កណ្ដាល៖ ព្រះករុណាព្រះបាទសម្ដេចព្រះបរមនាថ នរោត្ដម សីហមុនីព្រះមហាក្សត្រនៃព្រះរាជាណាចក្រកម្ពុជា និងសម្តេច​ព្រះមហាក្សត្រីនាព្រឹកថ្ងៃទី២៧ ខែកុម្ភៈ ឆ្នាំ២០២៦ ព្រះអង្គទាំងទ្វេស្តេចយាងទៅកាន់ទីក្រុងប៉េកាំង សាធារណរដ្ឋប្រជាមា​និតចិនដើម្បីពិនិត្យ​ព្រះរាជ​សុខភាព ។

យាង និងអញ្ជើញថ្វាយព្រះរាជដំណើរព្រះអង្គទាំងទ្វេនៅអាកាសយានដ្ឋានអន្តរជាតិតេជោ មានវត្តមាន សម្ដេចអគ្គ មហាសេនា​បតីតេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភានៃព្រះរាជាណាចក្រកម្ពុជា និងសម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ព្រមទាំងសម្ដេច ឯកឧត្ដម លោកជំទាវ ជាសមាជិកសមាជិកាឧត្ដមប្រឹក្សាផ្ទាល់ព្រះមហាក្សត្រ ព្រះរាជវង្សានុវង្ស និងឯកឧត្តម វ៉ាង វេនពីន ឯកអគ្គរដ្ឋទូតសាធារណ​រដ្ឋប្រជាមានិតចិន ប្រចាំនៅកម្ពុជាផងដែរ។

សូមជម្រាបថា តាមព្រះរាជសាររបស់ព្រះមហាក្សត្រមានខ្លឹមសារថា «ទូលព្រះបង្គំ ខ្ញុំព្រះករុណា ខ្ញុំ និង សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរព សក្ការៈដ៏ខ្ពង់ខ្ពស់បំផុត សូមព្រះអនុញ្ញាត និងអនុញ្ញាតពីសម្តេចព្រះមហាសង្ឃរាជ ទាំងពីរ​គណៈ និងព្រះថេរានុត្ថេរៈគ្រប់ព្រះអង្គ សម្តេច ឯកឧត្តម លោកជំទាវ លោក លោកស្រី លោកតា លោកយាយ មាមីង បងប្អូន ក្មួយៗជនរួមជាតិទាំងអស់ អវត្តមានពីមាតុប្រទេស ចាប់ពីថ្ងៃទី២៧ ខែកុម្ភៈ ឆ្នាំ២០២៦ តទៅ ដើម្បីធ្វើដំណើរទៅពិនិត្យព្រះរាជ​សុខភាពនៅរដ្ឋធានីប៉េកាំង នៃសាធារណរដ្ឋប្រជាមានិតចិន។

នៅក្នុងឱកាសអវត្តមានរបស់ ទូលព្រះបង្គំ ខ្ញុំព្រះករុណា ខ្ញុំ ខាងលើនេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នឹងទទួលជួយក្នុងព្រះបរមនាម ទូលព្រះបង្គំ ខ្ញុំព្រះករុណា ខ្ញុំ ជាប្រមុខរដ្ឋស្តីទី នៃព្រះរាជាណាចក្រកម្ពុជា។

គួរបញ្ជាក់ថា ព្រះមហាក្សត្រកម្ពុជា និងសម្ដេចព្រះមហាក្សត្រី ទ្រង់ទាំងទ្វេតែងយាងទៅពិនិត្យព្រះរាជសុខភាព នៅប្រទេសចិន រៀងរាល់៦ខែម្តង តាមការយាងពីក្រុមគ្រូពេទ្យចិន។

សូមជម្រាបថា រដ្ឋាភិបាលក៏បានបង្កើត«ក្រុមគ្រូពេទ្យ»ថែទាំព្រះរាជ សុខភាពថ្វាយព្រះករុណាព្រះមហាក្សត្រនៃកម្ពុជា និង​សម្ដេចព្រះ មហាក្សត្រីព្រះ វររាជមាតាជាតិខ្មែរដែរ។ ក្រុមព្រះរាជពេទ្យខ្មែរ ត្រូវបានបង្កើឡើងនៅចុងឆ្នាំ២០២៣។ ក្រៅពីភារកិច្ច​ទទួលខុសត្រូវក្នុងការពិនិត្យ ពិគ្រោះយោបល់ ព្យាបាល និងថែទាំព្រះរាជសុខភាពថ្វាយព្រះអង្គទាំងទ្វេ ក្រុមគ្រូពេទ្យ ថែទាំព្រះរាជ​សុខភាព មានសិទ្ធិអញ្ជើញអ្នកជំនាញវេជ្ជសាស្រ្ត និងអមវេជ្ជសាស្រ្តនានា ចូលរួមជួយការងារក្នុងករណីចាំបាច់៕ ដោយ៖វណ្ណលុក