សៀមរាប៖អាជ្ញាធរជាតិអប្សរាបានរៀបចំពិធីបួងសួងសុំសេចក្តីសុខជូនព្រះរាជាណាចក្រកម្ពុជា នៅខាងមុខប្រាសាទអង្គរ ក្នុងពិធីបុណ្យរំលឹកគុណអង្គរ ខណៈបុណ្យរំលឹកគុណអង្គរនឹងប្រព្រឹត្តទៅរយៈពេលបីថ្ងៃចាប់ពីថ្ងៃទី១៤ ដល់ថ្ងៃទី១៦ ខែធ្នូ
ឆ្នាំ២០២៥។

ពិធីបួងសួងសុំសេចក្តីសុខជូនព្រះរាជាណាចក្រកម្ពុជាដែលរៀបចំឡើងកាលពីព្រឹកថ្ងៃទី១៤ ខែធ្នូ ឆ្នាំ២០២៥​បានប្រព្រឹត្តិ​ទៅក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុម​ប្រឹក្សា​ភិបាលអាជ្ញាធរជាតិអប្សរានិងចូលរួមទាំងថ្នាក់ដឹកនាំនៃអាជ្ញាធរជាតិអប្សរា ថ្នាក់ដឹកនាំរដ្ឋបាលខេត្តសៀមរាប ថ្នាក់ដឹកនាំ​មន្ទីរអង្គភាពពាក់ព័ន្ធ មន្ត្រី បុគ្គលិកអាជ្ញាធរជាតិអប្សរាយ៉ាងច្រើនកុះករ។

ដោយឡែកពិធីបួងសួងនៃពិធីបុណ្យរំលឹកគុណអង្គរ គឺក្នុងគោលបំណងរំលឹកគុណដល់បុព្វបុរសខ្មែរ ដែលជាអ្នក​កសាងប្រាសាទ​អង្គរ រួមនិងប្រាសាទបុរាណជាច្រើទៀត ដែលបានបន្សល់ទុកមរតកដ៏មានតម្លៃ សម្រាប់កូនខ្មែរជំនាន់ក្រោយ ព្រមទាំងសុំ​ឱ្យ​មានសេចក្តីសុខសន្តិភាព ដល់មាតុភូមិកម្ពុជាទាំងមូល និងឧទ្ទិសកុសលផលបុណ្យជូនចំពោះវិញ្ញាណក្ខន្ធបុព្វបុរសខ្មែរ វីរកងទ័ព​ខ្មែរគ្រប់ៗជំនាន់ ដែលបានពលីក្នុងបុព្វហេតុការពារទឹកដី និងជាតិមាតុភូមិ ផងដែរ។

ក្រៅពីពិធីបួងសួងដែលនិមន្តព្រះសង្ឃស្វាធ្យាយជយន្តោ និងបង្សុកូលឧទ្ទិស ចំពោះវិញ្ញាណក្ខន្ធបុព្វបុរស វីរជននៃកង​កម្លាំង​ប្រដាប់អាវុធគ្រប់ប្រភេទ លោកជំទាវបណ្ឌិតសភាចារ្យ ភឿង សកុណា ក៏បានអញ្ជើញទៅអុជធូបបួងសួង នៅតាមទីសក្តិសិទ្ធិ​ជាច្រើនកន្លែង ក្នុងបរិវេណប្រាសាទអង្គរវត្ត៕
ដោយ៖គង់ សុផុល