ភ្នំពេញ៖ជុំវិញជម្លោះព្រំដែនជាមួយកម្ពុជា ,ភាគីថៃ បានធ្វើឱ្យ​ខូចខាត​ប្រាសាទព្រះវិហារ ដែលជាបេតិកភណ្ឌពិភពលោក តំបន់​ជុំវិញប្រាសាទព្រះវិហារ ប្រាសាទតាក្របី ប្រាសាទខ្នារ ប្រាសាទ​តាមាន់ និងបុរាណដ្ឋានផ្សេងៗទៀតនៅតាមព្រំដែន រួមជាមួយ​នឹងការព្យាយាមដណ្ដើមយកប្រាសាទបុរាណ​ខ្មែរទៅគ្រប់គ្រង ព្រមទាំងការយកលេសពន្យារពេលប្រគល់វត្ថុ​បុរាណខ្មែរមួយចំនួន ត្រឡប់មកប្រទេសកម្ពុជាវិញ ។នេះបើយោងតាម ឯកឧត្តម ឡុង ប៉ុណ្ណាស៊ីរីវត្ថុ រដ្ឋលេខាធិការក្រសួងវប្បធម៌ និងវិចិត្រសិល្បៈ បញ្ជាក់ក្នុងសន្និបាតបូកសរុបលទ្ធផលការងារវប្បធម៌ និងវិចិត្រ​សិល្បៈ ឆ្នាំ២០២៥ កាលពីព្រឹកថ្ងៃទី៤ ខែកុម្ភៈ ឆ្នាំ២០២៦​នាសាលសន្និសីទចតុមុខ ។

ឯកឧត្តម​ ឡុង ប៉ុណ្ណាស៊ីរីវត្ថុ រដ្ឋលេខាធិការក្រសួងវប្បធម៌ និង​វិចិត្រសិល្បៈ បានបន្តទៀតថា ភាព​តានតឹង និងជម្លោះ​ព្រំដែន​កម្ពុជា ថៃ បានធ្វើឱ្យប៉ះពាល់ដល់សកម្មភាពជួសជុល និងអភិរក្ស រួមទាំងទេសចរវប្បធម៌ នៅក្នុង​រមណីយដ្ឋានប្រាសាទ​ព្រះវិហារ និងប្រាសាទផ្សេងៗទៀតនៅតាមព្រំដែនផងដែរ។

ចំណែកលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួង​វប្បធម៌ និងវិចិត្រសិល្បៈ បានលើកឡើងថា ឆ្នាំ២០២៥ គឺជាឆ្នាំមួយ​ដែលលំបាកសម្រាប់យើង ដោយសារការឈ្លានពានពី​ប្រទេសជិត​ខាង ប៉ុន្តែលោកជំទាវសង្ឃឹមថា ឆ្នាំ២០២៦ ក្រសួង​នឹងទទួលបាន​ជោគជ័យកាន់តែខ្ពស់ ក្នុងការរួមចំណែកកសាងកម្ពុជា ឱ្យមានអត្ត​សញ្ញាណវប្បធម៌ច្បាស់លាស់ និងអភិវឌ្ឍ​ប្រកបដោយចីរភាព ។

ទាក់ទងនឹងសកម្មភាពថៃនាដំណាក់កាលនេះ រដ្ឋមន្រ្តីក្រសួងវប្បធម៌​បានបញ្ជាក់ថា ការណ៍ដែលភាគីថៃ លែងគោរព​ច្បាប់​អន្តរជាតិ នាំឱ្យភាគីកម្ពុជា ពិបាកធ្វើការជាមួយខ្លាំងណាស់ដូចជា ការរាយបន្លាលួស និងដាក់ទូកុងតឺន័រ នៅលើដែនអធិប​តេយ្យ​របស់ភាគីកម្ពុជា គឺជាកំហុសដែលល្មើសនឹងច្បាប់អន្តរជាតិ ។

ជាមួយគ្នានេះលោកជំទាវរដ្ឋមន្ត្រីបានអំពាវនាវដល់មន្ត្រីគ្រប់លំដាប់ថ្នាក់ អ្នកសិក្សាឯកសារ ត្រូវតែឆ្លើយ​តបតាមអ្វីដែលអាច​ឆ្លើយបាន កុំស្ងាត់ឱ្យសោះ គឺយើងត្រូវចេញមកចូលរួមទាំងអស់គ្នា ក្នុងនាម​យើងជាខ្មែរ។

សូមជម្រាបថា មួយផ្នែកនៃរបាយការណ៍ប្រចាំឆ្នាំរបស់ក្រសួងវប្បធម៌​បានគូសរំលេចថា ឆ្នាំ២០២៥ក្រសួង បានជួសជុល និងអភិរក្សសំណង់បេតិកភណ្ឌសរុបចំនួន ១ ០៩៥ ទីតាំង/ផ្នែកចំណុច ។ក្រសួង បានជួសជុលនិងអភិរក្ស វត្ថុបុរាណ វត្ថុសិល្បៈ និងវត្ថុជាតិពន្ធុ សរុបចំនួន ៥.០៦១មុខ ។ ក្រសួងបានទទួលវត្ថុបុរាណខ្មែរពីបរទេសសរុបចំនួន ១ ១៥៨មុខ ពីស្ថាប័ននានាចំនួន ៤០ និងពីបុគ្គលចំនួន ១ ១១៨ គិតពីខែមករា ដល់ថ្ងៃទី២១ ខែវិច្ឆិកា ឆ្នាំ២០២៥ ។ ដោយឡែក ការអភិរក្សបុរាណដ្ឋាន ក្រសួងបានវាស់វែងចំនួន ១៨ ៥៣០ ស្មើនឹង ៩៦.៥៧ភាគរយ ៕

អត្ថបទ៖ វណ្ណលុក
រូប៖ គ្រី សម្បត្តិ