សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ បានគូសបញ្ជាក់ក្នុងថ្ងៃអង្គារ៍សប្តាហ៍នេះថា ការដាក់ទណ្ឌកម្មលើប្រទេសកូរ៉េខាងជើង នឹងនៅតែបន្តរហូតទល់តែការលុបបំបាត់អាវុធនុយក្លេអ៊ែរកើតឡើងពិតប្រាកដ។ លោកបានអះអាងបែបនេះ នាអំឡុងការថ្លែងសុន្ទកថារបស់លោក ក្នុងពិធីបើកសម័យប្រជុំមហាសន្និបាតអង្គការសហប្រជាជាតិលើកទី៧៣ នៅក្នុងទីក្រុងញ៉ូវយ៉ក នៅក្នុងថ្ងៃអង្គារ៍សប្តាហ៍នេះ។ នៅក្នុងសុន្ទកថានោះ លោក ត្រាំ បានសម្តែងនូវការចាប់អារម្មណ៍របស់សហរដ្ឋអាម៉េរិកជាមួយកូរ៉េខាងជើង ដោយកត់សម្គាល់ថា ការសាកល្បងនុយក្លេអ៊ែរបានបញ្ឈប់ ហើយចំណាប់ខ្មាំងត្រូវបានដោះលែង ហើយមីស៊ីលក៏លែងហោះហើរឆ្លងកាត់ព្រំដែនប្រទេសកូរ៉េទំាងពីរដែរ ។