គ្រូបង្វឹកនៃក្រុមជម្រើសជាតិអាយុក្រោម២៣ឆ្នាំទាំង៤ គឺកម្ពុជា អូស្រ្តាលី កូរ៉េខាងត្បូង និង ឆៃនីសតៃប៉ិ បានបង្ហាញការជឿជាក់ដូចគ្នា  នៅក្នុងសន្និសីទសារពត៌មាន នៅថ្ងៃព្រហសប្បតិ៍នេះ មុនពេលដែលត្រូវប្រកួតវគ្គសន្សំពិន្ទក្នុងពូល H ព្រឹត្តិការណ៍ AFC U23 Championship ដែលកម្ពុជាទទួលធ្វើម្ចាស់ ផ្ទះពូលH ពីថ្ងៃទី២២ ដល់ថ្ងៃទី២៦ មីនា នៅពហុ កីឡដ្ឋានជាតិ អូឡាំពិក។

លោក Felix Dalmas គ្រូបង្គោលជម្រើសជាតិ U23 កម្ពុជាបញ្ជាក់ថា នេះជាឱកាស ដ៏ល្អ ដែលបាន ជួបជាមួយក្រុមល្អៗ ហើយក៏សប្បាយចិត្តចំពោះការរីកចម្រើនរបស់កូនក្រុម និងសម្លឹង ឆ្ពោះទៅកាន់ការប្រកួត បន្ថែមទៀត ។
លោក Can Hun Von គ្រូបង្គោលក្រុមបាល់ទាត់ជម្រើសជាតិឆាយនីសតៃប៉ិ U23 បង្ហើប ឲ្យដឹងថា មូលហេតុដែលលោកយកកីឡាករភាគច្រើនជានិស្សិតប្រចាំសាកលវិទ្យាល័យ ព្រោះលោក ធ្លាប់បង្ហាត់ពួកគេនៅ ជម្រើសជាតិអាយុក្រោម១៩ឆ្នាំដែរ ដោយលោករំពឹងថា ពួកគេនឹងអាចកើន បទ ពិសោធបន្ថែមទៀត ។

ចំណែកលោក Graham Arnold គ្រូបង្គោលU23 ជម្រើសជាតិអូស្ត្រាលី U23 និយាយ ដែរថា មុនឈាន ជើងមកកម្ពុជាចូលរួមវគ្គជម្រុះ AFC U23 លោកបាននាំកូន ក្រុមទៅ បោះជំរុំ ហ្វឹកហាត់មួយ សប្ដាហ៍នៅប្រទេស ម៉ាឡេស៊ី ដើម្បីបន្សុំានឹងអាកាសធាតុ ហើយលោកសង្ឃឹមថា កូនក្រុមរបស់លោកនឹងអាចធ្វើបានល្អ ក្នុងការ ប្រកួតនេះ។ លោកបញ្ជាក់ថា ពុំមានអ្វីជាបញ្ហាចោទទេ ព្រោះគិតថា AFC បានវាយតម្លៃរួចរាល់ហើយ ចំពោះការរៀបចំរបស់កម្ពុជាហើយអរគុណពេញចិត្តចំពោះការខិតប្រឹងប្រែងរៀបចំរបស់សហព័ន្ធកីឡាបាល់ទាត់កម្ពុជា ។ លោកមានការគោរពខ្លាំងចំពោះក្រុមម្ចាស់ផ្ទះកម្ពុជា ។

ចំពោះលោក Kim-Hak Bum គ្រូបង្គោល U23 សាធារណរដ្ឋកូរ៉េ បានលើកឡើងដែរថា លោកបាន ត្រៀមខ្លួនរួចជាស្រេចសម្រាប់ការប្រកួតនេះ ដោយមិនមានអ្វីជាក្ដីបារម្ភឡើយ ហើយអ្វីដែលសំខាន់ សម្រាប់ លោក គឺធានាថា កីឡាករមិនមានរបួស។ សូមបញ្ជាក់ថា សម្រាប់ការប្រកួតថ្ងៃបើកឆាករបស់ក្រុមម្ចាស់ផ្ទះ U23 កម្ពុជា នឹងត្រូវជួបក្រុម U23 អូស្ដ្រាលីមុនគេ នាថ្ងៃទី២២ ខែមីនាស្អែកនេះ នៅលើទីលានពហុកីឡដ្ឋានជាតិរាជធានីភ្នំពេញ ៕ធ.ដ