មហោស្រពសៀមរាបជាទីស្រឡាញ់ ប្រារព្ធនៅខេត្តសៀមរាបរយៈពេលពីរថ្ងៃ
សៀមរាប៖“មហោស្រពសៀមរាបជាទីស្រឡាញ់” ប្រព្រឹត្តទៅរយៈពេល២រាត្រីចាប់ពីថ្ងៃទី២៤ ដល់ថ្ងៃទី២៥ ខែមករា ឆ្នាំ២០២៦ នៅទីតាំងព្រលានយន្តហោះចាស់ ខេត្តសៀមរាប។ព្រឹត្តិការណ៍នេះរៀបចំដោយក្រុមជំនុំព្រះជាម្ចាស់ខេត្តសៀមរាប សហការជាមួយក្រុមជំនុំចំនួន ៤៧០ មកពីខេត្តចំនួន៥ និងសមាគមផ្សព្វផ្សាយដំណឹងល្អ ប៊ីលី ហ្គ្រាម (BGEA)ដើម្បីចែករំលែកក្តីសង្ឃឹម និងសន្តិភាព។
ថ្លែងក្នុងសន្និសីទសារព័ត៌មាននៅសណ្ឋាគារ Courtyard by Marriott Siem Reap Resort ជុំវិញការរៀបចំព្រឹត្តិការណ៍“មហោស្រពសៀមរាបជាទីស្រឡាញ់” លោក លន់ សូភី អនុប្រធានគណៈកម្មការរៀបចំមហោស្រពបានពណ៌នាថាព្រឹត្ដិការណ៍នេះនឹងក្លាយជាព្រឹត្ដិការណ៍ប្រវត្ដិសាស្ដ្រមួយសម្រាប់ខេត្តសៀមរាបដែលបានរៀបចំឡើងជាលក្ខណៈខ្នាតធំរយៈពេល២រាត្រី ។
ចំណែកលោកគ្រូគង្វាល ទុន ឆៃ ប្រធានគណៈកម្មការរៀបចំមហោស្រពបានបន្ថែមថា នេះគឺជាឱកាសដ៏សំខាន់សម្រាប់ថ្នាក់ដឹកនាំគ្រីស្ទបរិស័ទ ក្នុងការរួមគ្នាអធិស្ឋានសុំពរជ័យ និងសេចក្ដីសុខជូនដល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឱ្យទទួលបាននូវប្រាជ្ញាស្មារតីក្នុងការដឹកនាំប្រទេសជាតិឱ្យឆ្លងផុតពីវិបត្តិដ៏វឹកវរនេះ។
មហោស្រពសៀមរាបជាទីស្រឡាញ់ នឹងមានការរៀបចំការប្រគំតន្រ្ដីពីក្រុមសិល្បៈករខ្មែរ ក្រុមតន្រ្តីករមកពីបរទេសដែលធ្លាប់ឈ្នះពានរង្វាន់ ដូចជា TAYA និងក្រុម The Afters ផងដែរ។
ក្នុងសន្និសីទកាសែតដដែល លោក ហ្វ្រែងឃ្លីន ហ្គ្រាហាំ (Franklin Graham) ប្រធាន និងជានាយកប្រតិបត្តិនៃសមាគមផ្សព្វផ្សាយដំណឹងល្អ ប៊ីលី ហ្រ្គាម (BGEA) បានថ្លែងថា គោលបំណងចម្បងនៃមហោស្រពនេះ គឺដើម្បីចែករំលែកសារនៃក្ដីសង្ឃឹមពីព្រះគម្ពីរ និងអធិស្ឋានសុំសន្តិភាពដ៏យូរអង្វែងសម្រាប់កម្ពុជា តាមរយៈព្រះយេស៊ូវគ្រីស្ទ។ ខេត្តសៀមរាប គឺជាគោលដៅទេសចរអន្តរជាតិដ៏សំខាន់ ដែលមនុស្សជុំវិញពិភពលោកចង់មកទស្សនា ជាពិសេសគឺ ប្រាសាទអង្គរវត្ត ដែលជាអច្ឆរិយវត្ថុមួយនៃពិភពលោក។ លោកបន្ថែមថា ទោះបីកម្ពុជាកំពុងមានបញ្ហាព្រំដែនប៉ុន្តែលោកមានអារម្មណ៍ថាមានសុវត្ថិភាពខ្លាំងនៅកម្ពុជា។ប្រជាជនកម្ពុជា រាក់ទាក់ និងមានសន្តានចិត្តល្អ។លោកក៏បានរំពឹងថា តាមរយៈព្រឹត្តិការណ៍ “មហោស្រពសៀមរាបជាទីស្រឡាញ់” នឹងទាក់ទាញមហាជនយ៉ាងច្រើនកុះករ ឱ្យមកជួបជុំគ្នាដើម្បីទទួលយកភាពសប្បាយរីករាយតាមរយៈតន្ត្រី និងសារនៃក្តីស្រឡាញ់។
លោក ហ្វ្រែងឃ្លីន ហ្គ្រាហាំ ក៏បានចុះជួយសង្គ្រោះពលរដ្ឋដែលរងគ្រោះដោយផ្ទាល់ផងដែរ តាមរយៈផ្តល់កញ្ចប់ជំនួយជាច្រើនដូចជា ស្បៀងអាហារ ភួយ មុង និងសម្ភារៈអនាម័យដល់គ្រួសារភៀសសឹក។
គួររំលឹកថា សមាគម BGEA និងអង្គការសាម៉ារីតាន់ស៍ ភើស បានបំពេញការងារមនុស្សធម៌ និងអភិវឌ្ឍន៍នៅកម្ពុជាអស់រយៈពេលជាង ២០ ឆ្នាំមកហើយ រួមមានការសាងសង់សាលារៀនចំនួន ៥០ ខ្នង ការផ្ដល់ទឹកស្អាត និងកម្មវិធីបណ្ដុះបណ្ដាលវិជ្ជាជីវៈជាច្រើនទៀត ៕
អត្ថបទនិងរូប៖ ប៊ុន រដ្ឋា
