ភ្នំពេញ៖ ឯកឧត្តម នង សាកល អនុរដ្ឋលេខាធិការក្រសួងការបរទេស បានប្រាប់បណ្តាអង្គទូតប្រចាំនៅកម្ពុជាថា បញ្ហាមីនជា​និទានក​ថាដដែល ដែលប្រទេសថៃតែងប្រើប្រាស់ដើម្បីបំភាន់ភ្នែកអន្តរជាតិ ចំពោះទង្វើឈ្លានពានរបស់ខ្លួនលើទឹកដីកម្ពុជា ខណៈយោធា
ថៃនៅតែបន្តបាញ់ប្រហារចូលទីតាំងស៊ីវិលក្នុងថ្ងៃសុក្រទី២៦ ធ្នូនេះ។

ក្នុងជំនួបជាមួយ តំណាងស្ថានបេសកកម្មការទូតប្រចាំនៅ​កម្ពុជាចំនួន២១កាលពីល្ងាចថ្ងៃទី២៥ ធ្នូ ឆ្នាំ២០២៥ នៅ​ទីស្តីការ​ក្រសួង ឯកឧត្តម នង សាកល អនុរដ្ឋលេខាធិការក្រសួងការ​បរទេស និងសហប្រតិបត្តិការអន្តរជាតិ បានលើកឡើងពី​ស្ថានការណ៍​ព្រំដែនកម្ពុជា-ថៃ ចំនួនប្រាំចំណុច។ក្នុងនោះមានអំពី​កិច្ចប្រជុំលេខាធិការដ្ឋាននៃគណៈកម្មាធិការព្រំដែន​ទូទៅ​កម្ពុជា-ថៃ(GBC) ដែលកំពុងប្រព្រឹត្តទៅពីថ្ងៃទី២៤ខែធ្នូសម្រាប់​កិច្ចប្រជុំរយៈពេលបីថ្ងៃ​។សកម្មភាព​ការវាយប្រហារដោយ​ប្រដាប់អាវុធយ៉ាង​គឃ្លើន​ដោយកងកម្លាំងប្រដាប់អាវុធ​ថៃមកលើទឹកដីកម្ពុជា មិនរើសទីតាំងរបស់កងកម្លាំងប្រដាប់អាវុធថៃ មកលើតំបន់ដែលមានប្រជាជនរស់នៅរបស់កម្ពុជា ក្នុងខេត្តបន្ទាយមានជ័យ ពោធិ៍សាត់ ឧត្តរមានជ័យ បាត់ដំបង ព្រះវិហារ និងខេត្តកោះកុង។

មានចំណុចមួយទៀតដែលមន្រ្តីក្រសួងការបរទេសកម្ពុជា បានទាញការចាប់អារម្មណ៍ពីបណ្ដាអង្គទូតចូលរួមនោះគឺបញ្ហាមីន។ ឯកឧត្តម នង សាកល ដែលប្រទេសថៃប្រើប្រាស់ជានិទានកថា ដើម្បីបំភាន់ភ្នែកអន្តរជាតិ ចំពោះទង្វើឈ្លានពានរបស់ខ្លួនលើ​ទឹកដីកម្ពុជា ។

ឯកឧត្តម នង សាកល បានបញ្ជាក់ឡើងវិញ នូវការប្តេជ្ញាចិត្តយ៉ាងម៉ឺងម៉ាត់ និងខ្ជាប់ខ្ជួនរបស់កម្ពុជា ចំពោះបទឈប់បាញ់ភ្លាមៗ និងការរក្សាសន្តិភាព និងស្ថិរភាព ព្រមទាំងអនុវត្តការអត់ធ្មត់ជាអតិបរមា និងបន្តផ្តល់អាទិភាពលើកិច្ចសន្ទនា ការទូត និង​ដំណោះស្រាយជម្លោះដោយសន្តិវិធី ស្របតាមច្បាប់អន្តរជាតិ និងយន្តការដែលមានស្រាប់រវាងប្រទេសទាំងពីរ មានដូចជា បទឈប់បាញ់ថ្ងៃទី២៨ ខែកក្កដា ឆ្នាំ២០២៥ និង សេចក្តីថ្លែងការណ៍រួមទីក្រុងគូឡាឡាំពួ ថ្ងៃទី ២៦ ខែតុលា ឆ្នាំ ២០២៥ ។

ដោយឡែកស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តធ្វើសកម្មភាពបាញ់ប្រហារចូលទី​តាំងប្រជាជនស៊ីវិលកម្ពុជា និងហេដ្ឋារចនាសម្ព័ន្ធស៊ីវិល នៅយោធភូមិភាគទី៥ ក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ នាថ្ងៃទី២៦ ខែធ្នូ ឆ្នាំ២០២៥។នេះបើតាមការបញ្ជាក់របស់ក្រសួងការពារជាតិ៕

អត្ថបទ ៖ គង់ សុផុល
រូបភាព ៖ ក្រសួងការបរទេស