ក្រុមការងារគ្រូពេទ្យរបស់កងពលតូចលេខ៧០នៅតែបន្តពិនិត្យព្យាបាល និងចែកថ្នាំជូនប្រជាពលរដ្ឋ​ដោយឥតគិតថ្លៃក្នុងខណ្ឌដង្កោ។ នៅថ្ងៃទី២៧ ខែតុលា ឆ្នាំ២០២០ការិយាល័យសុខាភិបាលកងពលតូច លេខ៧០ បានបន្ត ពិនិត្យព្យាបាលជំងឺ និងចែកថ្នាំ ជាពិសេស ថ្នាំ ឧបត្ថម្ភដោយមន្ទីរពេទ្យសូរិយា  និងស្នង​ការ​ដ្ឋាននគរបាលរាជធានីភ្នំពេញ  និងថ្នាំរបស់កងពល ជូនដោយឥតគិតថ្លៃ ដល់ប្រជាពលរដ្ឋនៅ​សង្កាត់​ស្ពានថ្ម ខណ្ឌដង្កោ ដែលកំពុងទទួលរងការលិចលង់ដោយជំនន់ទឹកភ្លៀង និងនៅតាមមណ្ឌលសុខភាព​របស់​កង​ពល​ផងដែរ ។ ការពិនិត្យនិងព្យាបាលជំងឺជូន ប្រជាពលរដ្ឋ មាននៅក្នុង មន្ទីរពេទ្យកងពលចោមចៅ មណ្ឌល សុខភាពមរតកសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែនជុំគិរីខេត្តកំពត  និងមណ្ឌល សុខភាព​មរតក​​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្រាំងអំពិល ខេត្តកំពង់ស្ពឺ  និងទីតាំងដែលប្រចាំការផ្សារ​ព្រែកជ្រៃ ដែលកំពុងទទួលរងការលិចលង់ដោយជំនន់ទឹកភ្លៀង សម្រាប់ ពេទ្យ ទាំងអស់ បានយកចិត្តទុក​ដាក់ក្នុង ការព្យាបាលជូនប្រជាពលរដ្ឋ នាយទាហាន នាយទាហានរង និងពលទាហាន។

ការពិនិត្យ ព្យាបាល រួមមាន៖ ជំងឺទូទៅ ជំងឺទូទៅផ្នែកកុមារ ជំងឺសើស្បែក និងព្យាបាលរបួស ថ្នាំលាបរមាស់​សត្វល្អិត ទិច  រឺខាំ។ល។សូមជម្រាបថាការពិនិត្យ និងព្យាបាលជំងឺជូនប្រជាពលរដ្ឋនេះ​គឺកើតចេញពី​ស្មារតី​មនុស្សធម៌សុទ្ធសាធ ស្តែងចេញពីសេចក្តីស្រឡាញ់បងប្អូន ប្រជាពលរដ្ឋ ក្នុងនាមឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួក ពូជសាសន៍ សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្រ របស់ប្រជាពលរដ្ឋមួយ​ចំណែកផងដែរ។ បញ្ហាសុខភាព គឺជាមូលដ្ឋានគ្រឹះដើម្បីឆ្ពោះទៅរកភាពជោគជ័យសុភមង្គល ជូនគ្រួសារ និងសង្គមជាតិ។