ភ្នំពេញ៖ ប្រហែលជាគ្មានពេលវេលាណាដែលគ្រោះថ្នាក់ លំបាក និងពោរពេញទៅដោយសម្ពាធហើយនឹងភាពតានតឹង​នៅអំឡុងពេលសមរភូមិប្រយុទ្ធនាពេលដែលយប់ងងឹតឈានចូលមកដល់នោះទេ។ ទោះបីជាតំបន់អាស៊ីអាគ្នេយ៍មាន​អាកាសធាតុក្ដៅយ៉ាងណាក៏ដោយ នារដូវរំហើយមានខ្យល់ធ្លាក់ពីខាងជើងនេះ ប្រទេសយើងមានអាកាសធាតុត្រជាក់​ខុស​ពីធម្មតាគ្របដណ្តប់ជុំវិញតំបន់ព្រៃក្រាស់ ហើយគឺគ្មានទីកន្លែងណាដែលមានអារម្មណ៍ត្រជាក់ស្រឹបជាងនៅសមរភូមិជួរមុខ​នៃជម្លោះរវាងប្រទេសកម្ពុជា ជាមួយប្រទេសថៃនោះឡើយ។

វីរកងទ័ពកម្ពុជាបានដើរល្បាត និងឃ្លាំមើលនៅតាមបណ្ដោយព្រំដែនយ៉ាងប្រុងប្រយ័ត្ន ក្នុងការស្វែងរកសកម្មភាពឬចលនាណា​មួយ ដែលចង្អុល បង្ហាញអំពីការវាយប្រហារដែលខិតជិតមកដល់។ ក្នុងករណីនេះ វីរកងទ័ពកម្ពុជាមិនត្រឹមតែសង្កេតមើល​សកម្មភាព​ទាំងនោះដោយភាពស្ងៀមស្ងាត់តែប៉ុណ្ណោះទេ ប៉ុន្តែវីរកងទ័ពកម្ពុជា ថែមទាំងធ្វើប្រតិបត្តិការយ៉ាងសកម្មក្នុង​ការ​ប្រយុទ្ធយ៉ាងខ្លាំងក្លាដោយប្រើប្រាស់កាំភ្លើងធំ កាំភ្លើងយន្តធុនធ្ងន់ និងអាវុធផ្សេង ទៀតដើម្បីទប់ទល់នឹងយោធាថៃដែលព្យាយាម​វាយដណ្តើមកាន់កាប់ ទឹកដីកម្ពុជា និងបំផ្លាញសមត្ថភាពក្នុងការការពារខ្លួនរបស់វីរកងទ័ពកម្ពុជានៅតាមតំបន់ទាំងនោះ។

វាពិតជាពិបាកក្នុងការស្រមៃ សូម្បីតែយល់អំពីការប្រយុទ្ធដ៏គ្រោះថ្នាក់ជាទីបំផុតដែលវីរកងទ័ពកម្ពុជាកំពុងប្រឈម។ ក្រៅពីស្ថានភាពស្ងប់ស្ងាត់ដែលវីរកងទ័ពកម្ពុជាមួយចំនួនកំពុងរង់ចាំបើកការវាយប្រហារទប់ទល់ ឬស្ថានភាពហិង្សាដ៏សាហាវដែល​វីរកង​ទ័ព​កម្ពុជា​មួយចំនួនទៀតកំពុងប្រឈមមុខ ក្នុងការការពារឬវាយបណ្តេញទាហានថៃចេញពីទឹកដីប្រទេសកម្ពុជាក៏ដោយ ក៏មានស្ថានភាពតានតឹងមួយទៀតដែលកើតមានឡើងជាទូទៅចំពោះវីរកងទ័ពយើងដែលឈរជើងនៅសមរភូមិ នោះគឺការប្រឹង​ជម្នះ​ជាមួយនឹងអាកាសធាតុដ៏ត្រជាក់នាពេលយប់ងងឹត ការប្រុងស្មារតី និងការលំបាកក្នុងការសម្រាន្តដោយភាពស្ងៀមស្ងាត់ ហើយតែងតែ ត្រៀមខ្លួនជានិច្ចសម្រាប់សកម្មភាពឆ្លើយតបជាបន្ទាន់ណាមួយ ខណៈវីរកងទ័ពសម្រាកមិនដែលបានគ្រប់​គ្រាន់ហើយដែលហួសពីការទ្រាំទ្រដ៏លំបាកទៅទៀត។

លើសពីនេះ គឺភាពអស់កម្លាំងបន្ទាប់ពីការធ្វើដំណើរដ៏វែងឆ្ងាយ និងជួនកាល វីរកងទ័ពកម្ពុជាស្ថិតក្រោមការវាយប្រហារ​ទាំងកំពុងកាន់សព្វាវុធធ្ងន់ៗ ឬចូលរួមក្នុងសមរភូមិដ៏សាហាវឃោរឃៅ។ ជាងនេះទៅទៀត វីរកងទ័ពកម្ពុជានៅជួរមុខ​ត្រូវប្រឈមមុខនឹងភាពលំបាកផ្នែកផ្លូវចិត្តដែលកើតមានឡើងនាពេលខ្លះ ដោយសារភាពឯកោពីក្រុមគ្រួសារ មិត្តភក្តិ និងអនាគតរបស់ ខ្លួនដែលមិនអាចកំណត់បានជាមុន។ ភាពតានតឹងនៃជម្លោះនេះ និងការប្រឈមអំឡុងពេលប្រតិបត្តិការ​ប្រយុទ្ធនៅពេលយប់ងងឹត គឺមិនអាចពិពណ៌នាបានគ្រប់ជ្រុងជ្រោយដោយសេចត្តីអត្ថាធិប្បាយខ្លីបែបនេះទេ ប៉ុន្តែយ៉ាងហោច​ណាស់ យើងទទួលស្គាល់ថានេះគឺជាការតស៊ូ និងទុក្ខលំបាកពិតរបស់ វីរកងទ័ពកម្ពុជាដែលការពារប្រទេសកម្ពុជារបស់យើង។

វាគឺជាការពិតដែលបច្ចេកវិទ្យាទំនើបនាពេលបច្ចុប្បន្នអាចឱ្យកងទ័ពធ្វើប្រតិបត្តិការនៅពេលយប់ ប៉ុន្តែទោះបីជាមានបច្ចេកវិទ្យា​ទំនើបឬ ក្រៅពីនេះក៏ដោយ ក៏មិនអាចលុបបំបាត់បញ្ហាប្រឈមនិងភាពស្មុគស្មាញ ដែលកើតមានឡើងអំឡុងពេល​សង្គ្រាម​បានដែរ។ ខណៈពេលដែលបច្ចេកវិទ្យាមានសារៈសំខាន់ និងចាំបាច់បំផុត សម្រាប់ពង្រឹងសមត្ថភាពរបស់កងទ័ព​ក្នុងការប្រឈមនឹងសត្រូវដែល មានបច្ចេកវិទ្យាទំនើបក៏ដោយ ភាពអង់អាចក្លាហាន វិន័យ និងការតាំងចិត្តដោយភាពស្ងៀម​ស្ងាត់គឺមានសារៈសំខាន់ និងចាំបាច់ហើយដែលវីរកងទ័ពកម្ពុជានៅជួរមុខបានកំណត់នូវភាពរឹងប៉ឹង និងការឆ្លើយតបប្រកប ដោយភាពចាស់ទុំរបស់ខ្លួន ចំពោះការឈ្លានពានដ៏សាហាវព្រៃផ្សៃពីសំណាក់យោធាថៃ។

អនាគតនៃយុទ្ធសាស្ត្រសង្គ្រាមត្រូវបានពិពណ៌នាជារឿយៗថា គឺជាអនាគតដែលពឹងផ្អែកកាន់តែខ្លាំងឡើងលើសព្វាវុធទំនើប និងបច្ចេកវិទ្យាព័ត៌មាន ប៉ុន្តែទោះបីជាយ៉ាងណាក៏ដោយ ក៏ភាពខ្លាំងនៃមេបញ្ជាការ វិន័យកងទ័ព និងតម្លៃនៃកងទ័ពគឺនៅ​តែមាន​សារៈសំខាន់ ក្នុងការធានាបាននូវជ័យជម្នះនាពេលអនាគត ក៏ដូចជានៅក្នុងពេលបច្ចុប្បន្ន។ ដូច្នេះប្រជាជនខ្មែរមាន​ហេតុផលគ្រប់គ្រាន់ក្នុងការមានមោទកភាព និងការជឿជាក់ទៅលើវីរកងទ័ពកម្ពុជារបស់ខ្លួន។
 
ដោយ៖ ឆាំង យុ នាយកមជ្ឈមណ្ឌលឯកសារកម្ពុជា
ថ្ងៃទី១២ ខែធ្នូ ឆ្នាំ២០២៥