ភ្នំពេញ៖ឯកឧត្តមឧបនាយករដ្ឋមន្រ្តី ស៊ុន ចាន់ថុល មានប្រសាសន៍​ថា កម្ពុជាកំពុងតែបន្តការចរចារជាមួយសហរដ្ឋអាម៉េរិក ដើម្បីផ្តល់​ការបញ្ចុះពន្ធបដិការបន្ថែមទៀតលើវិស័យមួយចំនួន ក្នុងនោះ វិស័យកាត់ដេរ វិស័យស្បែកជើង សម្ភារៈធ្វើដំណើរ​ជាដើម ។

ថ្លែងក្នុងពិធីបិទសន្និបាតបូកសរុបលទ្ធផលការងារក្រសួងពាណិជ្ជកម្មឆ្នាំ២០២៥ និងទិសដៅការងារ សម្រាប់ឆ្នាំ២០២៦កាលពី
រសៀល​ថ្ងៃទី៩ ខែមករា ឆ្នាំ២០២៦ ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា តំណាង​ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី​បានប្រាប់អង្គសន្និបាតថា តាមរយៈកិច្ចចរចា​ពន្ធ​បដិការក៏ដូចជាកិច្ច​ព្រមព្រៀង​ពាណិជ្ជកម្មរវាងកម្ពុជានិងសហរដ្ឋអាមេរិក បានបង្កើននូវ​ទំនុកចិត្តទាក់ទាញអ្នកវិនិយោគ ការ​ពង្រឹង​ខ្សែច្រវាក់ផ្គត់ផ្គង់ ដែលគាំទ្រ​ដល់ការនាំចេញ និងការបង្កើតការងារបន្ថែមជូនដល់​បងប្អូន​ប្រជាពលរដ្ឋ។ទន្ទឹមនឹង​នេះកម្ពុជា​ក៏កំពុងតែបន្តការចរចារ​ជាមួយសហរដ្ឋអាម៉េរិក ដើម្បីផ្តល់ការបញ្ចុះពន្ធបដិការបន្ថែម​ទៀតលើវិស័យមួយចំនួន ក្នុងនោះមាន វិស័យកាត់ដេរ វិស័យស្បែក​ជើង សម្ភារៈធ្វើដំណើរជាដើម ។ឯកឧត្តមបន្ថែមថា ការបន្តសុំការ​ចរចារលើវិស័យទាំងនេះ​ធ្វើយ៉ាង​ណា​ដើម្បីឱ្យអាម៉េរិកបន្តបញ្ចុះ​ពន្ធបដិការនេះថែមទៀតពី១៩ ភាគរយ មកនៅក្រោមនេះ ឬអាចដល់សូន្យភាគរយ ។

បើតាមឯកឧត្តមឧបនាយករដ្ឋមន្រ្តីបានបញ្ជាក់ គឺក្រុមការងារចរចា​ពន្ធបដិការ បានដាក់លិខិតស្នើសុំដែលមាន២.៨០០បន្ទាត់ ទៅ​សហរដ្ឋ​អាម៉េរិក ដើម្បីពិនិត្យមើលបន្ទាត់​ពន្ធមួយណាអាចបញ្ចុះ​ទាប រហូតដល់សូន្យភាគរយ។

គួររំលឹកថា កិច្ចចរចាពន្ធបដិការក៏ដូចជាកិច្ចព្រមព្រៀងពាណិជ្ជកម្ម រវាងកម្ពុជានិងសហរដ្ឋអាម៉េរិកបានធ្វើឡើងរយៈពេល៧ខែ ពោល​គឺចាប់តាំងថ្ងៃពី១៧ ខែមេសា ឆ្នាំ២០២៥ តាមប្រពន្ធអនឡាញ និង​ការចរចារផ្ទាល់ និងបានបញ្ចប់ជាស្ថាពរ និងបានចុះ​ហត្ថលេខា​ជាមួយគ្នាបញ្ចប់ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងឯកឧត្តម ដូណាល់ ត្រាំ ប្រធានា​ធិបតី​សហរដ្ឋអាម៉េរិក នៅទីក្រុងកូឡាឡាំពួ ប្រទេសម៉ាឡេស៊ី កាលពី​ថ្ងៃទី២៦ ខែតុលា ឆ្នាំ២០២៥ ។កម្ពុជា ជាប្រទេសទី១​បានបញ្ចប់ នូវការចរចារពាណិជ្ជកម្មពន្ធបដិការជាមួយសហរដ្ឋអាម៉េរិក ខណៈម៉ាឡេស៊ីជាប្រទេសទី២។

សម្រាប់ឆ្នាំ២០២៥ កម្ពុជាក៏បានជោគជ័យក្នុងការធ្វើពិពិធកម្មលើមុខ​ទំនិញដោយការពង្រីក ការផលិត ការនាំចេញ កសិកម្ម​កែច្នៃ ឧស្សាហកម្ម​ធុនស្រាល និងអេឡិចត្រូនិច ហើយបន្ថយការពឹងផ្អែក​ទៅលើផលិតផលកាត់ដេរ និងវត្ថុធាតុដើម ដែលមិន​ទាន់កែច្នៃ។ឯកឧត្តម ស៊ុន ចាន់ថុល បានគូសរំលេចបន្ថែមនូវចំណុចនេះថា​ជាក់ស្តែងភាគរយនៃការនាំចេញ​ផលិត​ផល​សំលៀកពាក់ កាត់ដេរ ស្បែកជើងនិង សម្ភារៈធ្វើដំណើរបានថយចុះពី៩១ភាគរយ​ក្នុងឆ្នាំ២០០០ មកប្រមាណ​៣៧,៨៩​ភាគរយ​ក្នុងឆ្នាំ២០២៥ ខណៈទំនិញកម្មន្តសាលមិនមែនកាត់ដេរ មានគ្រឿងបង្គុំអេឡិច​ត្រូនិក កង់ សំបកកង់យានយន្ត គ្រឿងសង្ហារឹម រួមទាំងកសិកផល​កែច្នៃ បានកើនឡើងពី៩ភាគរយ ទៅ៦២,១១ភាគរយនៅក្នុងរយៈ​ពេល​ដូចគ្នា ។

ដើម្បីឱ្យកម្ពុជា ឈានទៅរកប្រទេសមានចំណូលខ្ពស់នៅឆ្នាំ២០៥០ កម្ពុជាមិនអាចពឹងផ្អែកលើវិស័យកាត់ដេរ សម្លៀកបំពាក់ សម្ភារៈ​ធ្វើដំណើរតែមួយមុខនោះទេ។នេះបើតាមឯកឧត្តម​ឧបនាយក​រដ្ឋមន្រ្តី ស៊ុន ចាន់ថុល។

ចំណែកលោកជំទាវ ចម និម្មល រដ្ឋមន្រ្តីក្រសួងពាណិជ្ជកម្មបាន​រំលេចពីស្ថានភាពពាណិជ្ជកម្មថា ស្ថានភាពពាណិជ្ជកម្ម​អន្តរជាតិ​ក្នុងឆ្នាំ២០២៥សម្រេចបានចំនួន ៦២,២៤ពាន់លានដុល្លារអាម៉េរិក កើនឡើងក្នុងរង្វង់១៨ភាគរយ បើធៀបនិងឆ្នាំ២០២៤ ក្នុងនោះ​ការនាំចេញសម្រេចបានទឹកប្រាក់ ៣១.២៨ពាន់លានដុល្លារកើន​ឡើង១៧ភាគរយ ។ទីផ្សារនាំចេញសំខាន់ៗរបស់កម្ពុជា រួមមាន​ អាមេរិក៤១ភាគរយ អាស៊ាន១៨ភាគរយ សហភាពអឺរ៉ុប ១៦ ភាគរយ។ចំណែកការនាំចេញ និងការនាំចូលបាន​ឈាន​ប្រហាក់​ប្រហែលគ្នា ដែលកំណើននៃការនាំចេញនេះបង្ហាញពីប្រសិទ្ធភាព​នៃកិច្ចចរចារសហប្រតិបត្តិការជាមួយដៃគូសំខាន់ៗ។

គប្បីជម្រាបជូនថា ក្រុមប្រឹក្សាអភិវឌ្ឍន៍កម្ពុជានៅឆ្នាំ២០២៣បាន​អនុម័ត​២៦៣គម្រោង ,នៅឆ្នាំ២០២៤ បានអនុម័ត៤១៤​គម្រោង​ដែលជាប្រវត្តិសាស្រ្តរបស់ក្រុមប្រឹក្សាអភិវឌ្ឍន៍ជាតិកម្ពុជា រយៈពេល​៣០ឆ្នាំចុងក្រោយនេះ ខណៈឆ្នាំ២០២៥ បាន​អនុម័ត៦៣០ គម្រោង ដែលជាការកើនឡើងរហូតដល់៥០ភាគរយ ៕
អត្ថបទ៖ង៉ាន់ ទិត្យ
រូបភាព៖រិន រចនា