លោក ចូ បៃដិន សន្យាថា នឹងដឹកនាំសហរដ្ឋអាមេរិកនៅលើផ្លូវឯកភាពជាតិ ជាជាងការបែកបាក់គ្នា
អាមេរិក៖ ប្រធានាធិបតីអាមេរិកជាប់ឆ្នោត លោក ចូ បៃដិន សន្យាថា នឹងដឹកនាំប្រទេសនៅលើផ្លូវឯកភាពជាតិ ជាជាងការបែកបាក់គ្នា នេះបើតាមសារព័ត៌មាន CNN នៅថ្ងៃទី០៨ ខែវិច្ឆិកា ឆ្នាំ២០២០ ។
នៅក្នុងសុន្ទករថាជ័យជម្នះថ្លែងទៅកាន់ប្រជាជាតិអាមេរិក នៅថ្ងៃសៅរ៍សប្ដាហ៍មុននេះនៅឯទីក្រុង វីលមីនតុន រដ្ឋ ដេឡាវែរ លោក ចូ បៃដិន ថែមទាំងបានធ្វើការអំពាវនាវឱ្យអ្នកគាំទ្ររបស់លោក ដូណាល់ ត្រាំ ទុកឱកាសឱ្យរូបលោក ដើម្បីបើកទំព័រប្រវត្តិសាស្ត្រថ្មីមួយសម្រាប់សហរដ្ឋអាមេរិក ។ ប្រធានាធិបតីអាមេរិកជាប់ឆ្នោតរូបនេះ បានសង្កត់ធ្ងន់ថា នេះគឺជាពេលផ្សះផ្សាជាតិ ជាជាងបន្តបែកបាក់គ្នា ដោយបំបាត់ចោលនូវវោហាស័ព្ទគ្រោតគ្រាត ការសម្លឹងមើលគ្នាទៅវិញទៅមក និងស្ដាប់គ្នាទៅវិញទៅមកសាជាថ្មី ។
សូមបញ្ជាក់ថា លោក ចូ បៃដិន បានយកឈ្នះលោក ដូណាល់ ត្រាំ ក្នុងការបោះឆ្នោតប្រធានាធិបតីឆ្នាំ២០២០ ដោយទទួលបានអង្គបោះឆ្នោត ២៩០ ទល់នឹង២១៤ ។ ប៉ុន្តែទាំងលោក ដូណាល់ ត្រាំ ផ្ទាល់ និងអ្នកគាំទ្ររបស់លោកមិនបានទទួលស្គាល់ជ័យជម្នះរបស់លោក បៃដិន ទេ ហើយលោក ត្រាំ ថែមទាំងសន្យាថា នឹងតវ៉ាលទ្ធផលបោះឆ្នោតនេះតាមផ្លូវតុលាការ ៕
