ភ្នំពេញ៖ក្នុងសប្តាហ៍នេះ ក្រសួងបរិស្ថាន បានបង្ហាញលទ្ធផលស្ដីពីប្រតិបត្តិការចុះល្បាត និងបង្ក្រាបបទល្មើសធនធានធម្មជាតិ នៅតាមតំបន់ ការពារធម្មជាតិនានា រួមទាំងការដកហូតផ្ទៃដីព្រៃដែលត្រូវបានរំលោភបំពាន ត្រឡប់មកវិញជាង ១៤ ហិកតា។

គិតចាប់ពីចុងខែសីហា ដល់ថ្ងៃទី១០ ខែកញ្ញា ឆ្នាំ២០២៦កន្លងទៅនេះ ក្រុមការងារក្រសួងបរិស្ថាន សហការជាមួយមន្ត្រីឧទ្យានុរក្ស អាជ្ញាធរដែនដី កងកម្លាំងសមត្ថកិច្ច តំណាងអង្គការដៃគូ និងប្រជាសហគមន៍មូលដ្ឋាន បានចុះល្បាតនៅតាមតំបន់ការពារធម្មជាតិ​ទូទាំងប្រទេស បានចំនួន ៤៣៨លើក។

តាមរយៈសកម្មភាពល្បាតនេះកងកម្លាំងចម្រុះបង្ក្រាបបានបទល្មើសសរុប ៦៨ករណី ដោយបានកសាងសំណុំរឿងបញ្ជូនទៅតុលាការចំនួន ៥ករណី និងឃាត់ខ្លួនជនសង្ស័យ ៥នាក់។ក្នុងប្រតិបត្តិការនេះ សមត្ថកិច្ចដកហូតបានឈើប្រណីត និងឈើចម្រុះ ៣៧,៦៤ ម៉ែត្រគូប- ផ្ទៃដីព្រៃរំលោភបំពានចំនួន ១៤,៦៩ ហិកតា- ម៉ូតូ ១៥គ្រឿង, គោយន្ត-រ៉ឺម៉ក ៧គ្រឿង, និងរថយន្ត ១គ្រឿង- អាវុធកែច្នៃ ១៨ដើម, អន្ទាក់ ៤៥៤ខ្សែ និងលួសបន្លាប្រវែងជាង ៣ ពាន់ម៉ែត្រ។

ផ្អែកតាមការចេញផ្សាយនាថ្ងៃទី២ ខែតុលា ឆ្នាំ២០២៦នេះ ក្រសួងបរិស្ថានបានគូសបញ្ជាក់ថា ក្រសួងនឹងបន្តពង្រឹងការអនុវត្តច្បាប់​ឱ្យបានតឹងរ៉ឹងបំផុត ដើម្បីទប់ស្កាត់ការកាប់បំផ្លាញព្រៃឈើ និងការទន្ទ្រានយកដីរដ្ឋ។ទន្ទឹមនឹងការអនុវត្តច្បាប់ ក្រសួងក៏បន្តលើកកម្ពស់​ជីវភាពប្រជាសហគមន៍មូលដ្ឋាន ដោយផ្តល់ជម្រើសមុខរបរ និងសេដ្ឋកិច្ចថ្មីៗ ដើម្បីកាត់បន្ថយការរស់អាស្រ័យលើផលព្រៃឈើ ព្រមទាំងជំរុញការដាំស្តារព្រៃឡើងវិញ ប្រកបដោយចីរភាព៕
ដោយ៖ម៉ាដេប៉ូ