ហ្ស៊េរុយសាឡឹម ៖ អ៊ីស្រាអែលបានចែករំលែករបាយការណ៍សម្ងាត់មួយ ដោយព្រមានដល់សហរដ្ឋអាមេរិកថា អ៊ីរ៉ង់ទើបតែបានរៀបចំផែនការថ្មីមួយ ដើម្បីលួចធ្វើឃាតលោកប្រធានាធិបតី ដូណាល់ ត្រាំ ។ នេះបើតាម CNN ចេញផ្សាយនៅថ្ងៃ សុក្រ ដោយយោងតាមប្រភពចំនួនពីរ ។

ការព្រមាននេះ ប្រៀបដូចការចាក់សាំងថែមលើភ្លើងសង្គ្រាមរវាងសហរដ្ឋអាមេរិក និងអ៊ីរ៉ង់ ដែលចាប់ផ្តើមឆាបឆេះកាន់តែក្តៅគគុកឡើងវិញ ក្រោយភាគីជម្លោះទាំងពីរបានវាយប្រហារគ្នាទៅវិញទៅមក និងនៅពេលដែលកិច្ចព្រមព្រៀងឈប់បាញ់កំពុងស្ថិតក្នុងភាពរង្គោះរង្គើ ។

អ្វីដែលគួរឱ្យកត់សម្គាល់ ព័ត៌មាននេះ កើតឡើងចំពេលដែលអ៊ីរ៉ង់កំពុងរៀបចំពិធីបុណ្យសពអតីតមេដឹកនាំកំពូល Ayatollah Ali Khamenei ដែលត្រូវអាមេរិក និងអ៊ីស្រាអែលធ្វើឃាត ពេលសង្គ្រាមផ្ទុះឡើងដំបូងក្នុងឆ្នាំនេះ ។

ទន្ទឹមគ្នា ប្រជាជនអ៊ីរ៉ង់រាប់លាននាក់ដែលបានចូលរួមពិធីកាន់ទុក្ខនោះ បានលើកបដា និងទាមទារឲ្យមានការសងសឹក ហើយថែមទាំងស្រែកខ្លាំងៗថា សម្លាប់លោក ត្រាំ ចោលទៅ ។

យោងតាម CNN, លោកប្រធានាធិបតី ដូណាល់ ត្រាំ បានថ្លែងប្រាប់អ្នកយកព័ត៌មានកាលពីថ្ងៃ ពុធ ថា ពួកគេ (អ៊ីរ៉ង់) ចង់កម្ចាត់មេដឹកនាំអាមេរិក ដែលនោះគឺជារូបលោក និងថា លោកទើបតែបានដឹងពីបញ្ជីថ្មីមួយ ដែលចាត់ថ្នាក់រូបលោក ជាគោលដៅធ្វើឃាតលំដាប់កំពូលរបស់អ៊ីរ៉ង់ ។

មេដឹកនាំអាមេរិកមានវ័យ៨០ឆ្នាំរូបនេះ បានសង្កត់ធ្ងន់យ៉ាងដូច្នេះថា យើងត្រូវតែបោសសម្អាតជំងឺមហារីកនោះចោល ។ តើអ្នកដឹងទេ ថាត្រូវធ្វើដូចម្តេច? អ្នកត្រូវតែកាត់ផ្តាច់ជំងឺមហារីកនោះចេញឱ្យបានឆាប់ ។ ហើយនោះគឺជាអ្វីដែលខ្ញុំចាប់អារម្មណ៍ ។

យ៉ាងណាមិញ មន្ត្រីអាមេរិកផ្សេងទៀតបានលើកឡើងថា របាយការណ៍សម្ងាត់របស់អ៊ីស្រាអែលនេះ អាចជាផ្នែកមួយនៃកិច្ចប្រឹងប្រែង ដើម្បីជះឥទ្ធិពលលើការសម្រេចចិត្តរបស់លោក ត្រាំ ក្នុងពេលដែលលោកកំពុងពិចារណាថាតើត្រូវបង្កើនសកម្មភាពយោធារបស់អាមេរិកប្រឆាំងនឹងអ៊ីរ៉ង់ដែរឬទេ ។

សូមបញ្ជាក់ថា ប្រទេសអ៊ីរ៉ង់បានសន្យាជាច្រើនឆ្នាំមកហើយ ថានឹងសងសឹកលោកប្រធានាធិបតី ដូណាល់ ត្រាំ ចំពោះការបញ្ជាឱ្យយោធាអាមេរិកសម្លាប់អតីតមេបញ្ជាការអ៊ីរ៉ង់ លោក Qassem Soleimani កាលពីខែមករា ឆ្នាំ២០២០ ពោលគឺចាប់តាំងពីអាណត្តិដំបូងរបស់លោកមកម្ល៉េះ ៕

ប្រភព ៖ CNN ប្រែសម្រួល ៖ ឈឹម ទីណា