ភ្នំពេញ៖សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជានឹងអញ្ជើញដឹកនាំគណៈប្រតិភូជាន់​ខ្ពស់​រដ្ឋសភាបំពេញទស្សនកិច្ចជាផ្លូវការ និងមិត្តភាពនៅសាធារណរដ្ឋសង្គមនិយមវៀតណាមរយៈពេល៣ថ្ងៃចាប់ពីថ្ងៃទី២៧ ដល់ថ្ងៃទី២៩ ខែកក្កដា ឆ្នាំ២០២៦ ខាងមុខនេះ។

ដំណើរទស្សនកិច្ចផ្លូវការនាពេលខាងមុខធ្វើឡើងតបតាមការអញ្ជើញរបស់ ឯកឧត្តម ជិន ថាញ់មិន (Tran Thanh Man)ប្រធានរដ្ឋសភានៃសាធារណរដ្ឋសង្គមនិយមវៀតណាម។

ដំណើរទស្សនកិច្ចនេះ គឺដើម្បីពង្រឹង និងពង្រីកទំនាក់ទំនងមិត្តភាព ព្រមទាំងកិច្ចសហប្រតិបត្តិការរវាងប្រទេសទាំងពីរ ឱ្យកាន់​តែជិតស្និទ្ធ រឹងមាំ និងស៊ីជម្រៅ ទាំងក្នុងក្របខណ្ឌនីតិប្បញ្ញត្តិ និងនីតិប្រតិបត្តិ ក្រោមស្មារតី «ភាពជាអ្នកជិតខាងល្អ មិត្តភាពជា​ប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង»។

ក្នុងអំឡុងពេលទស្សនកិច្ច សម្តេចប្រធានរដ្ឋសភា គ្រោងជួបសម្តែងការគួរសមជាមួយ ឯកឧត្តម តូ ឡឹម (To Lam) អគ្គលេខា​ធិការបក្សកុម្មុយនីស្ត និងជាប្រធានរដ្ឋវៀតណាម, ជួបពិភាក្សាការងារទ្វេភាគីជាមួយ ឯកឧត្តម ជិន ថាញ់មិន ប្រធានរដ្ឋសភា​វៀតណាម ព្រមទាំងជួបសម្តែងការគួរសមជាមួយ ឯកឧត្តម ឡេ មិញហ៊ឹង (Le Minh Hung) នាយករដ្ឋមន្ត្រី​វៀតណាម​ផងដែរ។

ប្រភពរដ្ឋសភាបានឱ្យដឹងថា ក្នុងឱកាសនេះគណៈប្រតិភូអមដំណើរដែលជាសមាជិកគណៈកម្មការជំនាញនៃរដ្ឋសភាកម្ពុជា ក៏នឹងមានជំនួបពិភាក្សាការងារទ្វេភាគីជាមួយសមភាគីវៀតណាម ដើម្បីផ្លាស់ប្តូរបទពិសោធន៍ និងចែករំលែកព័ត៌មាន​រវាងគ្នា​និងគ្នា។

ក្រៅពីនេះគណៈប្រតិភូជាន់ខ្ពស់រដ្ឋសភាកម្ពុជាក៏គ្រោងអញ្ជើញទស្សនកិច្ចទីតាំងសំខាន់ៗ រួមមាន តំបន់ឧស្សាហកម្ម តំបន់​វប្បធម៌ ទេសចរណ៍ និងមន្ទីរពេទ្យនៃប្រទេសវៀតណាមផងដែរ៕
ដោយ៖ស៊ូ វណ្ណលុក