្តុះបណ្តាលវិជ្ជាជីវៈជំនាញ រួមទាំងការចាប់យកចំណេះដឹងថ្មីៗពីបច្ចេកវិទ្យាឌីជីថល និងនវានុវត្តន៍។
លោកជំទាវក៏បានថ្លែងអំណរគុណដល់សប្បុរសជនគ្រប់មជ្ឈដ្ឋាន ដែលតែងតែជួយ ឧបត្ថម្ភគាំទ្រដល់សមាគមជាបន្តបន្ទាប់ ដែលឆ្លុះបញ្ចាំងពីកម្លាំង ឆន្ទៈ ក្នុងស្មារតីចែករំលែក ។
សូមជម្រាបថាអំណោយជាលើកទី១៩ រួមមាន៖ អង្ករ ២តោន, អង្គរសុខភាព ២០កេស, មី២០កេស, ត្រីខ៥កេស, ទឹកស៊ីអ៊ីវ ៥យូរ, ទឹកត្រី ៥យូរ, ទឹកក្រូច ១០កេស, ទឹកបរិសុទ្ធ ១០កេស, ឃីត (មុង ភួយ សារុង ក្រមា) ១៥០កញ្ចប់ និងថវិកា ១០លាន រៀល។ ជាមួយគ្នានេះ ជនមានពិការភាព ១៥០នាក់ទទួលបានអាហារសម្រន់ និងថវិកាមួយចំនួន៕
ដោយ ៖ គ្រី សម្បត្តិ
